Aba Loma 11

Nizya chisa icha Chala paba Izilayeli

1 # Filp. 3.5 Po imbalalusye, nkimba u Chala akabakana abantu bache? Awe, napo panandi. Ane nemwene ne mu Izilayeli, uwaluko ulwa Abulahamu, uwa mbumba iya Benjamini. 2U Chala atabakanite abantu bache, babo bakabasalila zila ukwandila ko kubwandilo. Nkimba muzimenye zizyo Amasimbo ghakunena pabuzilo bubo bukunena nizya Eliya, papo akamulambilizya u Chala ukuti abafunde aba Izilayeli? Akati, 3#1 Abm. 19.10, 14“Mwene, abene baghogha abalaghuzi bako nukumongolannya ivighemo vyako. Nasyala bulo nemwene, sona bakuyezya ukuti bangoghe.” 4#1 Abm. 19.18Nkimba u Chala akamwamula bulibuli? Akamwamula akati, “Nisungiye nemwene abanavuli 7,000, babo batamuchindikitepo u Baala, u chala umumyasi yula.” 5Umu momumo vibeleye nilelo: Basyala abantu banandi bulo pakasi paba Izilayeli, babo u Chala akabasala pachifukwa icha chisa chache. 6Loli ukusala ukwa Chala kukima pachisa chache, kute po pavintu vivyo bakabomba. Nanti zikabanga bunubu, kokuti ichisa chache, ngali chitakaba chisa ichenecho.

7Po nkimba tungati choni? Chicho aba Izilayeli bakalondagha, batakachagha. Loli abantu abanandi bulo babo u Chala akasala, bakachagha. Abantu bosi babo bakasyalako bakaba na mapuli. 8#Ukk. 29.4; Yes. 29.10Pakuti Amasimbo ghakuti,

“U Chala akaghapela amoyo ghabo pakuba makafu nkani

mupaka nilelo bulo amaso ghabo ghatangennya.

Amakutu ghabo ghatangivwa.”

9 # Mas. 69.22-23 Sona u Devedi akuti,

“Ulusekelo lwabo lubateghe ngati cho chipingo ni nkoka

baleke bawilemo nukufundiwa.

10Amaso ghabo ghighaliliwe, umwakuti batakennyanje;

sona akabalilo kosi inyuma zyabo zipetamaye.”

11Po imbalalusye ukuti, “Nkimba bo aba Yuda bipunula bakawila zila?” Awe, napo panandi! Loli pachifukwa icha mbibi zyabo, ubupoki bwiza pabantu babo bate ba Yuda, ukuti aba Yuda babanje bantu abakabini. 12Imbibi izya ba Yuda zikiza nu lusayo ulukulu nkani kuchisu ichapasi, sona izala yabo iya buzimu yikiza nu lusayo ulukulu nkani pabantu babo bate ba Yuda. Po nkimba lusayo lukulu loni lulo lukwiza pakubako, bo ubwinji ubwa ba Yuda bonjelelako?

Ubupoki bwa bantu babo bate ba Yuda

13Losi ulu nkunena namwe bantu mwe mute mwe ba Yuda. Ane pakuba ne mutumiwa pakasi pabantu babo bate ba Yuda, nkwituvikizya pachifukwa icha butumiwa bwane bunubu. 14Pamo ningabapela abantu abaluko lwane pakuba bantu abakabini, umwakuti ningabapoka bamo mumwabo. 15Nanti abantu aba muchisu ichapasi bakasayana nu Chala pachifukwa ichakuti akabakana aba Yuda, nkimba kukwiza pakuba bulibuli bo bakupokeliwa sona? Kukwiza pakuba ngati bo bantu abafwe, babo bazyuka kubufwe.

16Nanti akamenyu akakwanda aka chibama kapaghuliliwa kwa Chala, kokuti chope ni chibama chosi chipaghuliliwe. Sona nanti igululuzi lizelu, kokuti zyope ni samba zelu. 17Nanti isamba zimo izya musyunguti zyapalantiwa, sona ulusamba ulwa musyunguti ulwa muzi lwamamatiziwa kwikwi lilalila. Amwe mwe bantu babo bate ba Yuda muli ngati lyo likwi ilya musyunguti ilya mwisote, sona mukugabana ubumi ubwa buzimu ubwa ba Yuda. 18Po mutakabayivyanje babo bapalantiwa ngati zyo samba. Loli nanti mukwituvya mukumbukaye ukuti mute mwemwe mukulema amagululuzi, loli amagululuzi gho ghagho ghakubalema amwe.

19Po mukwiza pakunena ukuti, “Isamba zikapalantiwa, umwakuti bamamatizyepo ane.” 20Momumo, abene bakapalantiwa pachifukwa ichakuti batakasubila, bo amwe mukwikala mubuzilo bwinyu pachifukwa ichakuti mukusubila. Mutakituvyanje, loli munyilaye. 21Nanti u Chala atakazileka isamba mubuzilo bwache, nkimba mukwinong'ona ukuti akwiza pakubaleka amwe? 22Panapa mungachennya ichisa icha Chala, sona nu bukali bwache. Abakalaliye abantu babo bawiye, loli ali ni chisa namwe, nanti mukwendelela pakubomba vivyo vikumuhobosya. Loli nanti mutakubomba bunubu, namwe bulo mukwiza pakupalantiwa. 23Sona nanti aba Yuda baleka ukusita ukusubila kwabo, bakwiza pakunyokela mubuzilo bwabo bubo bakabamo pakuti u Chala ali na maka pakubamamatizya sona. 24Amwe mwe bantu babo bate ba Yuda muli ngati zyo samba izya ikwi ilya musyunguti uwa muzi lilyo lipalantiwe nukumamatiziwa kwikwi ilya musyunguti lilyo likabyaliwa. Aba Yuda bali ngati lyo likwi lilyo libyaliwe, po chikwiza pakuba chipepe nkani kwa Chala pakubamamatizya sona isamba kwikwi lilyo lyapalantiwa.

Nizya chisa icha Chala pabantu bosi

25Mwee bakamu bane, pano pali ubwanaloli bubo bufisiwe, bubo nkulonda ukuti amwe mubumanye pakuti chikwiza pakubapela ukuti mutakizimbulaye ukuti mwe bamahala. Ubukafu ubwa moyo agha ba Izilayeli bute bwa bwila na bwila, loli bukwiza pakubako mupaka abantu bosi babo bate ba Yuda bize kwa Chala. 26#Yes. 59.20Umu momumo aba Izilayeli bosi bakwiza pakupokeliwa. Pakuti Amasimbo ghakuti,

“Umupoki akwiza pakufuma mu Ziyoni

nu kwefya imbibi zyosi izya baluko ulwa Yakobo.

27 # Yel. 31.33-34 Ulu lo lufingo lwane lulo nkwiza pakufingana nabo

bo nkwefya imbibi zyabo.”

28Pachifukwa icha kughakana Amazyu Amiza, aba Yuda bakaba balwani ba Chala pachifukwa icha bantu babo bate ba Yuda. Loli pachifukwa ichakuti akabasala, ilelo baba bamanyani bache pachifukwa icha banyenya babo. 29Pakuti u Chala atakwandula inyinong'ono zyache pa muntu yuyo amusala nukumusaya. 30Ngati mumo amwe mwe bantu babo bate ba Yuda kale mutakamwivwila u Chala, loli ilelo mwapokela ichisa icha Chala pachifukwa ichakusita kwivwila kwa ba Yuda. 31Umwakuyana bulo, pachifukwa icha chisa chicho mukapokela, ilelo aba Yuda batakumwivwila u Chala, umwakuti ilelo bapokele ichisa icha Chala. 32Pakuti u Chala abapela abantu bosi pakuba bapinyiwa abasita ukwivwila, umwakuti alanjizye ichisa chache pa bosi.

Amapalo ghabanje kwa Chala

33 # Yes. 55.8 Mwee, bo bukabi boni ubwa Chala! Amahala ghache nu bumanyi bwache vyibizu nkani! Wewenu yuyo angalingannya ubulongi bwache? Nkimba wewenu angivwisya izila zyache? 34#Yes. 40.13Pakuti Amasimbo ghakuti,

“Nkimba wewenu azimenye inyinong'ono izya Mwene?

Pamo wewenu yuyo angamumanyisya amahala?

35 # Yob. 41.11 Nkimba wewenu amupiyepo lumo chimo

umwakuti u Chala amulipile papo?”

36 # 1 Kol. 8.6 Pakuti ivintu vyosi vikapeliwa nawe, sona vili nubumi ukwendela mumwache, sona ni chifukwa icha yuyo. Kwa Chala kubanje ubuchindamu ubwa bwila na bwila! Ameni.

Currently Selected:

Aba Loma 11: LMBNT2016

Highlight

Copy