Matayi 21
21
U Yesu akwinjila mu Yelusalemu nu bupoti
(Mlko. 11.1-11; Luk. 19.28-40; Yoh. 12.12-19)
1Bo u Yesu na bamanyili bache bapalamila ku Yelusalemu, bakafika mukaya aka Betifage pighamba ilya Misyunguti, kuko u Yesu akabatuma abamanyili bache babili. 2Akababuzya akati, “Bukagha mukaya kako kali kuntazi kwinyu. Bo mwinjila bulo mukwiza pakuyagha impunda bayipinyiliye poka nu mwana wache. Muzisatule nukwiza nazyo kuno. 3Nanti umuntu yumo akubalalusya mumubuzye ukuti, ‘U Mwene#21.3 u Mwene: Pamo abenecho. akuzilonda, loli akwiza pakuzinyosya lunulu.’ ”
4Zinizi zikabombiwa ukuti amazyu ghagho umulaghuzi akalaghula ghakwanilisiwe ukuti,
5 #
Zek. 9.9
“Buzya akaya akakulu nkani aka Ziyoni ukuti,
‘Ennya, u mwene wako akwiza kukwako.
Uwakwiyisya, sona akwelite pampunda,
pamwana uwa mpunda.’ ”
6Po abamanyili bakabuka nukubomba vivyo u Yesu akababuzya. 7Abamanyili bala bakiza ni mpunda poka nu mwana wache, bakatenga amenda panyuma izya mpunda zila, po u Yesu akikalapo. 8Abantu abinji bakatenga amenda ghabo mumusebo, sona abanji bakadumula isamba izya makwi nukuzitenga mumusebo. 9#Mas. 118.25, 26Abantu abinji babo bakaba kuntazi na kwisinda kwa Yesu bakanda pakukolomoka ukuti, “Apaliwanje u Mwana uwa Devedi! U Chala amusaye yuyo akwiza mwitabwa ilya Mwene! U Chala apaliwanje!”
10Bo u Yesu afika bulo mu Yelusalemu akaya kosi kakayingana. Abantu bakalalusya bakati, “Nkimba we wenu umuntu yunuyu?”
11Abantu muchilundilo bakamula bakati, “Uyu we u Yesu umulaghuzi, uwa mukaya aka Nazaleti muchigaba icha Galileya.”
U Yesu mu Nyumba iya Chala
(Mlko. 11.15-19; Luk. 19.45-48; Yoh. 2.13-22)
12U Yesu akinjila mu Nyumba iya Chala nukwanda pakubachimbizyamo abantu bosi babo bakaghulagha nu kughulizya. Akaghalabulannya ututalati utwa baghulizannya indalama ni vitengo ivya bantu babo bakaghulizya inkunda. 13#Mas. 56.7; Yel. 7.11Akababuzya ukuti, “Amasimbo ghakuti, ‘Inyumba yane yikwiza pakwitiziwa nyumba iyakwiputilamo.’ Loli amwe mukuyipela pakuba nyumba iyakuvwamilamo amavyondongo!”
14Abafwamaso na babo bafuye ivinama bakiza kukwache mu Nyumba iya Chala, po akabapozya. 15Abaputi abasongo na bamanyisi aba Ndaghilo bakakalala nkani bo bennya ivyakuswighizya nkani vivyo akabombagha, sona nukukolomoka kwa bana mu Nyumba iya Chala ukuti, “Apaliwanje u Mwana uwa Devedi!” 16#Mas. 8.2Po bakamulalusya u Yesu bakati, “Nkimba ukwivwa zizyo abana bakunena?” U Yesu akamula akati, “Ee, nkwivwa. Nkimba mutabelengitepo nalumolumo Amasimbo aghakuti, ‘Mwamanyizya abana na babonda pakubapala akiza.’ ”
17U Yesu akabaleka nukubuka kukaya akakulu nkani aka Betaniya, kuko akikala ubusiku bunubu.
U Yesu akuchighuna ichikuyu
(Mlko. 11.12-14, 20-24)
18Indabi yache pandabindabi nkani bo u Yesu akunyokela mukaya akakulu nkani kala, izala yikamulema. 19Akachennya ichikuyu mulubazu mumusebo nukubuka palapala, atakavyaghamo ivikomwa ivya makuyu, loli amani ghene. Po akachibuzya ichikuyu chila akati, “Wee chikuyu, ute ukele sona nalumo ivikomwa!” Panapo na panapo ichikuyu chila chikuma.
20Bo abamanyili bennya zinizi, bakaswigha nkani nukumulalusya u Yesu ukuti, “Nkimba ichikuyu chinichi chumiye buli-buli umwalubilolubilo?”
21 #
Mat. 17.20; 1 Kol. 13.2 U Yesu akamula akati, “Naloli inkubabuzya ukuti nanti mukusubila nukusita ukwilamwa mukwiza pakubomba vivyo nachibombela ichikuyu chinichi. Sona chite cho chinichi chene loli mungalibuzya ighamba ili ukuti, ‘Nyamuka bukagha nukwisumba munyanja.’ Po ichi chikwiza pakubombiwa. 22Nanti mukusubila, mukwiza pakupokela chosi chicho mukulaba munyiputo.”
Ilaluzyo nizya bulaghili ubwa Yesu
(Mlko. 11.27-33; Luk. 20.1-8)
23U Yesu akanyokela mu Nyumba iya Chala, po bo akumanyizya, abaputi abasongo na balongozi aba Chiyuda bakiza kukwache nukumulalusya ukuti, “Nkimba bulaghili boni bubo uli nabo pakubomba zinizi? Nkimba we wenu akakupa ubulaghili bunubu?”
24U Yesu akabamula akati, “Leka imbalalusye ilalusyo lyoka bulo, po nanti mwanyamula, inkwiza pakubabuzya ubulaghili bubo indi nabo pakubomba zinizi. 25Nkimba ubulaghili bubo u Yohani akozezya nabo bukafuma kwiyi, Kwa Chala pamo ku bantu?” Bakanda pakudalinkana benebene ukuti, “Nkimba tunganena ichoni? Nanti tukuti bukafuma kwa Chala akwiza pakunena ukuti, ‘Choni chicho mutakamusubilagha u Yohani?’ 26Loli nanti tukuti, ‘Bukafuma ku bantu’ tukunyila zizyo abantu bangabomba pakuti bosi bazimenye ukuti u Yohani akaba mulaghuzi.” 27Po bakamwamula u Yesu bakati, “Awe, tutazimenye.” Po u Yesu akababuzya akati, “Nane bulo ntakwiza pakubabuzya ubulaghili bubo indi nabo ubwakubombela zinizi.”
Ichili icha bana babili
28“Losi ulu mukwinong'ona ichoni? Pakabapo umuntu yumo yuyo akaba na bana abalumendo babili. Akabuka ku mwana wache usongo nukumubuzya ukuti, ‘Mwana wane, ilelo bukagha ku mughunda uwa mampesya pakubomba.’ 29Umwana yula akamula akati, ‘Tata, ntakulonda.’ Loli pisinda pache akabuka. 30Po uwise yula akabuka ku mwana wache umunandi nukunena ngati mumo akanenela kwa songo. Umwana yula akamula akati, ‘Tata, nkubuka.’ Loli atakabukako. 31Pa bana babili aba, nkimba we wenu akabomba chicho uwise akalondagha?”
Bakamula bakati, “Usongo yula.”
Po u Yesu akababuzya akati, “Naloli inkubabuzya ukuti abasonkezya sonko na bamalaya bakubachila pakwinjila mu Bumwene ubwa Chala. 32#Luk. 3.12, 7.29-30Pakuti u Yohani Uwalozyo akiza kukwinyu pakubalanjizya izila inyiza, amwe mutakamusubila; loli abasonkezya sonko na bamalaya bakamusubila. Napapo bo mwennya vinivi, mutakapindula inyinong'ono zyinyu nukumusubila.”
Ichili icha balimi mumughunda uwa mampesya
(Mlko. 12.1-12; Luk. 20.9-19)
33 #
Yes. 5.1-2
U Yesu akati, “Teghelezya ichili ichinji. Kukabako umuntu yumo yuyo akaba nu mughunda wache. Akabyalamo amampesya mumughunda ghula, akaghuzengelela ulupaso umwakughuzyungulila, akakumba ichiliba ichakukanyilamo amampesya nukuzenga ichitembe. Akabazimya abalimi abamwabo, po umwenecho akanyamuka nukubuka kuchisu ichinji. 34Bo akabalilo kakwana akakuyabila amampesya, umuntu yula akabatuma abambombo bache ku balimi bala pakumusendela amampesya ghache. 35Abalimi bala bakabalema abambombo bala, weka bakamukoma, uwamwabo bakamughogha nukumusumba uyunji na mabwe. 36Po umwenecho uwa mughunda yula akabatuma sona abambombo abanji ukuchila abakwanda bala, loli abalimi bala bakababombela sona bunubu. 37Pabumalilo akamutuma umwana wache nukuti, ‘Inzimenye ukuti bakwiza pakumuchindika umwana wane.’ 38Loli bo abalimi bala bamwennya umwana yula, bakanda pakunenezannya ukuti, ‘Yunuyu mwana wache, yuyo akwiza pakupyana ichilingo icha wise. Zagha tumughoghe umwakuti ichilingo chibanje chitu.’ 39Po bakamulema, bakamuwesela kuzi kwa mughunda uwa mampesya nukumughogha.”
40U Yesu akalalusya akati, “Bo umwenecho uwa mughunda iza, nkimba akwiza pakubomba ichoni nabo abalimi bala?”
41Bakamula bakati, “Bakwiza pakubaghogha abantu ababibi bala nukubazimya umughunda abalimi abanji, babo bakwiza pakumupa amampesya ghache pakabalilo akiza.”
42 #
Mas. 118.22-23
U Yesu akati, “Nkimba mutabelengite Amasimbo aghakuti,
‘Ibwe lilyo abazengi bakalikana ukuti lite ni mbombo,
ilelo lyaba lyakulondiwa nkani ukuchila amabwe ghosi.
Ichi chikabombiwa nu Mwene,
po chakuswighizya nkani kukwitu.’
43“Polelo inkubabuzya ukuti Ubumwene ubwa Chala bukwiza pakufyuliwa kukwinyu nukubapa abantu abanji, babo bangapa ivikomwa inyiza.”#21.43 Amasimbo ghamo aghakale ghonjelezya ivesi ilya 44: Nanti umuntu awila pibwe ili akwiza pakusanyantuka; loli nanti ibwe ili lyawila pa muntu, likwiza pakumusya (ennya mwa Luk. 20.18).
45Bo abaputi abasongo naba Falisayi bivwa ichili icha Yesu, bakazimanya ukuti akanenagha nizya babo. 46Po bakalondagha pakumulema, loli bakanyilagha abantu bala pakuti bakamusenda u Yesu pakuba mulaghuzi.
Currently Selected:
Matayi 21: LMBNT2016
Highlight
Share
Copy
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya