Yakobo 3
3
Nizya lulimi
1Mwee bakamu bane, mwebosi mutakabanje bamanyisi, pakuti muzimenye ukuti aswe twe bamanyisi twe tukwiza pakulongiwapo ukuchila abantu abanji. 2Pakuti twebosi tukupuvya muvintu ivyinji. Loli nanti umuntu yumo atakupuvya pazizyo akunena, kokuti umuntu yunuyu wakufikapo, sona amenye pakulaghila umubili wache ghosi.
3Tukubika akela mumulomo uwa falasi ukuti yitwivwilaye, sona tungayipetulila kosi kuko tukulonda pakubuka. 4Pamo mwinong'one nizya bwato ubukulu nkani pamizi mumo bubeleye, bukusunkiliwa ni mpepo iyamaka, bungapetuliwa nakannyengelo akanandi, nukubuka kosi kuko umwendezyi akulonda ukuti bubukaye. 5Umwakuyana bulo, ululimi ko kachigaba akanandi nkani aka mubili, loli lungitutumula nizya vintu ivikulu nkani.
Mwinong'one nizya kukula ukwa musitu, loli ghukochiwa na kampesese aka moto! 6Ululimi lope luli ngati gho moto, chicho chizuye nu bubibi pakasi pa vigaba ivya mubili. Lukunyazya inkalo yosi iya muntu, sona lukochannya ubumi bwache bosi numoto uwamu Gehena. 7Umuntu angateka ivinyamana ivyakulekanalekana, ni viyuni, na vyosi ivyakwavula, sona nivya munyanja, po naloli avitekite. 8Loli nayumo umuntu yuyo alutekitepo lumo ululimi. Ululimi lubibi, lutamenye ukutuzya, sona lwizuye ni vintu ivyakughogha ngati gho mwavi. 9#Ubw. 1.26Nu lulimi lunulu tukumupalizikizyapo u Mwene witu nu Tata, sona nu lulimi lulalula tukughunilapo abantu abanji, babo bapeliwe muchifwani icha Chala. 10Amazyu aghamapalo na mazyu aghanguno ghosi ghakufuma pa mulomo ghoka ghulaghula. Mwee bakamu bane, ichi chitakabombiwanje! 11Nkimba imbwibwi yingafumya amizi amiza na ghambeya pa mbwibwi yoka? 12Mwee bakamu bane, nkimba ikwi ilya ikuyu lingela isyunguti, pamo ulutabo ulwa mampesya lungela ivikomwa ivya makuyu? Nkimba imbwibwi iya mizi aghambeya yingafumya amizi amiza?
Amahala agha kumwanya
13Nkimba wewenu wamahala nu wakwivwisya mumwinyu? Muleke aghalanjizye ni nkalo yache inyiza, sona ni mbombo zyache izyakwiyisya zizyo zikufuma mumahala. 14Loli nanti mumoyo ghinyu muli na kabini nu bukali, sona nukwiyighana, mutakitutumulaye pachifukwa icha mahala ghinyu. Pakubomba bunubu kokuti mukubusula ubwanaloli. 15Amahala ghanagha ghatakufuma kumwanya, loli gha pachisu ichapasi. Amahala ghanagha gha buntu bulo, sona ghate gha muzimu uwa Chala, loli gha mizimu imibibi. 16Pakuti kuko kuli akabini nukwiyighana, ko kuko kuli sona ukuvulungana nu bubibi ubwakulekanalekana. 17Loli amahala agha kumwanya, ichakwanda mazelu, na ghamutende, na mololo, sona na ghabumanyani. Ghizuye nu lupazikizyo, sona imbombo zyache nyiza, ghatakwennya icheni, sona ghate mazimbuli, awe. 18Abantu abamutende babo bakapesa umutende, bakwiza pakwinula ivikomwa ivya bugholosu.
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya