Imbombo 24

U Pabuli pamaso pa Felikisi

1Bo ghachilapo amasiku fayivi, umuputi usongo u Ananiya akabuka ku Kesaliya na balongozi bamo aba Chiyuda, poka nu mwimilili panongwa yuyo akaba we Telitula. Bakiza pamaso pa Felikisi nukunena inongwa yiyo bakaba nayo pa Pabuli. 2Bo bamwitizya u Pabuli ukuti ime pantazi, po u Telitula akanda pakunena inongwa yache ngati lo ulu:

“We muchindikiwa! Pasi pabulongozi bwako tukaba mumutende akabalilo akatali, sona ivyinji ivyiza vikubombiwa muchisu chitu pachifukwa icha bulongozi bwako ubwamahala. 3Zinizi tukazipokela nu buhobosu nkani akabalilo kosi, sona posi na posi. 4Intakulonda pakukutaghila akabalilo kako, loli pope bulo nkukulaba ukuti utupelele ichisa nukuteghelezya zizyo tukulonda pakunena mubupimpa. 5Twamwagha umuntu uyu ukuti we ntamyo, yuyo akwandizya ivyongo pakasi paba Yuda pachisu chosi ichapasi, sona we mulongozi uwa kabukatila aka ba Nazalini. 6Sona akayezyanga pakuyinyazya Inyumba iya Chala, po tukamulema.#24.6: Amasimbo ghamo aghakale ghonjelezya: 6b-8a Tukabatika pakumulonga ukuyana ni Ndaghilo zyitu, 7 loli u Lisiyasi, usongo uwa basilikali akiza mubukalale nukumwefyapo kukwitu. 8 Po u Lisiyasi akalamula ukuti abanongwa bache bize pamaso papinyu. 8Nanti wamulalusya umuntu uyu, awe wemwene ukwiza pakumanya chicho anangite.” 9Aba Yuda bope bakinjililamo pakunena ukuti zyosi zinizi zikaba zyanaloli.

U Pabuli akunena amazyu aghakwipokela mwene pamaso pa Felikisi

10Umulaghili uwa chisu akamusinizya u Pabuli ukuti anene, po u Pabuli akati:

“Inzimenye ukuti ukaba mulongi uwa chisu ichi amaka aminji. Po nahoboka nkani ukuti niyimile nemwene pamaso papako. 11Awe wemwene ungamanya akiza nkani, ghatakachilapo na masiku 12, mumo nkabukila mu Yelusalemu pakwiputa. 12Abanongwa yane batakanyaghapo nkudalinkana nu muntu nayumoyumo mu Nyumba iya Chala, pamo ukwandizya ivyongo pakasi pabantu munyumba izyakwiputilamo, pamo pabuzilo nabumobumo mukaya aka. 13Polelo batangasimikizya ukuti zizyo bakunena zyanaloli. 14Loli ichintu chene chicho nkwitika chakuti nkumwiputa u Chala uwa banyenya bitu pakukonka Izila, yiyo bakunena ukuti yabumyasi. Nkusubila muvyosi vivyo visimbiwe mu Ndaghilo izya Mozesi, sona na mu mabuku agha balaghuzi. 15Nkusubila mwa Chala ukuyana bulo namumo abene bakusubila ukuti abantu bosi abagholosu na babibi bakwiza pakuzyuka kubufwe. 16Po akabalilo kosi nkuyezya pakubomba inyiza ukuti imbanje nu mabyebye umwiza pamaso pa Chala na bantu.

17 # Imbo. 21.17-28 “Bo nikala akabalilo akatali kuzi ukwa Yelusalemu, nkanyokela kulakula ukuti imbuke imbape ivyabupi abantu bane, sona nukuti imbike ivyakwiyipa. 18Akabalilo kako nkabombagha zinizi, bakanyagha mu Nyumba iya Chala, bo namalizya bulo pakubomba inyiho izyakwiswefya. Palapala patakabapo ichilundilo pamo ichongo. 19Loli aba Yuda bamo aba muchigaba icha Asiya babo bali pano, abene bizaye pantazi papako nukunena nanti bali ninongwa nane. 20Pamo leka abantu babo bali pano banene bene inongwa yiyo banyagha nayo, bo nimiliye pamaso pa balongi, 21#Imbo. 23.6loli ichintu chene chicho nkananga chingaba chakuti, bo nimiliye pamaso papabo nkakolomoka nkani ukuti, ‘Nkulongiwa namwe ilelo pachifukwa ichakuti nkusubila ukuti abantu abafwe bakwiza pakuzyuka kubufwe.’ ”

22Po u Felikisi, yuyo akazimanya akiza nkani izya Zila iya Mwene, akayimika inongwa nukuti, “Bo u Lisiyasi, usongo uwa basilikali afika, nkwiza pakudumula inongwa yako.” 23Akamulamula usongo uwa basilikali yuyo akamwenelezyanga u Pabuli ukuti amwenelezyanje, loli utubalilo tumo amupanjeko ubusatuke nukubitikizya abamanyani bache ukuti bamupe ivyakusobelwa vyache.

U Pabuli pamaso pa Felikisi nu Dulusila

24Bo ghachilapo amasiku ghamo u Felikisi akiza nu muchi wache u Dulusila yuyo akaba mu Yuda. Akamwitizya u Pabuli nukumuteghelezya, bo akunena izya lwitiko mwa Kilisitu Yesu. 25Bo u Pabuli akunena nizya bugholosu, nizya kwilema, sona nizya Isiku lilyo u Chala akwiza pakubalonga abantu, u Felikisi akaba nubogha nukumubuzya ukuti, “Ungabuka losi ulu. Nkwiza pakukwitizya sona nanti nakagha akabalilo.” 26Pakabalilo kanako akinong'ona ukuti u Pabuli akwiza pakumubeka ni ndalama, cho chifukwa akamwitizyanga kabilikabili.

27Bo ghachilapo amaka mabili, u Polokiyo Fesita akapyana pa Felikisi ngati we mulaghili uwa chisu. U Felikisi akalondagha pakubahobosya aba Yuda, po akamuleka u Pabuli mujele.

Currently Selected:

Imbombo 24: LMBNT2016

Highlight

Copy