Imbombo 17

Nizya mukaya akakulu nkani aka Tesalonika

1U Pabuli nu Sila bakadumusannya mukaya aka Amfipoli naka Apoloniya nukufika mukaya aka Tesalonika, kuko kukaba inyumba iyakwiputilamo. 2U Pabuli akinjila munyumba iyakwiputilamo, ukuyana namumo akizubilila. Mumasiku matatu Aghakutuzya akanenezannyanga na bantu, pakubelenga nukubalingannya Amasimbo, 3nukusimikizya ukuti Umupoki umusaliwa yula abaghiye pakuyimba nkani nukuzyuka kubufwe. U Pabuli akati, “U Yesu yunuyu yuyo nkulumbilila pakasi papinyu, we Kilisitu.” 4Bamo bakapepekiwa nukumukonka u Pabuli nu Sila. Abakolo abinji babo bakaba bamanyikwe, poka na kabukatila akakulu aka Chigiliki, kako kakamwiputagha u Chala.

5Loli aba Yuda bamo bakaba na kabini nukubungannya amalovwa muminalo nukupanga akabukatila, po bakandizya ivyongo mukaya akakulu nkani kosi kala. Bakachimbilila kunyumba iya Yasoni, ukwinong'ona ukuti pamo ko kuko bangamwagha u Pabuli nu Sila ukuti babafumizizye ku chilundilo icha bantu. 6Loli bo bapotwa pakubagha, bakamuwesela u Yasoni, poka na bitiki bamo pamaso pa balaghili aba mukaya akakulu nkani kala nukukolomoka bakati, “Abantu aba bandizya ivyongo kosi na kosi! Ilelo biza muno mukaya kitu. 7Po u Yasoni akubasunga munyumba yache. Bosi bali pakunangannya amalamulo agha Kesale, pakunena ukuti kuli u Mwene uyunji yuyo itabwa lyache we Yesu.” 8Na mazyu ghanagha bakandizya ivyongo pakasi pachilundilo icha bantu, poka na balaghili aba mukaya akakulu nkani kala. 9Abalaghili bakamulipisya u Yasoni na banji indalama ukuti babasatule, po bakasatuliwa nukubuka.

Nizya mukaya akakulu nkani aka Beleya

10Bo kwila bulo, abitiki bakamutuma u Pabuli nu Sila ku Beleya. Bo bafika bakinjila munyumba iyakwiputilamo. 11Mulamula abantu bakaba nu moyo uwakulonda pakumanyila ukuchila abantu aba mu Tesalonika. Bakapokela amazya agha Chala nu buhobosu, po isiku ni siku bakamanyila mu Masimbo ukuti basimikizye nanti zizyo u Pabuli akanenagha zikaba zyanaloli. 12Aba Yuda abinji bakasubila; bope na bakolo abinji abamanyikwe aba Chigiliki, poka na banavuli abinji bakasubila. 13Loli bo aba Yuda aba mukaya aka Tesalonika bivwa ukuti u Pabuli akalumbilila amazyu agha Chala na mukaya aka Beleya bulo, bakiza kulakula nukwanda pakusonjelezya nukwandizya ivyongo pakasi pachilundilo icha bantu. 14Panapo na panapo abitiki bakamutuma u Pabuli piloboko ilya nyanja; loli u Sila nu Timoti bakasyalikila mukaya kalakala aka Beleya. 15Abantu babo bakamusindikilagha u Pabuli bakabuka nawe mupaka mukaya akakulu nkani aka Ateni, po bakanyokela mu Beleya na mazyu aghakufuma kwa Pabuli ukuti u Sila nu Timoti bamukonke losi ulu.

Nizya mukaya akakulu nkani aka Ateni

16Bo u Pabuli akumulindilila u Sila mu Ateni, akakalala nkani, bo azyaghannya ukuti akaya akakulu nkani kosi kala kizuye ni vifwani. 17Po akanenezannya naba Yuda munyumba iyakwiputilamo, poka na bantu babo bate ba Yuda babo bakamwiputagha u Chala, akanenezannyanga sona na bantu abanji babo bakaghiwanga pamunalo isiku ni siku. 18Abamanyisi bamo aba mukabukatila aka Epikuliya nu Sitoyiki bakadalinkana nawe. Bamo bakalalusya bakati, “Nkimba umupunganu uwakunena mwalwemwalwe uyu akulonda pakunena choni?”

Abanji bakamula bakati, “Akuboneka ngati po akulumbilila izya abachala abayeni.” Bakanena izi pakuti u Pabuli akalumbililagha nizya Yesu, sona nizya kuzyuka kubufwe. 19Po bakamusenda u Pabuli nukwiza nawe kubuzilo ubwakulongelako inongwa bubo bukwitiziwanga ukuti Eleyopaga nukuti, “Tukulonda ukuti utumanyisyepo ichimanyisyo ichipya chicho uli pakumanyisya. 20Ivintu vimo vivyo tukwivwa ukunena vikwivwika viyeni kukwitu. Po tukulonda ukuti tumanye ukuti ivintu ivi vikung'anamula ichoni.” 21(Pakuti abantu bosi aba mu Ateni na bayeni babo bakikalagha mulamula batakaba na kabalilo akakubombela izinji, loli kwene ukunena nukuteghelezya ivintu ivipya.)

22U Pabuli akimilila kuntazi kubuzilo ubwakulongelako inongwa bubo bukwitiziwanga ukuti Eleyopaga nukuti, “Nkwennya ukuti amwe mwe bantu aba mu Ateni, mwe bantu bakumwiputa nkani u Chala. 23Pakuti bo nkwendakwenda mukaya kinyu akakulu nkani aka nukwennya mubuzilo bwinyu ubwakwiputilamo, nkachagha ichighemo chicho pakasimbiwapo ukuti, ‘Kwa Chala umusita kumanyikwa.’ Po yuyo mukumwiputa ukusita ukumumanya, weyuyo ilelo nkulumbilila kukwinyu. 24#1 Abm. 8.27; Yes. 42.5; Imbo. 7.48U Chala yuyo akapela ichisu na vyosi vivyo vili mumo, we Mwene uwakumwanya ni chisu ichapasi, sona atakwikala munyumba izyakwiputilamo, zizyo zizengiwe ni nyobe izya bantu. 25Sona atakulonda ubwavwilizi ubwa muntu, pachifukwa ichakuti umwene atakusobelwa nachimochimo. Pakuti umwene weyuyo akubapa abantu ubumi nu muyi, sona ni vinji vyosi. 26Mu munyenya weka u Chala akapela inko izya bantu ukuti bikalaye pachisu chosi ichapasi. Umwene akabikila zila akabalilo akakwikalila, sona ni mpaka zyabo. 27U Chala akabomba zinizi ukuti abantu bangamulonda nukumwagha kuko ali. Loli u Chala ate kubutali naswe; 28ukuyana namumo yumo akunenela ukuti,

‘Mumwache, tuli nubumi,

tukwenda, sona tuliko.’

Ziyanite bulo namumo abakwata inyimbo binyu bamo bakanenela ukuti,

‘Naswe bulo twe bana bache.’

29“Pakuti twe bana aba Chala, tutakinong'onaye ukuti u Chala ayanite ni chifwani icha golide, pamo icha siliva, pamo icha ibwe, chicho chikabiziwa akiza na mahala agha muntu. 30Akabalilo kako abantu bakaba batighukite u Chala akabalekelela, loli ilelo akubalamula abantu bosi kosi kuko bali ukuti bapinduke nukuzileka imbibi zyabo. 31Pakuti abikite isiku lyoka lilyo akwiza pakubalonga abantu bosi aba muchisu ichapasi mubwanaloli ukwendela mu Muntu yuyo amusalite. Abasimikizizya zinizi abantu bosi pakumuzyusya u Muntu yula kubufwe!”

32Bo bivwa u Pabuli akunena nizya kuzyuka kubufwe, bamo bakazisenda ngati po zyalwangalo, loli abanji bakati, “Tukulonda tukwivwe ukunena sona nizya zinizi.” 33Po u Pabuli akepapo palukomano lulalula. 34Abantu bamo bakamukonka nukusubila. Uwabamo akaba we Diyonisiya, weka uwa kubuzilo ubwakulongelako inongwa bubo bukwitiziwanga ukuti Eleyopaga. Pakabapo sona umukolo yumo yuyo itabwa lyache akaba we Damalisi, sona na bantu abanji.

Currently Selected:

Imbombo 17: LMBNT2016

Highlight

Copy