Imbombo 15

Ulukomano mu Yelusalemu

1 # Lev. 12.3 Abantu bamo babo bakafuma muchigaba icha Yudeya bakabuka ku Antiyokiya nukwanda pakubamanyisya abitiki ukuti, “Mutangapokiwa pene papo mwasilimuliwa ukuyana ni Ndaghilo izya Mozesi.” 2U Pabuli nu Balanabasi bakanda pakudalinkana nabo nkani nizya fundo iyi. Po kukadumuliwa ukuti u Pabuli nu Balanabasi na bamwabo bamo aba mu Antiyokiya babukaye ku Yelusalemu nukunenezannya na batumiwa poka na basongo aba chipanga nizya fundo iyi.

3Bakatumiwa ni chipanga, po bo bakwenda muchigaba icha Fonike, na mu Samaliya, bakabalingannya abantu mumo bantu babo bate ba Yuda bakapindukila kwa Chala; amazyu agha ghakabapa ubuhobosu ubukulu abitiki bosi. 4Bo bafika mu Yelusalemu, bakapokeleliwa ni chipanga, na batumiwa, sona na basongo aba chipanga nukubabuzya zyosi zizyo u Chala akabomba ukwendela mumwabo. 5Loli abitiki bamo babo bakaba aba mukabukatila aka ba Falisayi bakimilila nukuti, “Abantu babo bate ba Yuda basilimuliwanje nukubabuzya ukuti bakonkaye Indaghilo izya Mozesi.”

6Abatumiwa na basongo aba chipanga bakakomana poka ukuti banenezannye nizya fundo yila. 7#Imbo. 10.1-43Bo banenezannya akabalilo akatali, u Pitala akimilila nukuti, “Mwee bakamu bane, muzimenye ukuti kale u Chala akansala mumwinyu ukuti indumbilile Amazyu Amiza pakasi pabantu babo bate ba Yuda ukuti bivwe nukusubila. 8#Imbo. 2.4, 10.44U Chala yuyo aghumenye umoyo uwa muntu wesi, akasimikizya kukwabo pakubapa u Muzimu Umuzelu ukuyana namumo akatupelela aswe. 9U Chala atakatulekannya nabo; akabahobokela imbibi zyabo, pachifukwa ichakuti bakasubila. 10Po choni chicho mukulonda pakumuyela u Chala pakubapinyilila ikoli musingo abamanyili, lilyo abanyenya bitu pamo aswe twebene tukapotwa pakulinyamula? 11Awe! Tukusubila ukuti tukwiza pakupokiwa ukwendela muchisa icha Mwene u Yesu ukuyana namumo abantu babo bate ba Yuda bakwiza pakupokeliwa.”

12Ichilundilo chosi chikaba myee, bo chikuteghelezya zizyo u Balanabasi nu Pabuli bakubalingannyanga nizya vyika ni viswigho vyosi vivyo u Chala akabomba pakasi pabantu babo bate ba Yuda ukwendela mumwabo. 13Bo bamala pakunena, u Yakobo akati, “Mwee bakamu bane, munteghelezye! 14U Simoni alingannya bulo mumo u Chala akabasungilila abantu babo bate ba Yuda pakubapaghula abantu bamo mumwabo ukuti babanje bantu bache. 15Zinizi zikwitikizannya na mazyu agha balaghuzi. Pakuti Amasimbo ghakuti,

16 # Amo. 9.11-12 ‘U Mwene akati:

Pisinda pazinizi nkwiza pakunyokela nukunyosezyamo,

ubumwene ubwa Devedi, bubo bukawa.

Nkwiza pakuzenga sona ichisami chache

nukuchiyannya pakuba sona chamaka nkani.

17Abantu abakusyala bosi bakwiza pakundonda,

sona na bantu bosi babo bate ba Yuda bakwitiziwa ni tabwa lyane.

18Po u Mwene akunena bunubu,

yuyo akavumbula ivintu vinivi kale.’

19“Cho chifukwa nkuti tutakabatamyanje abantu babo bate ba Yuda babo bakupindukila kwa Chala. 20#Ukf. 34.15-17; Lev. 17.10-16, 18.6-23Loli tubasimbile ukalata uwakuti batakalyanje ivyakulya vivyo vinyazu pachifukwa ichakuti vyabikiwa ku vifwani ukuti chibanje chakwiyipa; ukuti batakabombaye ubwamalaya, ukuti batakalyanje ichinyamana chicho chanyongiwa bulo, sona batakalyanje ibanda. 21Pakuti Indaghilo izya Mozesi zyabelengiwa akabalilo akatali munyumba izyakwiputilamo Isiku ni siku Ilyakutuzya, sona amazyu ghache ghope ghalumbililiwe muvyisu vyosi.”

Abantu babo bate ba Yuda babasimbila ukalata

22Po abatumiwa, na basongo aba chipanga, poka ni chipanga chosi, bakinong'ona pakusala abantu bamo mukabukatila kabo nukubatuma ku Antiyokiya poka nu Pabuli nu Balanabasi. Bakasala u Yudasi yuyo akwitiziwa ukuti we Balasabasi nu Sila babo bakaba bakuchindikiwa nkani na bitiki, 23nukubatuma nu kalata uyu:

“Aswe, twe batumiwa poka na basongo aba chipanga, abakamu binyu, tukubalamuka amwe mwe bakamu bitu, bantu babo bate ba Yuda mwebosi, babo bakwikala mu Antiyokiya, Siliya na mu Kilikiya. 24Twivwa ukuti abantu bamo aba mukabukatila kitu bakabatamya nukubavulungannya amwe pavintu vivyo bakanena. Loli tute sweswe tukabatuma ukuti babombe bunubu. 25Po tukakomana poka nukwivwana pakusala abantu bamo nukubatuma kukwinyu. Bakwiza poka na bamanyani bitu abaghaniwa u Balanabasi nu Pabuli, 26babo bakabika ubumi bwabo pachulu pachifukwa icha mbombo iya Mwene witu u Yesu Kilisitu. 27Po tukubatumila amwe u Yudasi nu Sila, babo bakwiza pakubabuzya pamaso na pamaso zizyo twasimba mukalata uyu. 28U Muzimu Umuzelu, sona naswe twivwana ukuti tutakabanyamulizye ukatundu uyunji ukuchila pandaghilo zizyo zikulondiwa izyakuti: 29Mutakalyanje ichakulya chicho chibikiwe ku vifwani ukuti chibanje chakwiyipa; mutakalyanje ibanda, mutakalyanje ichinyamana chicho chanyongiwa bulo, sona mutakalowaye. Mukwiza pakubomba akiza nanti mukuvileghuka ivintu vinivi. Musyale akiza.”

30Abantu babo bakatumiwa, bakafika mu Antiyokiya. Kulakula bakachibungannya poka ichipanga chosi nukubapa ukalata yula. 31Bo abantu babelenga ukalata yula, bakahoboka na mazyu agha lukazyo ghala. 32U Yudasi nu Sila, babo bakaba balaghuzi, bakanena nabo mazyu aminji agha lukazyo nukubapa amaka. 33Bo bikalako amasiku aminji kulakula, abantu bala bakabanyosya mumutende ku bantu babo bakabatuma.#15.33: Amasimbo ghamo aghakale ghonjelezya: 34 Loli u Sila akadumula pakwikala kulakula.

35U Pabuli nu Balanabasi bakendelela pakwikala mu Antiyokiya ukumanyisya nukulumbilila amazyu agha Mwene, poka na bawamwabo abanji abinji.

U Pabuli nu Balanabasi bapaghunkana

36Bo ghachilapo amasiku amanandi u Pabuli akamubuzya u Balanabasi akati, “Zagha tunyokele nukubendela abakamu bitu mukaya kosi akakulu kako tukalumbililamo amazyu agha Mwene, sona twennye mumo bakwikalila.” 37U Balanabasi akalondagha ukuti u Yohani Maliko abuke poka nabo, 38#Imbo. 13.13loli u Pabuli akinong'ona ukuti chitangaba chizapo pakumusenda pachifukwa ichakuti akabatoloka mu Pamfiliya, sona atakendelela pakubomba nabo imbombo yabo. 39Po bakadalinkana nkani, umwakuti bakapaghunkana: U Balanabasi nu Maliko bakakwela mubwato nukubuka ku Sayipulasi. 40Loli umwene Pabuli akasala u Sila. Bo abitiki bababika munyobe izya Mwene, bakabuka. 41Akadumusannya mu Siliya na mu Kilikiya pakuvikazya ivipanga.

Currently Selected:

Imbombo 15: LMBNT2016

Highlight

Copy