Imbombo 12

U Helodi akuchivwima ichipanga

1Akabalilo ngati ko kanaka u Mwene u Helodi#12.1 U Mwene u Helodi: Helodi Agilipa uwakwanda, umulaghili uwa chosi icha Palesitina. akanda pakuchivwima ichipanga. 2Akalamula ukuti u Yakobo uwamwabo uwa Yohani aghoghiwe nupanga. 3Bo ennya ukuti ichi chabahobosya nkani aba Yuda, akamupinya u Pitala (Ichi chikabombiwa pa Lusekelo ulwa Chibama chicho chite ni chilungo.) 4#Ukf. 12.1-27Bo amupinya u Pitala, akamwighalila mujele, mumo akabikiwa munyobe izya tubukatila folo utwa basilikali ukuti bamwenelezyanje. U Helodi akalondagha ukuti inongwa yache yilongiwe bo Ulusekelo ulwa Pasa lwachila. 5Po u Pitala akasungiwa mujele, loli ichipanga chikamwiputilagha nkani kwa Chala.

U Pitala asatuliwa mujele

6Bukaba ubusiku ubwakuti u Helodi alonge inongwa yache, u Pitala akaghona utulo pakasi pabasilikali babili bala. Akapinyiwa ni mpingu zibili, sona pamulyango uwa jele pakaba abasilikali. 7Umwakuchenusya uwantumi uwakumwanya uwa Mwene akimilila palapala, ulukozyo lukalama mujele mula. Uwantumi yula akamuyingannya u Pitala pachipunko, akamunyamusya nukuti, “Lubilolubilo! Nyamuka!” Panapo na panapo impingu zikawa munyobe izya Pitala. 8Po uwantumi yula akati, “Pinya ulamba wako nukuvwala inkwato zyako. U Pitala akabomba zizyo akamubuzya.” Po uwantumi akati, “Vwala inkazo yako nukunkonka.” 9U Pitala akamukonka ukufuma mo mujele mula. Loli atakazyaghannya zizyo uwantumi akabombagha nanti zikaba zyanaloli. Akinong'onagha ukuti akwennya ichisetuka. 10Bakakachila akabukatila akakwanda aka basilikali, nukupululila sona akabukatila akabubili mupaka pamulyango uwa chela uwakwinjilila mukaya kala. Umulyango ghula ghukighuka wene, po abene bakafuma kuzi nukwenda mupaka mumusebo ghumo uwa kaya kalakala. Umwakuchenusya uwantumi yula akamuleka u Pitala.

11Po u Pitala akazyaghannya zizyo zikabombiwa kukwache nukuti, “Ilelo nazimanya ukuti zyanaloli! U Mwene akatuma uwantumi wache ukuti ize ampoke kwa Helodi na vyosi vivyo aba Yuda bakinong'onagha ukuti vikwiza pakubombiwa kukwane.”

12Bo azyaghannya zinizi, akabuka kunyumba iya Maliya, unyina uwa Yohani Maliko, kuko abantu abinji bakabungana, sona bakiputagha. 13U Pitala akakong'osya pamulyango uwakuzi, po uwambombo umulindu yuyo akaba we Loda akiza pakumwighulila. 14Bo aghamanya amazyu agha Pitala akahoboka nkani, umwakuti atakighula nu lwiyi, loli akachimbilila mukasi nukubabuzya abamwabo ukuti, “U Pitala imiliye kuzi.”

15Bakamubuzya u Loda bakati, “Upenite bati!” Loli akendelela pakunena ukuti zikaba zyanaloli. Po bakamula bakati, “Wantumi wache!”

16Loli u Pitala akendelela pakukong'osya. Pabumalilo bakighula ulwiyi, po bo bamwennya chikabaswighisya nkani. 17Akapumizya ichongo ni nyobe nukwanda pakubalingannya mumo u Mwene amwefezizye mujele. Akanena sona akati, “Mumubuzye zinizi u Yakobo, sona na bitiki bosi.” Po akanyamuka nukubuka kubuzilo ubunji.

18Bo kwacha, kukaba ukuvulungana ukukulu nkani mu basilikali nukulalusannya benebene ukuti, “Nkimba cho choni chicho chabombiwa kwa Pitala?” 19U Helodi akalamula ukuti bamulondelezye, loli batakamwagha. Po abalindilili bakalalusiwa na malalusyo nukulamuliwa ukuti abene bo babo baghoghiwe.

Pisinda pazinizi, u Helodi akepamo muchigaba icha Yudeya nukubuka mu Kesaliya pakwikala.

Ubufwe ubwa Helodi

20U Helodi akakalala nkani na bantu aba mu Tile nu Sidoni. Po abantu bakabuka pakabukatila pakumulamuka. Ichakwanda bakamudeba u Bulasita, usongo uwa kunyumba iya bumwene, ukuti abavwe. Po bakabuka kwa Helodi pakulaba umutende pakuti ichakulya chabo chikafumagha kuchisu icha mwene yulayula.

21Pisiku lilyo bakasala, u Helodi akavwala inkazo yache iya bumwene, akikala pachitengo chache icha bumwene nukunena na bantu. 22Abantu bakakolomoka nkani bakati, “Yuyo akunena, ate muntu, loli we chala!” 23Panapo na panapo uwantumi uwa Mwene akamukoma u Helodi pakuti atakamuchindika u Chala. Isomi zikamulya nukufwa.

24Loli amazyu agha Chala ghakendelela pakufumusiwa.

25Bo u Balanabasi nu Sabuli bamala imbombo yabo yiyo bakabatumila mu Yelusalemu bakanyokela mu Antiyokiya, sona bakamusenda u Yohani Maliko.

Currently Selected:

Imbombo 12: LMBNT2016

Highlight

Copy