1 Aba Tesalonika 2
2
Nizya mbombo iya Pabuli mu Tesalonika
1Mwee bakamu bane, muzimenye ukuti ubulendo bwitu kukwinyu butakaba bwapabulo. 2#Imbo. 16.19-24, 17.1-9Muzimenye namumo tukayimbila nukusamuliwa mu Filipi. Loli pakuti u Chala akatwavwa, tukajimba nkani pakulumbilila Amazyu ghache Amiza, napapo kukabako ukususyiwa ukukulu nkani. 3Pakuti ukulaba kwitu kutimite pabumyasi, pamo pa nyinong'ono imbibi, pamo pakulonda pakubazimbula abantu, awe. 4Loli tukunena ngati twe bantu babo bitikiziwe nu Chala ukuti balumbilile Amazyu Amiza. Po bo tukulumbilila tutakulonda pakuhobosya abantu, awe, loli pakumuhobosya u Chala, yuyo azimenye inyinong'ono zyitu. 5Muzimenye akiza nkani ukuti tutakiza kukwinyu ni sunga, pamo nu moyo uwakukabilapo, awe. U Chala we kaboni witu! 6Tutakalondagha amapalo agha bantu, pamo aghinyu, pamo agha muntu uyunji bulo. 7Napapo twe batumiwa aba Kilisitu, aswe tukabaghila pakupokela vimo ivintu ukufuma kukwinyu, loli tukaba bololo kukwinyu ukuyana namumo umayi akubasungila abana bache. 8Tukabaghana nkani umwakuti tukahoboka pakugabana namwe, ghate Mazyu Amiza ghene agha Chala, awe, loli nubumi bwitu bulo, pakuti mukaba mwe ba pamoyo ghitu. 9Mwee bakamu bane, naloli mukukumbuka namumo tukiyulila. Tukabomba imbombo umusanya nu busiku, umwakuti tutakabatamye, bo tukulumbilila kukwinyu Amazyu Amiza agha Chala.
10Amwe mwe bakaboni bitu, sona nu Chala wepe, we kaboni witu ukuti inkalo yitu kukwinyu mwe bitiki yikaba nzelu, yikaba ngolosu, sona yitakaba ni chilema nachimochimo. 11Pakuti muzimenye ukuti tukamusunga akiza umuntu wesi uwa amwe ukuyana bulo namumo uwise akasungila abana bache. 12Tukabakazya umoyo nukubapumizya, sona tukendelela pakubalaba ukuti mwikalaye nubumi ubwa kumuhobosya u Chala, yuyo akubitizya amwe ukuti mugabane nawe Ubumwene, sona nu buchindamu bwache.
13Chilipo sona ichifukwa ichinji chicho tukwendelela pakumupalizya u Chala. Bo mwapokela amazyu ghache ghagho mukivwa kukwitu, mutakaghitika ngati gho mazyu agha bantu, loli mukaghitika ukuyana namumo ghabeleye bulo, amazyu agha Chala. Amazyu ghanagha ghali pambombo mumwinyu amwe mwe mukusubila. 14#Imbo. 17.5Mwee bakamu bane, zizyo zikabawila amwe zyo zizyo zikawila ivipanga ivya Chala ivya mu Yudeya, babo bantu aba Kilisitu u Yesu. Abantu aba muchisu chinyu bakabayivya nkani ukuyana namumo aba Yuda bakabayivizya abakilisitu aba mu Yudeya. 15#Imbo. 9.23, 29, 13.45, 50, 14.2, 5, 19, 17.5, 13, 18.12Aba Yuda balabala bakamughogha u Mwene u Yesu, poka na balaghuzi, sona nukutuvwima aswe. Abene batakumuhobosya u Chala, sona balwani aba bantu bosi. 16Bakayezya pakutuzigha ukuti tuleke pakulumbilila amazyu pakasi pabantu babo bate ba Yuda umwakuti bangapokiwa. Bunubu akabalilo kosi biyonjelezyanga bulo imbibi zyabo, umwakuti ubukali ubwa Chala bwabawila.
U Pabuli akulonda sona pakubendela Aba Tesalonika
17Mwee bakamu bane, bo twalekana namwe pakabalilo akapimpa bulo, te mo munyinong'ono awe, loli mumubili wene nukuba ngati twe balanda, tukabasamba nkani, sona tukayezya nkani ukuti twenannye amaso na amaso. 18Cho chifukwa tukalondagha ukwiza sona kukwinyu. Nkaninkani ane ne Pabuli nkayezyayezya akinji bulo, loli u Satana akatuzigha izila. 19Pakuti nayumo umuntu, loli mwemwe mwebene, babo bakwiza pakuba lusubilo lwitu nu buhobosu bwitu, sona ni mpumpu yitu iyakulanjizya ubupoti bwitu pamaso pa Mwene witu u Yesu, bo akwiza sona. 20Naloli, amwe mwe buchindamu bwitu, sona mwe buhobosu bwitu.
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya