Zakaráya 2
2
Ọwhulenya Zakaráya whụru l'ẹhu nwoke, gude eri l'eegudeje atụ iwhe atụtu
1Mu bya apalia ẹnya whụ nwoke ọbu; iwhe ọ chị l'ẹka bụru eri, l'eegudeje atụ iwhe atụtu. 2Mu jịa ya sụ: “?Ọo awe bẹ l'iije?”
Ọ sụ mu: “Mu l'ejekwa tẹ mu tụa iwhe lẹ Jerúsalẹmu marụ g'uswe iya yẹle ogologo iya hatabe.”
3Ojozhi-imigwe ono, shi ekfu eyeru mu bya atụgburu lụfu; Ojozhi-imigwe ọdo jekfu iya 4je asụ iya: “Gude ntụtu ọso gbakfu nwokorọbya ono, chị eri ono, l'eegudeje atụ iwhe atụtu ono je asụ iya lẹ Jerúsalẹmu bẹ l'e-megekwaa bụru obodo igweligwe madzụ mẹe élwù l'e-buru atsụ iya rụkfurukfu, nke ọwhu bụ lẹ mgbodo, a tụ-wheru iya mgburumgburu bẹ l'ee-nwukafu enwukafu. 5Onye-Nwe-Ọha l'onwiya l'a-bụ ọku kpụa g'ọo mgbodo nọ-whee mkpụkpu ono mgburumgburu gude gbochita iya, ya anọdu l'ime iya egbu zaazaa.” O nokwa iwhe Onye-Nwe-Ọha l'ekfu ndono.
Ndu a kpụru lẹ ndzụ b'e kuwhuru azụ tẹ whẹ lwa
6Onye-Nwe-Ọha l'ekfu sụ: “Shẹe! Shẹe! Unu gbafụta l'alị ndu ụzo isheli ono, unu je anọdu ono, mbụ ẹka ono mu chịkashiru unu dobe unu tụko ẹka lile dzuru. O nokwa iwhe Onye-Nwe-Ọha l'ekfu ndono. 7Shẹe! Unu gbalaa lashia Záyọnu, unubẹ ndu ono bu lẹ Bábyilọnu, 8nkele ọ waa iwhe Onye-Nwe-Ọha bụ Onye-ishi-igwe-ọgu l'ekfu ndọwa: ‘Onye l'akpa unu ẹka bụkwa nwanggiri-ẹnya mu bẹ l'ọokpa ẹka.’ ” Onye ono, dụ ugvu bya ezhia mu ozhi tẹ mu je ezhia ndu mba ono, vụru arya ndibe unu l'akpaa lẹ ya sụru agha: 9“Mu l'e-byi whẹ ẹka l'ẹhu; ndu ono, shi bụru ohu whẹ ono avụa arya whẹ l'akpaa. Nteke ono unu amarụ l'ọo Onye-Nwe-Ọha bụ Onye-ishi-igwe-ọgu zhiru mu tẹ mu bya.
10“Gụa egvu, ẹhu atsọo ghu rịkporikpo gụbe nwada Záyọnu nkele ntaa bẹ mu l'abyawaa tẹ mu buru eburu l'echilabọ unu. O nokwa iwhe Onye-Nwe-Ọha l'ekfu ndono. 11Nteke ono bẹ ikpoto mba l'a-wukfuta mụbe Onye-Nwe-Ọha tẹ mu lẹ whẹ tụgba bụru nnanụ, whẹ abụru ndibe mu. Mu eburu eburu l'echilabọ unu, unu amarụ l'ọo Onye-Nwe-Ọha bụ Onye-ishi-igwe-ọgu bẹ zhiru mu tẹ mu byakfuta unu. 12Onye-Nwe-Ọha l'e-wota Juda t'ọ bụru oke-iwhe, o nweru l'alị ono, dụ nsọ, ya abya ahọta-whu Jerúsalẹmu azụ ọdo. 13Tẹ madzụ l'owhu daa kfụkfurukfuu l'iwhu Onye-Nwe-Ọha nkele o shiwaa l'ẹka ono, o bu, dụ nsọ ono ngulihu eje abya.”
Currently Selected:
Zakaráya 2: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
