Zakaráya 10
10
Onye-Nwe-Ọha l'a-nwụberu ndu Juda ẹnya
1Unu ryọo Onye-Nwe-Ọha t'o mee tẹ mini ishi awha chịaru unu. Ọ kwa Onye-Nwe-Ọha l'emeje tẹ igweli chaa achacha. Ọ bụru iya l'emeje tẹ mini meeru ụnwu eliwhe yẹshiyeshi, bya emee t'iwhe onyenọnu kọru l'okfu jaa ajaja dụkota nonwu nonwu. 2Madzụ l'ejeje njịta l'ọgvu mẹe l'ẹka ndu l'agba ẹja. Obenu l'iwhe whẹ l'ekfujeru whẹ bụkota ejire, tẹmenu okfu whẹ bụru ọga-lẹ-mkpa okfu. Ụwhodu bụ ndu l'akọwa nrọ l'ụzo ụgho; obu, whẹ l'adụje madzụ bụ iwhe-iwhoro. O noo g'o gude madzụ whukashihu nọdu l'iwhe-ọtsulanu g'ọo atụru, l'enwee onye l'eche iya nụ.
3“Ẹhu l'eghukwa mu damụdamu l'ẹka ndu l'eche atụru ono nọ; mu jekwanu l'a-nụ ndu ishi ono awhụ. O noo lẹ Onye-Nwe-Ọha, bụ Onye-ishi-igwe-ọgu l'a-nwụberu atụru iya whẹ ẹnya bụ iya bụ ọzo-ụlo Juda, mee whẹ tẹ whẹ dụ g'ọo ịnya-ọgu, dụ ugvu l'ẹnya. 4Ọo lẹ Juda bẹ ẹwhuru gude ụlo l'e-shi fụta, ọ bụru iya bẹ nturu, gude ụlo-ẹkwa l'e-shi fụta, ọ bụru iya bẹ ube e gude alwụ ọgu l'e-shi fụta, ọ bụru iya bẹ ndu ishi, dụ l'iche l'iche l'e-shi fụta. 5Ndu Juda l'a-jịko bụru ndu ike dụ. Whẹ l'e-gude ọkpa dzọo ndu ọhogu whẹ gbụdugbudu l'ẹpoto dụ l'echi-ụzo. Whẹ alwụa ọgu gbakaa ndu gude ịnya alwụ ọgu nkele Onye-Nwe-Ọha swiru whẹ eswiru.
6“Mu l'e-me t'ọzo-ụlo Juda shihu ike,
mu adzọo ọzo-ụlo Jósẹfu.
Mu l'e-me tẹ whẹ lawhu azụ l'ọnodu whẹ,
nkele imiko whẹ dụ mu.
Whẹ abya adụ g'ọo ndu mu l'ẹte eshia jịka ajịka,
nkele ọo Mu bụ Onye-Nwe-Ọha bụ Chileke whẹ;
mu je l'a-zajẹ whẹ oku.
7Ndu Ífuremu l'a-bụ ndu ike dụ,
ẹswa eji whẹ obu g'ọo ndu ngụru mmẹe.
Ụnwu whẹ l'a-whụ iya tee ẹswa,
obu atsọlahaa whẹ rịkporikpo
l'iwhe Onye-Nwe-Ọha meru.
8Mu l'e-gude okpurọswa kukobe whẹ.
Ishi iya bụ lẹ mu l'a-gbafụta whẹ,
whẹ abya aha l'igweligwe gẹ whẹ shihawaa ha.
9A makwarụ-a lẹ mu chịkashiru
whẹ, whẹ dzuru mba gẹ mba ha,
ọle whẹ l'a-nọdule l'alị teru ẹnya nyata mu.
Whẹ l'ụnwegirima whẹ l'a-tụko wafụ lwatashia.
10Mu l'e-shi lẹ Íjiputu dulata whẹ,
mu eshi lẹ Asiriya rwukobe whẹ,
chịru whẹ je edobe l'alị Giledu
mẹe l'ugvu ugvu Libanọnu,
jeye nteke ẹka ono l'ete edzuhe whẹ anọdu.
11Whẹ l'a-da eze-ẹnyimu iwhe-ọtsulanu,
mu emee t'akpara mini iya lwazeta,
ogbu-mini ẹnyimu Nayịlu atahụkota atahụ.
Ekuku ono, ndu Asiriya shi eku
onwowhe l'a-bụ iwhe e wozeru alị,
mgbọro ono, shi bụru ike ndu
Íjiputu abụru whuchakangu.
12Mu l'e-me, ike adụ ndibe mu l'ẹka Onye-Nwe-Ọha nọ,
whẹ egude ẹwha mu adzọnga mgboko.”
O nokwa iwhe Onye-Nwe-Ọha l'ekfu ndono.
Currently Selected:
Zakaráya 10: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
