Mátiyu 28

Jisọsu shi l'ọnwu teta nọdu ndzụ

(Mak. 16:1-10; Luk. 24:1-12; Jọn. 20:1-10)

1Mbọku ọtuta-ume ono ghatalẹwho, o rwua l'ishi ẹnyangge mbọku Sọnde, Méri Mágudala mẹe Méri ọwhuna tụgbua jeshia l'ilu ono. 2E jia ekfu, alị wata anọ anma oke jijiji, o noo l'o nweru ojozhi-imigwe, shi l'ẹka Onye-Nwe-Ọha, shi l'imigwe whezeta, bya eswifu eze-ẹwhuru ono, nọdu anọdu l'eli iya. 3Ụgbugba iya dụlewho g'ọo ebemu-igwe, uwe iya chagee ụcha chaa g'ọo eberugo. 4Ndu nche ono tsụta egvu, nmahụ kpakpakpa, dabugeeru g'ọo ndu nwụhuru anwụhu.

5Ojozhi-imigwe ono sụ ụnwanyi ono: “T'unu ba atsụkwa egvu, lẹ mu makwarụ l'onye unu l'achọ bụ Jisọsu ono a kpọpyaberu l'oswebe. 6Ọ tọ nọhekwa l'ẹka-a. O tetaakwaru nọdu ndzụ, bụnua iwhe o kfuhawaru unu. Unu byanụ awhụ ẹka ọbu, e shi nyebe iya. 7Unu tụgbulekwaruwho ntaa ntaa, je ekfuru ndu l'etso ụzo iya l'o shiwaa l'ọnwu teta nọdu ndzụ. Mbụ l'ọ gbeekwanu vuwaru nụ unu ụzo jeshia Gálili. O noo ẹka unu l'a-whụ iya. O nokwa iwhe mu byarụ unu ezhizhi ndono.”

8Whẹ gude ọtsu-egvu mẹe oke ẹhu-ụtso vụta ọzo gbafụ l'ilu ono, gbagbụa ẹgwegwa jeshia ọkoru ndu l'etso ụzo Jisọsu iwhe ono.

9A bya l'ele ẹnya, Jisọsu byakfutawaa whẹ bya ekele whẹ: “?Unu dụwhoma!” Whẹ bya gbakfu iya bya abụru bẹdee l'alị, gudekaa ya ẹka l'ọkpa whẹ ẹbo-ẹbo baarụ iya ẹja. 10Jisọsu sụ whẹ: “T'unu ba atsụkwa egvu. Unu tụgbulewho je akarụ ụnwunna mu tẹ whẹ tụgbua jeshia Gálili, l'o noo ẹka whẹ l'a-whụ mu ndono.”

Iwhe ndu nche l'ekfu

11Ụnwanyi ono tụgburu, whẹ nọdukwadua l'echi-ụzo, ndu ojọgu whọ, l'eche nche who hawarụ vuru whẹ ụzo wụba l'ime Jerúsalẹmu, je akọoru ndu ishi ndu ono, l'agbajẹ ẹja nụ Chileke iwhe ono, meru nụ. 12Ndu ishi ono mẹe ndu bụ ọgurenya bya edzukobelekwawho chịa idzu, whẹ bya ewota okpoga, ha shii nụ ndu ojọgu ono nnuchi-ọnu, 13sụ whẹ: “Unu sụjekwa l'ọo ndu l'etso ụzo Jisọsu bẹ byabya ezhita odzu iya l'ẹnyashi gẹ unu l'eku mgbẹnya. 14E tebekwaroo t'a ma, iwhe-e rwua ọ-chị-ọha lẹ nchị, t'unu dakwaarọ jii, anyi l'e-kfukwaru-a nụ iya, haarụ unu enge t'ọ bọ dụ iwhe l'oo-me unu.”

15Whẹ nata okpoga ono, mee g'a sụru tẹ whẹ mee. Whẹ kfua iwhe ono, o debarahu ngakọta alị ndu Ju l'owhu byeyekwaa ntanụ-a.

Jisọsu l'egoshi ndu l'etso ụzo iya onwiya

(Mak. 16:14-18; Luk. 24:36-49; Jọn. 20:19-23; Ndu. 1:6-8)

16Tọ dụ iya bụ lẹ ndu l'etso ụzo iya whẹbe ụmadzu iri lẹ nnanụ ono atụgburu jeshia Gálili, whẹ rwua jeshia l'ugvu ono, Jisọsu tụhawaru whẹ ọnu iya. 17Whẹ whụlewho Jisọsu, whẹ baarụ iya ẹja. Ọle o nwelekwaru-a ndu ọwhu l'ọbo obu ẹbo nke woo: a marụ ọ bụdu iya nụ. 18Jisọsu byakfuta whẹ bya asụ whẹ: “Chileke bẹ mewaru tẹ ike lile, dụ l'imigwe mẹe ọwhu dụ lẹ mgboko-o lwakọta mu. 19Ọo ya bụ, unu je emee ndu mba lile tẹ whẹ bụru ndu l'etso ụzo iya. Unu egudeje ẹwha nke Nna mẹe nke Nwa mẹe nke Ume-Dụ-Nsọ eme whẹ baputizimu. 20Unu ezhije whẹ tẹ whẹ meje iwhe lile ono, mu kfukotaru unu t'unu meje. Unu lelewho lẹ mu nọdukwaa swiru unu mbọku-mbọku jeye nteke mgboko l'a-gvụ.”

Currently Selected:

Mátiyu 28: Ezaa

Highlight

Copy

Compare