Mátiyu 27

Jisọsu nọ l'iwhu Páyileti

(Mak. 15:1; Luk. 23:1-2; Jọn. 18:28-32)

1Chi sahụlewho, ndu ishi ndu l'agbajẹ ẹja nụ Chileke gẹ whẹ ha mẹe ndu bụ ọgurenya ndu Ju bya achịa idzu tẹ whẹ gbua Jisọsu. 2Whẹ kee Jisọsu ẹgbu kpụta je akpụru ye ọ-chị-ọha, bụ Páyileti l'ẹka.

Anwụhu Júdasu

(Ndu. 1:18-19)

3Tọ dụ iya bụ lẹ Júdasu-a bụ iya bụ onye ọbu, gbarụ Jisọsu ye awhụlewho l'e kperu Jisọsu nkfugbu, ọ bya adaa onwiya ụta. Ọ chịta ụkporo pọngu lẹ pọngu iri ono chiwhuru ndu ishi ndu l'agbajẹ ẹja nụ Chileke mẹe ndu bụ ọgurenya ndu Ju ono azụ 4bya asụ whẹ: “Mu mewaru iwhe-dụ-ẹji, o noo l'ọo onye l'adụa ejo iwhe o metaru bẹ mu gbarụ ye t'e gbua.”

Whẹ sụ iya: “?Mbụ l'iikfu t'anyi me iya aghaa? Njegelege waakwa ghu rọ.”

5Júdasu chịru okpoga ono ghaa l'ime eze-ụlo Chileke swịhaa ije. Ọ tụgbua lụfu je aswị-gbua onwiya.

6Ndu ishi ndu l'agbajẹ ẹja nụ Chileke bya ewota okpoga ono sụ: “Okpoga-a ta abụkwa iwhe l'ee-yekobe l'okpoga Chileke, eshi-ọwhu ọ bụ aswa mmee ishi madzụ owhu.” 7Tọ dụ iya bụ lẹ whẹ abya achịa idzu, wota okpoga ono gude je azụa alị onye ọ-kpụ-ite, wota gụbe alị mee ẹka whẹ l'elije ndu mbyambya. 8O noo iwhe mewaruroo, e kulahaa alị ono: “Ẹgu-mmee,” shizhiawho mbọku ono byeyekwaa ntanụ-a.

9Tọ dụ iya bụ, iwhe ọbu Jeremáya onye nkfuchiru Chileke kfuru megee vụa; ọwhu o kfuru sụ: “Whẹ chịtaru owhu pọngu lẹ pọngu iri ono, bụ aswa, ndu Ízurẹlu harụ kweta lẹ whẹ l'a-kfụ l'ishi iya, 10whẹ chịtaru iya gude zụa onye ọ-kpụ-ite alị, bụkwanu lẹge Onye-Nwe-Ọha kfuru iyẹ ya.”

Páyileti l'ajị Jisọsu ajị

(Mak. 15:2-5; Luk. 23:3-5; Jọn. 18:33-38)

11Jisọsu kfụru ọ-chị-ọha ono l'iwhu. Ọ-chị-ọha bya ajị iya sụ: “?Ọo gụbedua bụ Eze ndu Ju ọbu?”

Jisọsu sụ iya: “Ọ kwa ghu whọ b'o shi l'ọnu.” 12Ndu ishi ndu l'agbajẹ ẹja nụ Chileke mẹe ndu bụ ọgurenya l'ekfushikaa igweligwe iwhe-dụ-ẹji, whẹ sụru l'o meru, Jisọsu te eyeru ọnu yeru whẹ.

13Páyileti sụ iya: “?Tị nụdu igweligwe iwhe-dụ-ẹji ono, whẹ l'ekfukaa l'i megbaberu?”

14Jisọsu te ekfuru okfu yeru iya t'ọ ka mma l'ọo akpụru okfu lanụ. Iwhe ono kwata tụfu ọ-chị-ọha ono ẹhu nke ba ama gẹ l'ee-me iya.

Eekpe Jisọsu nkfugbu

(Mak. 15:6-15; Luk. 23:13-25; Jọn. 18:39—19:16)

15Awha g'awha ha bẹ l'ọobuje, o -rwulewho l'ori-oge O-je-ghata ono, ọ-chị-ọha whẹ ono ahaa onye mkpọro lanụ t'ọ la, mbụ-zhiawho onye whẹ tụru ẹka t'a haarụ whẹ. 16Nteke ono b'o nweru onye a marụ ẹwha iya a tụru mkpọro. Ẹwha onye ono bụ Barábasu. 17Tọ dụ iya bụ lẹ ndu ono edzukolewho ẹka lanụ, Páyileti sụ whẹ: “?Ndẹe onye ọwhu ọ dụ unu nke tẹ mu haarụ unu? ?Tẹ mu haarụ unu Barábasu, tọo ọwhu l'eekuje Kuráyisutu?” 18O noo l'ọ marụ l'ọo ẹnya-kfụrukfuru bẹ ndu ishi ndu l'agbajẹ ẹja nụ Chileke kwoberu kpụta Jisọsu kpụtaru iya.

19Páyileti nọdukwadua l'ụlo-ikpe ono, nyee ya ye madzụ ta abya asụ iya: “Tọ bọ dụkwa iwhe l'ii-me nwoke ono, dụ chịriri-o. Lẹ mu rọkwaru nrọ l'ẹnyashi, jee iwhe-ọtsulanu, parụ ẹka l'okfu ẹka iya.”

20Ndu ishi ndu ono, l'agbajẹ ẹja nụ Chileke mẹe ndu bụ ọgurenya ndu Ju kwakọta igweligwe ọha ono ye, tẹ whẹ sụ t'a haarụ whẹ Barábasu, megbua ọwhube Jisọsu. 21Ọ-chị-ọha ono jị whẹ ọdo sụ: “?Ọo onye ole l'ime ụmadzu labọ-ọ b'ọ dụ unu tẹ mu haarụ unu t'ọ la?”

Whẹ ryashịa sụ iya: “Ọo Barábasu!”

22Páyileti sụ whẹ: “?Unu sụkwanu tẹ mu mekwanu onye-e, bụ Jisọsu, l'eekuje Kuráyisutu gụnu?”

Whẹ tụko gẹ whẹ ha sụ: “T'a kpọpyabe iya l'oswebe.” 23Ọ sụ whẹ: “?Gụnu bụru ishi iya? ?Ọo ẹgube ejo iwhe gụnu b'o meru?” Whẹ kabaanụ ọryashi ike sụ: “Kpọpyabe iya l'oswebe.”

24Tọ dụ iya bụ lẹ Páyileti abya a nọnyaa, marụ l'o to nwedu iwhe ya l'ekfuta iya, l'o gbechia bụru ùtsú l'abya adada, o kuta mini kwọo ẹka l'iwhu igwe-ọha ono sụ whẹ: “A-a! Ẹka mu ta adụkwa l'ọchi nwoke-e. Gẹ dụlekwawho unu mma t'unu mekwaa.” 25Ndu ono gẹ whẹ ha tụko zụa sụ: “Tẹ ọchi iya tukoru anyi l'ishi, ya atukoru l'ishi ụnwu anyi.”

26Tọ dụ iya bụ, Páyileti haarụ whẹ Barábasu t'ọ la; ọ sụ t'e chia ọwhube Jisọsu iwhe. E chigee ya iwhe ono; ọ kpụta iya ye whẹ l'ẹka tẹ whẹ je akpọpyabe iya l'oswebe.

Ndu ojọgu l'aja Jisọsu ewenu

(Mak. 15:16-20; Jọn. 19:2-3)

27Tọ dụ iya bụ, ndu ojọgu ọ-chị-ọha ono dulia Jisọsu duba l'ụlo-ikpe ọ-chị-ọha ono. Whẹ bya ekukoo ndu ojọgu ibe whẹ, whẹ dzua lẹge whẹ ha. 28Whẹ bya eyeshia ya uwe nkiya, bya achịta kpowula kpowula uwe uswe yee ya, 29whẹ bya egude ogvu kpaa okpu-eze kpube iya, pata mkpụru dẹe ya l'ẹka-ụtara. Whẹ bya ebyishi ikpere l'iwhu iya ajajẹ iya ewenu asụje iya: “Ndzụ ghu ndzụ ogologo, Eze ndu Ju!” 30Whẹ vụshi iya ọnu-mini, wota mkpụru ono emoje iya l'ishi. 31Whẹ megee ya iwhe ọchi ono, whẹ yefu iya kpowula kpowula uwe ono, yee ya uwe nkiya whẹ kpụta iya jeshia tẹ whẹ je akpọpyabe iya l'oswebe.

Aakpọpyabe Jisọsu l'oswebe

(Mak. 15:21-32; Luk. 23:26-43; Jọn. 19:17-27)

32Whẹ wụfuta, whẹ bya awhụa nwoke lanụ bụ onye Sayiríni, ẹwha iya bụ Sáyịmonu. Whẹ yebuta iya t'o vutabude Jisọsu oswebe ono vuru tso whẹ. 33Whẹ jezhiawho jeye whẹ rwua ẹka ọbu, l'eekuje Gọlugóta bụ iya bụ Okpokoro-ishi, 34whẹ wota mmẹe, a gwakọberu ọgvu, l'atsọ ilu nụ iya t'ọ ngụa. O tsule iya whọ l'ọnu, ọ jịka iya angụngu. 35Whẹ kpọpyabe iya l'oswebe l'ẹka ono, megee, tụa ido gude kee uwe iya. 36Whẹ nọshia l'ẹka ono chelahaa ya nche. 37E dee iwhe-dụ-ẹji ọbu, whẹ sụru l'o meru kfube l'eli oswebe ono. Iwhe ọbu e deru bụ: “ỌO ONYE-E BỤ JISỌSU, EZE NDU JU.” 38A kpọpyabefukwaawho ụmadzu labọ, l'ana nfụ yeru iya, onye lanụ b'a kpọpyaberu l'oswebe ọdo l'ibẹka ẹka-ụtara iya. Onye ọwhu l'ibẹka ẹka-ịcha. 39Ndu l'aghatakaa l'ẹka ono l'ekfubyishi Jisọsu, ewhuwheru iya ishi asụje iya: 40“Tọ dụ gụbe ọwhu ọbu sụru l'ii-kutsushi eze-ụlo Chileke, tuwhu iya azụ ọdo l'ime abalị ẹto, dzọnua onwoghu. Ọ -bụnuru l'ọo ghu bụ Nwa Chileke, shinu l'eli oswebe ono nyizeta.”

41Ọ kwawhọ nno bụ gẹ ọwhube ndu ishi ndu l'agbajẹ ẹja nụ Chileke mẹe ndu o-zhi-iwu mẹe ndu bụ ọgurenya ndu Ju tụkoru aja iya ewenu asụje: 42“Ọ dzọru ndu ọdo, tọ dụhekwanu ike dzọo onwiya. Ọo ya bụ Eze ndu Ízurẹlu, t'o shinu l'oswebe l'ẹka ono nyizeta ntaa nke ọwhu anyi l'e-kweta l'ọo ya whọ bụ Kuráyisutu ọbu. 43Mbẹ ọ sụ l'ọo Chileke bụ onye ya ma; ọ sụkwawho lẹ ya bụ Nwa Chileke. Ọ -bụru l'ọo ya ezhi-okfu, tẹ Chileke ọbu dzọnua ya ntaa, goshi anyi l'ọo ezhi-okfu.”

44Ụmadzu labọ ono, l'ana nfụ ono a tụkoru whẹ l'iya kpọpyabe l'oswebe tụko ekfubyishikwa iya who nnokwawho.

Ọnwu Jisọsu

(Mak. 15:33-41; Luk. 23:44-49; Jọn. 19:28-30)

45Ẹnyanwu keleruwho l'echi ishi, chi jihu l'alị ono l'owhu, mgboko gbazhiawho tsụrikiti jeye l'okeswe urwẹnyashi. 46O belewho l'okeswe urwẹnyashi ono, Jisọsu chishia sụ: “Elayi! Elayi! ?Lema sabakutani?” bụ iya bụ: “Chileke mu! Chileke mu! ?Ọo gụnu meru g'o gude ị haa mu nkụnyi mu?”

47Ndu harụ kfụ-geeru l'ẹka ono, nụle iya who, whẹ sụ: “Ọo Eláyija bẹ nwoke-e gbee aryaku.” 48Onye lanụ l'ime whẹ gbagbụlekwawho nteke onowho, je ewota sapo tsẹe lẹ mmẹe o-shihu-ụka, tsebe iya lẹ gbaragbara oshi, dụ ogologo mabẹru Jisọsu t'ọ ngụa.

49Ndu ọwhua sụ: “T'a haada iya t'anyi maadarụ: ?Eláyija, bụ onye nkfuchiru Chileke l'a-bya adzọo ya?” 50Jisọsu chishia mkpu ike ọdo, ọ tubuhu ume.

51Nteke onowho, ẹkwa e gude gechia ime mkpu ẹka ẹnya eze-ụlo Chileke dụ shilewho l'ishi gbajahụ ẹbo tarakata je akpaa l'alị, alị nmakọtakwawho jijiji, oke-ẹwhuru gbawashịhu. 52Iwhe lile bụwho ilu ghekotaru ọnu, igweligwe ndu nke Chileke, bụ ndu shi nwụhu-gewaa anwụhu shikota l'ọnwu tetakota nọdu ndzụ. 53Whẹ shigee l'ime ilu ono lụfuta. Jisọsu bya eshilewho l'ọnwu teta nọdu ndzụ, whẹ tụgbua jeshia Jerúsalẹmu. Igweligwe madzụ whụa whẹ.

54Tọ dụ iya bụ l'onye ishi ojọgu, l'achị ndu ojọgu ụkporo ise mẹe ndu ojọgu iya, whẹ l'iya tụkoru eche Jisọsu nche whụa gẹ alị l'anma jijiji mẹwaro iwhe lile mekotaru nụ, meji gbabuhu whẹ, whẹ sụ: “Nwoke-e bụkwa Nwa Chileke ono l'ezhi.”

55O nweru igweligwe ụnwanyi, kfụ-geeru otẹnya l'ẹka ono, ele ẹnya tẹ whẹ marụ gẹ l'oo-megee nwụa. Ụnwanyi ono bẹ bụ ndu shi lẹ Gálili tsota Jisọsu ejeru iya ozhi. 56Méri nke Mágudala bẹ lị l'ụnwanyi ono. Méri ọwhu nwụru Jémusu, nwụa Jósẹfu lịru iya. Ọ lịkwaru iya whọ mbụ ne ụnwu Zébedi.

Eeli Jisọsu

(Mak. 15:42-47; Luk. 23:50-56; Jọn. 19:38-42)

57O belewho l'urwẹnyashi, oke-amadụ lanụ ọbu, shi Arimatíya tụgbua byatashia. Ẹwha iya bụ Jósẹfu. Yẹbedua l'onwiya bụkwa onye lanụ lẹ ndu l'etso ụzo Jisọsu. 58Nwoke ono bya ejekfu Páyileti je aryọo ya t'ọ haa tẹ ya pata odzu Jisọsu je elia. Páyileti sụ t'a parụ iya pẹe ya. 59Tọ dụ iya bụ lẹ Jósẹfu abya eje apatsuta odzu ono, gude ẹkwa ọcha, inyi l'adụa kwaa ya gẹ l'aakwajẹ odzu, 60pata iya je enyebe l'ilu nke yẹbe Jósẹfu. Ilu ọbu b'ọ tụru nke ọwhuu l'ẹwhuru ọbu, ha shii. Ọ bya agbụta eze agbụgaragbu ẹwhuru bechia ọnu ilu ono, tụgbua lashia. 61Méri Mágudala mẹe Méri ọwhuna nọdukwawho l'ẹka ono. Whẹ tụko nọdu-gee anọdu l'ẹka ono cheberu ilu ono iwhu.

Ilu ono bẹ l'eeche eche

62Tọ dụ iya bụ l'ọ bya ebe echile iya, bu mbọku ndu Ju l'atụtaje ume, ndu l'agbajẹ ẹja nụ Chileke mẹe ndu Fárisii bya edzukoo jekfu Páyileti, 63je asụ iya: “Nnajị anyi mẹ anyi byakwa anyata l'o nweru nteke nwoke ono, dzugburu onwiya l'ejire ono sụjeru nteke ọ nọkwadu ndzụ lẹ: ‘A -nọlewho abalị labọ nke ẹto iya, bẹ mu l'e-shi l'ọnwu teta nọdu ndzụ ọdo.’ 64Zhinu t'e cheje ilu iya ono eche jeye l'abalị nke ẹto ono, e menyaanu, ndu l'etso ụzo iya gbalihu je ezhita odzu iya pahaa, kfulahaa lẹ; ‘O shiwaa l'ọnwu teta nọdu ndzụ.’ L'ejire nke ikpazụ-a bẹ l'a-kakwa shii amamẹ nke ivurụzo.”

65Páyileti sụ whẹ: “?Ọ kwa l'unu nweru ndu ojọgu, l'echeje nche? Unu tụgbua je akwata tuchishia ilu ono ike lẹge ike beru unu.”

66Whẹ tụgbua je achịkoo iwhe gbachia ọnu ilu ono ree-ree-ree, mee ya iwhe-ọhubama, chịru ndu nche ye iya. Whẹ wata iya echeche.

Currently Selected:

Mátiyu 27: Ezaa

Highlight

Copy

Compare