Mátiyu 25
25
Ẹtu, Jisọsu gude igbaragidi ụnwumgboko iri anma
1“Nteke ono Chileke l'e-goshi l'ọo ya bụ eze bẹ l'ọo-dụlewho g'ọo iwhe meru l'akọ igbaragidi ụnwumgboko iri, chịtaru oryọku whẹ gude jeshia onye l'alụ nwanyị nke ọwhuu ndzuta. 2Ụmadzu ise l'ụnwumgboko ono bụru iya ndu eswe, ụmadzu ise bụru iya ndu marụ ágụ. 3Lẹ ndu ọwhuna, bụ ndu eswe bẹ gbashiru chilishia oryọku whẹ, whẹ te egudehe mmanụ-ọku l'iwhe ọdo. 4Ọle ọwhube ndu ọwhuna marụ ágụ bẹ gbashideru, whẹ ye mmanụ iwhe ọku l'ekpemu gude nke iche, gudekwawho oryọku whẹ. 5Onye ono, l'alụ nwanyị ọwhuu ono nọdelewho ọdu l'abyabya, mgbẹnya byalahaa whẹ l'ẹnya. Whẹ tụnyaa ishi kwekengu kwekengu, mgbẹnya tsụshia whẹ.
6“Abalị dalẹwho ẹbo, a ryashịa sụ: ‘Wa-yii! L'onye ọbu, jeru ọlu nwanyị ọwhuu ọbu erwua-oo! Unu lụfuta gbata iya ndzuta.’
7“Tọ dụ iya bụ l'ụnwu mgboko ono awulihukota bya emezhilahaa oryọku whẹ. 8Lẹ ndu onona, bụ ndu eswe whọ asụ ndu ọwhu marụ ágụ: ‘Byiko, t'unu menuru nwamanụ unu tadaru anyi, l'ọku l'anyịhuwaa l'oryọku anyi.’
9“Ndu onona, marụ ágụ ono sụ whẹ: ‘Wawa. ?E megekwanua t'o dzuheru anyi l'unu-e? Unu jekwawho ibe ndu l'agba nghọ mmanụ iwhe ọku je akpata nke unu.’
10“Whẹ tụgburu jeshia ya akpata. Ọ bụru nteke ono, whẹ l'eje ọkpata mmanụ ono bẹ onye ono, l'alụ nwanyị ọwhuu byarụ; ụnwumgboko ise ọwhu bụ ndu ọwhu kwakọbewaru ẹhu tsoru iya, whẹ tụko wụba l'ụlo rilahaa eriri ẹswa-nwanyị ono. Whẹ wụbalewho l'ụlo, a guchia ụzo.
11“Ọ bụru g'a nọnyaadaru bẹ ụnwumgboko ise ọwhu bya ekfulahaa sụ: ‘Onye-Nwe-Ọha! Onye-Nwe-Ọha! Gụharu anyi ụzo.’
12“Nwoke ono sụ whẹ: ‘Iwhe mu l'eme tẹ mu kfuru unu bụ: lẹ mu ta amadụ onye unu bụ-o.’
13“O noo iwhe meru mu sụ unu t'unu chejekwawho nche, nkeshi ọwhu unu l'ẹte amaa mbọku ọ bụ, unu ta ama oge nteke ọ bụ.
Akọ ndu ozhi ẹto
(Luk. 19:11-27)
14“Lẹ nteke Chileke l'e-goshi l'ọo ya bụ eze bẹ l'ọo-dụlewho g'ọo iwhe meru l'akọ nwoke lanụ, gbashiru bya l'ala ọha ọdo, o kukoo ndu ozhi iya, woru iwhe bụ iwhe o nwe enwe g'ọ hakọta ye whẹ l'ẹka. 15Onye lanụ b'ọ nụru ẹkpa-okpoga ise, nụ onye ọwhu ẹkpa-okpoga labọ, nụ onye nke ẹto ẹkpa-okpoga lanụ. Onyenọnu b'ọ nụru lẹge gẹ ike iya beru. Ọ nụ-gee whẹ iya, ọ palihu, ọ bụru iya oje iwhe l'ooje. 16Onye ono, ọ nụru ẹkpa-okpoga ise tụgbulekwaruwho nteke onowho gude iya jeshia ọgba nghọ. O gude iya gbaa nghọ ono jeye o rita iya ẹkpa-okpoga ise ọdo tukobe iya. 17O nokwawho g'onye ọwhu ọ nụru ẹkpa-okpoga labọ meru iya. Yẹbedua je eritakwawho urwu ẹkpa-okpoga labọ ọdo tukobe lẹ nkiya. 18Obenu l'onye ọwhu a nụru ẹkpa-okpoga lanụ; yẹbedua tụgburu je egvua alị libe okpoga Onye-nwe-iya-nụ ono.
19“Tọ dụ iya bụ l'a nọ-zhiewho jeye o be ujiku lanụ, Onye-nwe-whẹ-nụ ono lwanụ tẹ whẹ l'iya pyazhia okpoga ono. 20Onye ọwhu, a nụru ẹkpa-okpoga ise whọ byatashia; ọ byata gudekwawho ẹkpa-okpoga ise ọdo bya asụ: ‘Onye-Nwe-Ọha, iwhe ị nụru mu bụ ẹkpa-okpoga ise, ọle ntaa bẹ okpoga ono gbaakwarụ mgburumgburu tukobe onwiya ẹkpa-okpoga ise ọdo; lekwa iya.’
21“Onye-nwe-iya-nụ sụ iya: ‘I meru ree! Ị bụ ọkpobe onye ozhi, goshiwaru l'e gude ire iya ẹka. Eshi-ọwhu i goshiwaru l'e gude ire ghu ẹka lẹ nwiwhe, l'ẹte asụa kaa, bẹ mu l'e-me t'ị bụru onye ishi l'iwhe parụ ẹka. Bya tẹ ẹhu tụko gụ lẹ Onye-nwe-ghu-nụ tsọo ụtso.’
22“Onye ọwhuna, ọ nụru ẹkpa-okpoga labọ byabya asụ iya: ‘Onye-Nwe-Ọha; iwhe ị nụru mu bụ ẹkpa-okpoga labọ, lẹ okpoga ono gbaakwarụ mgburumgburu tukobe onwiya ẹkpa-okpoga labọ ọdo; lekwa iya ndọwa.’
23“Onye-nwe-iya-nụ sụ iya: ‘I meru ree! Ị bụ ọkpobe onye ozhi, goshiwaru l'e gude ire iya ẹka. Eshi-ọwhu ị goshiwaru l'e gude ire ghu ẹka lẹ nwiwhe, l'ẹte asụa kaa, bẹ mu l'e-me t'ị bụru onye ishi l'iwhe parụ ẹka. Bya tẹ ẹhu tụko gụ lẹ Onye-nwe-ghu-nụ tsọo ụtso.’
24“Onye ọwhu a nụru ụkporo ẹkpa-ego lanụ whọ byakwawhọ bya asụ: ‘Onye-Nwe-Ọha! Aa! Lẹ mu marụ ghu ree, l'ị bụnuka ejo madzụ. L'iijeje je awọo iwhe l'ẹka l'ịikua iwhe, l'iijejekwawho ọtutu iwhe l'ẹka l'ịiti tụkaa iwhe. 25O nokwa iwhe meru mu tsụhu egvu, mu je egvua alị woru okpoga ghu libe. Ọ kwa t'ị narụ iwhe ghu.’
26“Onye-nwe-iya-nụ ono sụ iya: ‘Lekwaa gụbe ọ-nọdu-mkpa-l'egbu-onye-e, ejo obu l'egbu egbu-a. G'ị mawarụ lẹ mu l'awọtaje iwhe l'ẹka mu l'a-kụa ya, mu l'atụtuje iwhe l'ẹka mu l'atụkaa iwhe, 27?ndẹnu g'e meru t'ị kabẹ je eyeru mu okpoga mu ono l'ụlo nche okpoga nke ọwhu bụ: mu lwarụ gẹ mu lwarụ ẹgube-ẹ mẹ mu eje ewota okpoga mu, wota ọnwurunwa o tukoberu onwiya.
28“ ‘Unu nata iwhe mmaanụ ono okpoga ono nụ onye ọwhu nwe ẹkpa-okpoga iri who. 29O noo l'onye nweru nụ bẹ l'aa-nụbakwaa nggẹ onye ọbu enweru nweru etsutsu iya. Ọle onye l'ete enwee bẹ l'aa-gbẹenu nata nwa nwịya ọwhu o nwe. 30A bya bya lẹ nke yẹbe ọ-nọdu-mkpa-l'egbu-onye-e, bụ nwozhi-a, unu pata iya tụa lẹ tsụrii ẹkpuroochi l'etezhi. Ẹka ono bẹ madzụ l'a-nọdu ryaa ejo ẹkwa taa ikireze.’
Ikpe Ikpazụ
31“Ọle nteke Abụbu-Ndiwhe l'a-nọ egbu zaazaa abya yẹle iwhe bụkota ndu ojozhi-imigwe iya gẹ whẹ hakọta bẹ l'ọo-nọdu l'oshi-eze egbu zaazaa. 32Nteke ono bẹ ndiwhe je akpaa l'ẹka whẹ beru l'e-dzukota l'iwhu iya. Ya abya ahọo whẹ doo iche iche g'ọo ẹgube-ẹ onye l'eche atụru l'ahọshije mebyi-eghu l'atụru iya dobe iche. 33Ọwhube atụru bẹ l'ọo-chịru dobe onwiya l'ụzo ẹka-ụtara, ya achịru ọwhube mebyi eghu dobe l'ụzo ẹka-ịcha.
34“Nteke ono bẹ Eze ono l'a-sụ ndu ọwhu nọ iya l'ụzo ẹka-ụtara: ‘Unu bya unubẹ ndu Nna mu gọru ọnu-ọma nụ. Unu bya atụko gbaa mgba ria urwu gbarụ ndu Chileke bụ eze whẹ, mbụ ono, ọ kwakobẹhawaru unu eshi nkeshi ono o meru mgboko. 35O noo l'ẹgu gụru mu, unu nụ mu nri mu ria, ẹgu-mini gụa mu, unu kee mu mini mu ngụta, mu bụru mbyambya, unu dubata mu ibe unu. 36Mu gbarụ ọto, unu webe mu iwhe, ẹhu-ba-dụ-mma gude mu, unu leta mu ẹnya, mu shi nọdu lẹ mkpọro, unu bya mu agbawhe.’
37“Nteke ono bẹ ndu ono dụ chịriri l'a-sụ iya: ‘Onye-Nwe-Ọha ?ọ hụnu nteke ole bẹ anyi whụru ghu l'ẹka ọbu, ẹgu l'agụ ghu, anyi nụ ghu nri ọbu? Ọdua ọ bụru mini l'agụ ghu, anyi kee ghu iya ị ngụa? 38Mbụ ?ọo nteke ole bẹ anyi whụru ghu, ị bụru mbyambya, anyi dubata ghu ibe anyi ọbu, ọdua ọ bụru ẹka ị gba ọto, anyi webe ghu iwhe? 39?Ọo nteke ole bẹ anyi whụru ghu, ẹhu ta adụ ghu mma, ọdua ị nọdu l'ụlo mkpọro, anyi bya eleta ghu ẹnya ọbu?’
40“O noo nteke eze ono l'a-sụ whẹ: ‘Iwhe mu l'eme tẹ mu kfuru unu bụ: eshi-ọwhu unu meru iya eberu ọ -bụru m'ọo onye lanụ lẹ ndu ẹnya whẹ ka ọlwali lẹ ụnwunna mu-a bẹ bụakwa mbẹdua bẹ unu meru iya.’
41“Nteke ono, ya abya asụ ndu onona, nọ iya l'ụzo ẹka-ịcha: ‘Unu lụfu mu l'iwhu unubẹ ndu Chileke tụru ọnu. Unu wụba l'ọta-chịchichi ọku ono, l'e-nwuzhiawho gidigidi jeyewaro. O noo ẹka Chileke meru doberu Oshifutuswe yẹle ndụ-ojozhi iya. 42O noo l'ẹgu gụru mu, unu ta anụ mu nri tẹ mu ria. Ẹgu mini gụa mu, unu te ekee mu mini tẹ mu ngụa. 43Mu bụru mbyambya, unu te edubata mu l'ibe unu, mu gbarụ ọto, unu te ewebe mu iwhe, iwhe shi eme mu, mu nọdu l'ụlo mkpọro, unu te eleta mu ẹnya.’
44“O noo nteke whẹ l'a-sụ iya: ‘Onye-Nwe-Ọha ?ọ hụnu nteke ole bẹ anyi whụje-zhiaru ghu l'ẹka ẹgu l'agụ ghu, ọdua ọ bụru ẹgu-mini l'agụ ghu, ọdua l'ọo ẹka ị bụ mbyambya, ọdua l'ọo ẹka ị gba ọto, ọdua l'ọo ẹhu l'eme ghu, ọdua l'ọo ẹka ị nọ l'ụlo mkpọro, anyi ta abya eyetaru ghu ẹka?’
45“Ya asụ whẹ nteke ono: ‘Iwhe mu l'eme tẹ mu kfuru unu bụ: l'eshi ọwhu unu l'ete emeeru iya t'ọ ka mma l'ọo onye lanụ, ẹnya nkiya kagee ọlwali l'ụnwunna-a bụ unu l'ete emekwaaru mu iya.’
46“Ọo ya bụ, whẹ alụfu iya l'iwhu je abahụ l'ẹka whẹ l'a-nọ-zhiewho eje iwhe-ọtsulanu mgbe agvụ agvụ. Ọwhube ndu ọwhu dụ chịriri awụba lẹ ndzụ tututu-mịmimi.”
Currently Selected:
Mátiyu 25: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
