Mátiyu 22

Ẹtu nke ẹswa-nwanyị

(Luk. 14:15-24)

1Jisọsu byakwawhọ anmaarụ whẹ ẹtu ọdo gude yeeru whẹ ọnu sụ: 2“Nteke Chileke l'e-goshi l'ọo ya bụ eze bẹ l'ọo-dụlewho g'ọo onye eze lanụ, nwa iya nke nwoke lụru nwanyị nke ọwhuu; o shishiaru nwa iya ono nri. 3Onye eze ono bya ezhia ndu ozhi iya tẹ whẹ je ekua ndu e kuru l'eriri ẹswa-nwanyị ono. Ndu ono te ekwe abyabya.

4“Ọ bya ezhikwa ndu ozhi iya ọdo sụ: ‘Unu je asụ ndu ono e kuru l'eriri-a lẹ mu shiakwaru nri ọbu, lẹ mu gbushiakwaru oke-eswi mu mẹe okiri mu, lẹ mu tụkokwaru iwhe lile dozhigee ree gẹ l'ọo-dụ. Unu sụ whẹ tẹ whẹ byawarọ l'eriri ẹswa-nwanyị ọbu-o!’

5“Ndu ono e kuru l'eriri ono palẹ iya-a ẹka lanụ tụgbu-gee jeshia iwhe dụru whẹ nụ. Onye ọwhu l'ejeshia l'okfu iya, onye ọwhu l'ejeshiaro oore nghọ, ọ gbatarụ. 6Ndu ọwhuna gudegee ndu ono, onye eze ono zhiru ozhi t'a bya ezhia whẹ, mee whẹ iwhe iwhere, tụko whẹ gbushia. 7Ẹhu ghua onye eze ono eghu ghushia ya ike. Ọ bya ezhi ndu ojọgu iya, whẹ je emegbushia ndu mgbugbu madzụ ono, tọo ọku lẹ mkpụkpu whẹ, ọku dzụkota iya.

8“T'ọ bya aghaa rii nteke ono sụ ndu ozhi iya: ‘Ntaa b'e shigewaru nri ẹswa-nwanyị ọbu, mee ya gẹ l'ọo-dụ. Ọle ndu ono e kuru tẹ whẹ bya eria ya, ta adụdu nke eriri iya. 9Unu tụgbua ntaa je l'ụzo g'ụzo ha, je erwukozhiawho iwhe bụ-zhia ndu unu whụru, g'ike beru unu, unu rwuta whẹ bya l'eriri ẹswa-nwanyị ọbu.’ 10Ndu ozhi ono jịko wụba-gee l'ụzo g'ụzo ha, je erwukoo iwhe bụ ndu whẹ whụru, ndu ọma mẹe ndu ẹjo iya. Whẹ bya eji ụlo ono, l'eeme nke ẹswa-nwanyị ono kpimu.

11“Tọ dụ iya bụ l'ọ bya ebe nteke onye eze byarụ tẹ ya bya agbawhee ndu ọbu, byarụ l'eriri ọbu, ọ bya awhụa nwoke, l'ete eyee uwe ẹswa-nwanyị. 12Ọ sụ iya: ‘Ha-e! Ọnya mu ?ndẹnu g'i shi bata l'ẹka-a l'ẹbe abụ l'i yeru uwe ẹswa-nwanyị?’ Nwoke ono ta ama iwhe l'oo-kfu. 13Tọ dụ iya bụ lẹ gụbe onye eze asụ ndu ozhi iya: ‘Unu kekoo ya ẹka yẹle ọkpa pata iya tụa lẹ tsụrii ẹkpuroochi l'etezhi, bụ ẹka madzụ l'a-nọdu ryaa ejo ẹkwa taa ikireze!’ ” 14Jisọsu nmagee ẹtu ono, ọ sụ: “Ndu Chileke kuru bẹ hakwa l'igweligwe, ọle ọ kwa nwolemole b'ọ họtaru.”

Okfu akịriko

(Mak. 12:13-17; Luk. 20:20-26)

15Ndu Fárisii tụgbua jeshia ọchi idzu gẹ whẹ l'e-shi gude okfu, shi Jisọsu l'ọnu nmata iya l'ọnya. 16Whẹ bya eduru ndu l'etsoje whẹ nụ mẹe ndu nke Hẹ́rodu ye tẹ whẹ je ajịta iya ajị. Whẹ bya ajị iya ajị ọbu sụ: “O-zhi-iwhe, anyi marụ l'ị bụ onye ire-lanụ, ọ bụkwaruwho ire-lanụ b'i gude ezhi ụzo Chileke, tọ dụ onye l'ịitsu egvu. Tọ dụ onye l'iikfu ele ẹnya l'iwhu. 17Anyi sụru agha: ?Ndẹe g'ọ dụ ghu l'obu? ?Tọ bụdunu omebyi iwu Chileke mẹ anyi -tụjee akịriko nụ Siza, bụ ishi ọ-chị-ọha Romu?” 18Jisọsu malẹruwho lẹ whẹ bụ ndu ejo obu, ọ sụ whẹ: “?Ọo gụnu meru unu bya agbabẹru mu ẹregede okfu gude eme t'unu nmata mu, unubẹ iwe-l'obu-ọchi-l'ọnu-eze whẹ-e? 19Unu goshiada mu nụ okpoga e gude atụ akịriko ọbu.”

Whẹ bya ewotaru iya akpụru okpoga. 20Ọ sụ whẹ: “?Ọo ishi onye b'e seru iya ẹgube-ẹ, deru ẹwha iya swibe iya?” 21Whẹ sụ iya l'ọo nke Siza.

Ọ sụ whẹ: “Ọo ya bụ t'unu woru iwhe ọwhu bụ iwhe Siza nụ Siza, unu eworu iwhe ọwhu bụ nke Chileke nụ Chileke.” 22Whẹ nụa ya; ọ dụ whẹ biribiri. Whẹ parụ iya haa tụgbua.

Nke oshi l'ọnwu teta nọdu ndzụ

(Mak. 12:18-27; Luk. 20:27-40)

23Ọ kwarụwho mbọku onowho bẹ ndu Sádusii, bụ whẹ sụru l'onye nwụhuru anwụhu te eshijedu l'ọnwu teta nọdu ndzụ byakfutaru Jisọsu, bya ajị iya sụ: 24“O-zhi-iwhe, Mósisu bẹ sụkwaru: ‘Nteke nwoke lụnyaaru nwanyị, nwoke ọbu nwụhu, to dobe akọ, tẹ nwune iya lụpyabe nyee nwune iya ono t'ọ nwụtaru onye ono, nwụhuru anwụhu whọ nwa.’ 25Sụa, o nweru ndu dụ ẹsaa l'unwune, anyi lẹ whẹ shi nọdu. Nke ọgurenya lụa nwanyị, lụta iya jeye ọ nwụhu, to dobe akọ lẹ mgboko-o. Ọ parụ nyee ya ono haarụ nwune iya. 26Onye nke ẹbo, bụ otsota byakwa alụpyabe nwanyị ono nọkwaawho nwụhu, to dobe akọ. Ọ nwụaru onye nke ẹto nno, nwụ-zhiaru whẹ whọ nno jeye l'onye nke ẹsaa whọ. 27E megee l'ikpazụ nwanyị l'onwiya nwụhukwawho. 28O -rwua nteke l'ee-shi l'ọnwu teta nọdu ndzụ; ?ọo onye ole l'ime ụmadzu ẹsaa ono bẹ nwanyị ono l'a-bụ nyee ya? Gẹ whẹ ẹsaa ono lụkotaru iya l'ẹhu l'ẹhu.”

29Jisọsu yeeru whẹ ọnu sụ whẹ: “Unu l'eshiswe ụzo nkele iwhe e deru l'ẹkwo Okfu Chileke te edodu unu ẹnya, to dokwawho unu ẹnya gẹ ike Chileke beru. 30Lẹ nteke ndu nwụhuru anwụhu l'e-shi l'ọnwu teta nọdu ndzụ bẹ nwoke l'a-byahẹkwaa l'alụ nwanyị, nwanyị ta abyahẹ l'a-lụ ji. Whẹ l'a-dụ-gee g'ọo ndu ojozhi-imigwe. 31A bya lẹ nke oshi l'ọnwu teta nọdu ndzụ ?unu tẹke agụbudua iwhe Chileke kfuru unu l'onwiya sụ: 32‘Ọo mụbe Chileke bẹ bụ Chileke Ébirihamu, bụru Chileke nke Áyiziku, bụru Chileke nke Jékọpu.’ Ọo ya bụ lẹ Chileke ta abụdu Chileke ndu nwụhuru anwụhu, ọo Chileke ndu nọ ndzụ.”

33Igweligwe ndu ono nụle iya who, iwhe l'oozhi mee ẹhu jishihu whẹ oyi.

Iwu ọwhu kakọta mkpa

(Mak. 12:28-34; Luk. 10:25-28)

34L'ọ bya ebe nteke ndu Fárisii nụleruwho lẹ Jisọsu mewaru ọnu kpụru ndu Sádusii okfu, whẹ bya akpakọo onwowhe l'ẹka lanụ. 35A nọnyaa onye lanụ l'ime whẹ, bụ onye o-zhi-iwu bya ajịlahaa ya njịkponu, eme tẹ ya nmata iya l'ọnya. 36Ọ sụ Jisọsu: “O-zhi-iwhe ?ọo iwu ole bẹ kakọta shii l'iwhe bụ iwu ono, a tụshiru nno g'ọ hakọta?”

37Jisọsu sụ iya: “Ye Onye-Nwe-Ọha bụ Chileke ghu obu ghu g'ọ ha. Gude ndzụ ghu g'ọ ha mẹe uche ghu g'ọ ha ye iya obu ono. 38O noo iwu ọwhu bụ iya kakọta shii, bụkwaru iya whọ kakọta mkpa. 39Ọwhu kwe iya ẹbo, dụkwawho mkpa nno bụru: ‘Ye madzụ ibe ghu obu lẹge i yeru iya onwoghu.’ 40Ọo l'iwu labọ ono bẹ iwhe bụkota iwu Chileke g'ọ ha mẹe iwhe ndu nkfuchiru Chileke deru l'ẹkwo tụkoru rwụrwee ishi.”

Kuráyisutu bụ onye Dévidi l'eku; Onye-Nwe-iya

(Mak. 12:35-37; Luk. 20:41-44)

41Ọ bụru nteke ono, ndu Fárisii dzukoberu ẹka lanụ bẹ Jisọsu jịru whẹ 42sụ: “?Ndẹ-zhia g'unu l'arị iya lẹ nke Kuráyisutu ọbu? ?Ọo onye b'ọ bụ nwa iya?”

Whẹ sụ iya: “L'ọo Nwa Dévidi b'ọ bụ.” 43Ọ sụ whẹ: “?Ọ kwanụ gụnu meru iwhe Ume-Dụ-Nsọ nke Chileke meru Dévidi o ku iya ‘Onye-nwe-mu nụ’? Sụ: 44‘Onye-Nwe-Ọha, bụ Chileke sụru Onye-nwe mụbe Dévidi:

Nọdu anọdu l'ẹka-ụtara mu;

jeye nteke mu l'a-chịta ndu ọhogu ghu

dobe ghu lẹ mkpula ọkpa.’

45Ọ -bụru lẹ Dévidi bẹ kuru iya ‘Onye-nwe-mu-nụ’ ?ndẹhunu g'o gude ọ bụru nwa iya?” 46Tọ dụ onye dụ ike yeru ọnu yeru iya t'ọ kadụ mma l'ọo akpụru okfu lanụ. Nkeshi mbọku ono, tọ dụhewaro onye tụru ama nke ọji iya ajị ọdo.

Currently Selected:

Mátiyu 22: Ezaa

Highlight

Copy

Compare