Mátiyu 18

Onye kakọta shii

(Mak. 9:33-37; Luk. 9:46-48)

1Nteke onowho bẹ ndu l'etso ụzo Jisọsu byatashiaru bya asụ iya: “?Ọo onye kakọta shii lẹ ndu Chileke bụ eze whẹ?”

2Jisọsu bya ekua nwata nshịi, kuta iya kfụbe l'echilabọ whẹ, 3sụ whẹ: “Iwhe mu l'eme tẹ mu kfuru unu bụ: ọ -bụ-zhidua l'unu gbanweru bya adụ g'ọo ụnwegirima, unu ta afụkwa bụru ndu Chileke bụ eze whẹ. 4Iwhe bụ onye wozetaru onwiya alị dụ g'ọo nwata nshịi-a bẹ bụ iya kakọta shii lẹ ndu Chileke bụ eze whẹ. 5Onye ono, kwoberu iswi ẹwha mụbe Jisọsu gude obu iya nata nwata nshịi, ha ẹgube-ẹ ree-ree-ree bẹ bụakwa mbẹdua bẹ onye ọbu gude obu iya nata ree-ree-ree.”

Ọnma ọkwa ome tẹ ndu ọdo mee iwhe-dụ-ẹji

(Mak. 9:42-48; Luk. 17:1-2)

6“Ọle onye mekwanuru onye lanụ l'ụnwegirima-a, wowaru onwowhe ye mu l'ẹka-a, t'o shiswee ụzo ono b'ọ gọgo kalẹkwaruwho onye ọbu mma nggẹ l'a patarụ eze ẹwhuru-uswe libe iya l'olu, nwuru iya chee l'ẹka ogvulogvu dụ l'eze-ẹnyimu. 7Nshọo unubẹ ndiwhe, o noo l'iwhe l'alọjeru madzụ ẹka ye l'ome iwhe-dụ-ẹji bẹ jiru mgboko eji. Ọ tọ dụkwa gẹ l'ee-mezhia t'iwhe l'a-nọje alọ madzụ ẹka eye l'ome iwhe-dụ-ẹji ba adụ, ọle ọbu, nshọkwanuroo onye bụ iya bẹ l'oo-shi l'ẹka iya mbụ ẹgube iwhe ono.

8“Ọ -bụru l'ọo ẹka ghu, ọbu l'ọo ọkpa ghu bẹ l'akpatarụ ghu ome iwhe-dụ-ẹji, gbubufulekwa iya whọ tuwhaa. Ọ kakwarụ ghu ree l'i gude mkpirikpi ẹka lanụ, ọdua ị bụru nwangvụru bahụ l'ọkpobe ndzụ, amamẹ l'i nweru ẹka labọ, ọdua i nweru ọkpa labọ, a pata ghu chee l'ọku, bụ ọku mgbe agvụ agvụ. 9Ọ -bụru l'ọo ẹnya ghu l'akpatarụ ghu ome iwhe-dụ-ẹji, swọfu iya tuwhaa. Ọ kakwarụ ghu ree l'i gude ẹnya lanụ bahụ l'ọkpobe ndzụ, amamẹ l'ẹnya ghu whẹ ẹbo dzuru oke, a parụ ghu chee l'ọku-alị-maa.

Nwatụru, jewhuhuru ejewhuhu

(Luk. 15:3-7)

10“Unu kwakwaa ẹnya t'ọ bọ dụ ụnwegirima-a, onye ọwhu unu l'a-sụ woo; ẹwha kuru iya nụ kuru iya gụnu. Lẹ iwhe mu l'eme tẹ mu kfuru unu bụkwa lẹ ndu ojozhi-imigwe, l'eleta whẹ ẹnya bẹ l'anọduje-zhiawho l'iwhu Nna mu, bu l'imigwe nteke nteke. 11O noo lẹ Abụbu-Ndiwhe bẹ byarụ tẹ ya bya adzọo ndu whuhuru ewhuhu#18:11 Ụwhodu l'ẹkwo gbarụ lẹ mbụ, e deru l'okfu Giríku bẹ l'ẹte ededuaru vẹsu 21 yekobe iya ẹgube, e deru iya l'ẹka-a..

12“?Ndẹe g'unu l'arịkwanu iya? Ọ -bụkwanuru l'o nweru onye nweru ụkporo atụru ugbo ise, nnanụ jewhuhu ?onye ọbu ta apadụru ụkporo ugbo ẹno l'iri lẹ tete ọwhu haa l'ẹka ono, tụgbua jeshia je etsoru ugvu ugvu lewhee ẹnya iya ọwhuna, jewhuhuru who? 13O -nweru g'o meru, ọ whụa ya, iwhe mu l'ekfuru unu bụ: l'ọo-kwatakwa ka oteshi ẹswa iya ike amamẹ ụkporo ẹno l'iri lẹ tete ọwhu l'eteshia jewhuhu who. 14O nokwawho gẹ l'ọoto dụa nteke ọ bụje-zhia uche-obu Nna unu ọwhu bu l'imigwe t'o nweru ụnwegirima-a m'ọo onye lanụ ọwhu l'a-la l'iyi.

Okfu e kfuru nụ chọchi l'owhu nke nwanna, mesweru nụ

15“Nteke nwanna ghu mesweru ghu, jekfu iya l'ẹka ọ bụ gụ l'iya labọ nọ nwẹka unu je ekfuru iya iwhe ọbu, o meru ghu. Nteke ọ natarụ iwhe i kfuru, ọo ya bụ, gụ amarụ lẹ nwanna ghu ono bẹ i duwhuwaru azụ. 16Nteke bụ l'i kfugeeru, t'ọ nata iwhe i kfuru, gụ eduta onye lanụ, ọbu ụmadzu labọ ọdo yeru onwoghu nke ọwhu l'ọobulewho iwhe ọbu, okfu Chileke kfuru sụ: ‘Iwhe bụ okfu, darụ ada, t'ọ bụru ẹka-ebe, ụmadzu labọ l'a-gba, ọbu ẹto bẹ l'ee-gude doshia ya.’ 17Nteke bụ lẹ whẹ kfugeeru, ọ nabarụ whẹ ẹka, wota iya je atọgboru chọchi l'owhu. Nteke chọchi kfugeeru, ọ nabafụaru chọchi ẹka, ọo ya bụ, unu ezeeru iya gẹ l'eezejeru onye mbakeshi, ọkwanu onye ishi akịriko.

18“Sụa, iwhe mu l'eme tẹ mu karụ unu bụ l'iwhe bụ iwhe unu jịkaru l'ọ tọ dụdu unu ree lẹ mgboko-o bẹ Chileke nọduakwawho l'imigwe jịka iya l'ọ tọ dụdu ree. Iwhe ọwhu bụkwanu iwhe unu sarụ ẹka nata l'ọ dụ unu ree lẹ mgboko-o, bẹ Chileke nọduakwawho l'imigwe nata l'ọ dụwa iya ree.

19“Ọdo, mu l'ekfuru unu bụ: L'iwhe bụ-zhia iwhe unu dụ nwẹbo nọkobe lẹ mgboko-o gude obu lanụ kwekota; o -nweru iwhe unu kfuru nụ Chileke t'o meeru unu, bẹ Nna mu ono bu l'imigwe l'e-meru iya unu. 20O noo l'iwhe bụ ẹka adụ ẹbo ọbu ẹto dzukobe nkele ndu ọbu bụ nkemu bẹ mu nọokwa l'echilabọ ndu ọbu.”

Ẹtu onye ejo obu, ji ụgwo

21Pyita byakfuta Jisọsu bya asụ iya: “Onye-Nwe-Ọha ?ọo ụgbo ole bẹ nwanna mu l'e-meswe mu, mu agụkotaru iyẹ ya nvụ? ?Ọo ugbo ẹsaa?” 22Jisọsu sụ iya: “Waawakwa! Ọ tọ bụlekwaa ugbo ẹsaa damụ. Ọo ugbo ẹsaa ẹsaa ụzo ụkporo ẹto l'iri. 23Ọo ya bụ l'ọ waa gẹ l'ọo-dụ nteke Chileke l'e-goshi l'ọo ya bụ eze. Ọo-dụ g'ọo nwoke onye eze lanụ, meru tẹ yẹle ndu ozhi iya pyazhia nke okpoga iya. 24Nwoke ono pyazhidelewho okpoga ono, e dutashiaru iya onye ọwhu ji ụgwo ụnukurunu ẹkpa-ego. 25Nwoke ta abụ l'o nweru iwhe l'oo-gude kfụa ya. Onye-nwe-iya-nụ sụ t'e ree nwozhi ono, ree nyee ya, ree ụnwegirima ibe iya gẹ whẹ ha, rekotagezhia iwhe lile o nwe enwe t'e gude kfụa ụgwo ono. 26Nwoke ono mee nno rwezhita l'alị, byishi ikpere, ryọlahaa onye-nwe-iya-nụ ono sụ: ‘Byiko, byiko, onye-nwe-mu, lekwaa mu l'alị, tabanụa nshi hafụa mu rọo. Mu l'a-kfụkotakwa ghu-a ụgwo ono g'ọ ha.’ 27Imiko nwoke ono dụ onye eze ono. Ọ sụ iya t'o riwaro ụgwo ono, t'ọ bọ kfụhekwa iyẹ ya ilile.

28“Tọ dụ iya bụ lẹ nwozhi ono atụgburu lụfu je awhụa nwozhi ibe iya ọdo, ji iya ụgwo okpoga, l'abaa ishi. Ọ tụ iya onwiya gburumu, pyịta iya l'ẹkpiri sụ iya: ‘Kfụa mu ụgwo, i ji mu.’

29“Nwozhi ibe iya ono rwezhita l'alị, aryọ iya sụ: ‘Tanụa nshi lẹ mu l'a-kfụkwa ghu iya-a.’

30“Ọ jịka jinyia ẹnya l'ọ tọo nwụduru iya, ọ kpụta nwoke ono je atuchia l'ọka-mkpọro sụ t'ọ nọdu l'ẹka ono jeye nteke l'ọo-kfụ iya ụgwo ono. 31Tọ dụ iya bụ lẹ ndu ozhi ibe iya ọwhu awhụa ya, ẹhu dalẹ whẹ whọ kọo. Whẹ gbagbụa je atụko iwhe ono, nwụru nụ shi ishi lanụ kọkotaru onye-nwe-whẹ-nụ. 32Ọo ya bụ, onye-nwe-whẹ-nụ ono bya ekua nwozhi ono sụ iya: ‘?Ị whụru-a gụbe nwozhi-a, ejo obu l'egbu egbu-a! ?Ị whụru-a ẹgube ikpoto okpoga, i jikota mu l'ụgwo, mu hakọtaru ghu iya sụ t'i ria ya nkele ọo l'ị ryọru mu aryọ. 33?Tọ gbadụ nke t'ị whụaru ibe ghu imiko lẹge mbẹdua whụru iye gụbedua?’ 34Onye-nwe-whẹ-nụ ono gude ẹhu-eghughu kpụkata iya je akpụru ye ndu ọgbogu l'ẹka, tẹ whẹ nụje iya áwhụ jeye nteke l'ọo-kfụkota ụgwo, o ji g'ọ ha.

35“O nokwawho gẹ Nna mu, bu l'imigwe l'e-me unu l'ẹhu l'ẹhu, mbụkwa onye l'ete egudeje obu iya g'ọ ha gụaru onye mesweru iya nụ nvụ.”

Currently Selected:

Mátiyu 18: Ezaa

Highlight

Copy

Compare