Mátiyu 15

Omelalị ndụ-ichee ndu Ju

(Mak. 7:1-13)

1Ọo ya bụ, o nweru ndu Fárisii mẹe ndu o-zhi-iwu, shi Jerúsalẹmu wụru wukfuta Jisọsu. Whẹ bya asụ iya: 2“Ọo gụnu meru iwhe ndu l'etso ụzo ghu l'emebyije omelalị, shi lẹ ndụ-ichee anyi whẹ? ?Ọo gụnu meru whẹ ta akwọje ẹka akwọ tẹmenu whẹ eride nri gẹ nsọ alị ndu Ju sụru ta akwọjee ya?”

3Jisọsu sụ whẹ: “?Ndẹe ishi iwhe unubẹdua kwobekwanuru haa anọ eme iwhe Chileke sụru t'e mejee, gbee je emelahaa omelalị, madzụ doberu? 4Nkele Chileke bẹ sụru: ‘Yejeru ne ghu lẹ nna ghu ugvu;’ sụkwawho: ‘Onye whuru ne iya m'ọ bụ nna iya iwhu t'e gbua onye ono egbu.’ 5Ọle unubẹdua bya l'ekfu ekfu unu sụ: ‘Ọ -bụru lẹ madzụ bẹ sụru nna iya, ọbu l'ọo ne iya l'iwhe ya gege egude kwọo whẹ bẹ bụakwa iwhe a nụru Chileke, 6ọo ya bụ l'ọ tọ gbahẹdu nke t'onye ono ghaa ẹnya l'ẹhu ne iya lẹ nna iya.’ Unu gude l'unu l'eme omelalị, unu mee okfu Chileke ọ bụru iwhe mmaanụ. 7Lekwaa unubẹ iwe-l'obu-ọchi-l'ọnu-eze whẹ-e! Ayizáya, bụ onye nkfuchiru Chileke kfulekwaruwho okfu ẹhu unu g'unu dụ nteke o kfuchiru Chileke sụ: 8‘Ndu-a bụlekwaa eli ọnu bẹ whẹ gude akwabẹ mu ugvu,

Obu whẹ bẹ teru ẹnya l'ẹka mu nọ.

9Whẹ l'abarụ mu ẹja nggonggo.

Ọ bụru iwu, madzụ tụru bẹ whẹ l'ezhi gẹ-woo l'ọo iwu

nke mụbe Chileke.’ ”

Iwhe l'emerwuje madzụ

(Mak. 7:14-23)

10O kukoo igwe-ọha ono tẹ whẹ byakụbe iya ntse. Ọ sụ whẹ: “Unu ngabẹkwa nchị l'iwhe-e mu bya l'ekfu nggẹ o doo unu ẹnya. 11Ọ tọ bụkwa iwhe madzụ l'eri l'ọnu l'emerwuje onye ono. Iwhe l'emerwuje madzụ bẹ bụ iwhe shi madzụ l'ime obu fụta iya l'ọnu.”

12Ọo ya bụ, ndu l'etso ụzo iya byakfuta iya bya asụ iya: “?Ị marụ-a l'iwhe ono, i shi ekfu shi eghu ndu Fárisii eghu gẹ whẹ l'anụ iya?”

13Ọ sụ whẹ: “Iwhe bụ-zhia oshi ọwhu l'ẹte abụa Nna mu, bu l'imigwe gude ẹka iya dzabẹ iya bẹ l'ee-whefukwa ewhefu. 14Unu haa whẹ rọo, lẹ whẹ bụ ndu l'atsọ ìshì, l'edukwawho ndu l'atsọ ìshì. Ọ -bụru l'onye l'atsọ ìshì bẹ l'edu onye l'atsọkwawho ìshì g'ọo ya, bẹ whẹ l'a-tụkokwa dalaje l'iduma.”

15Pyita sụ iya: “Menua tẹ ẹtu ono doo anyi ẹnya.”

16Jisọsu sụ whẹ: “?Unubẹdua bẹ iwhe-e l'ete edoduaro ẹnya byeye ntaa? 17?Unu ta akabẹdu marụ l'iwhe madzụ l'eri l'ọnu bụ l'ẹwho bẹ l'ọobahuje, ya eshi ẹka ono a nyịfu iya? 18Ọle iwhe lile ọwhu shi madzụ l'ọnu bụ l'obu b'o shi iya fụta. Ọ bụkwaru iya whọ bụ iwhe l'emerwuje madzụ. 19O noo l'ọo l'ime obu madzụ bẹ l'ooshikotaje mbụ iwhe bụ-zhia ejo ọriri gẹ ejo ọriri ha, ogbu madzụ shi iya. O shi iya mbụ ọkpa lẹ nwanyị mẹe ọkpa lẹ nwokoro mẹe ori ogori mẹe ozhi oshi mẹe ọdzu ejire mẹe okfurwushi madzụ. 20O noo iwhe bụ iya l'emerwuje madzụ ndono. L'e gude ẹka, l'ẹte akwọo akwọkwo eri nri te emerwujekwa madzụ ilile.”

Nwanyị l'ẹte abụa onye Ju, woru onwiya ye Jisọsu l'ẹka

(Mak. 7:24-30)

21Jisọsu gbalihu l'ẹka ono tụgburu jeshia alị, dụ-wheru Taya yẹle Sáyịdonu mgburumgburu. 22Ọo ya bụ, nwanyị Kenanu ọbu, bu l'ẹka ono byakfuta iya bya echishia sụ: “Onye-Nwe-Ọha, tẹ imiko mu dụ ghu rọ! ?Ị nụa Nwa Dévidi. Lẹ nwa mu nwanyị bẹ ọgvu bu l'ẹhu. Ọgvu ono gude iya agwa iya ọchi.”

23Jisọsu te ekfuru okfu ilile yeru iya. Ndu l'etso ụzo iya bya aryọlahaa ya sụ: “Chịfunu nwanyị-a, l'etsowhe anyi ẹgube-ẹ, aryachishi anyi nchị-a.” 24Jisọsu sụ whẹ: “Ọ tọ dụkwa ẹka ọdo Chileke zhiru mu tẹ mu jee, gbahaa tẹ mu jekfu ndu Ízurẹlu, bụ ụnwu atụru tuwhashihuru etuwhashihu.”

25Nwanyị ono bya adaa l'iwhu Jisọsu sụ iya: “Onye-Nwe-Ọha, byiko yeru mu roo ẹka!”

26Jisọsu sụ iya: “Ọ tọ dụdu ree t'e wota nri ụnwegirima nụ ụnwu-nkụta.”

27Nwanyị ono sụ iya: “Ee, l'ọ dụa nno, Onye-Nwe-Ọha, ọle ọbu mẹ ụnwu-nkụta l'akabẹjekwaa tụtua ụnwu onu nri dashịru l'alị nteke onye-nwe-whẹ nu l'eri nri.”

28O kfulewho nno, Jisọsu sụ iya: “Aa-oo! Gụbe nwanyị ọwa, ekwekwe nke ghu habụkwaa shii. Tẹ Chileke meeru ghu iwhe ono, mkpa iya dụ ghu.” Shitalewho nteke ono gẹdegede, nwatibe nwanyị ono mehu.

Jisọsu l'eme tẹ igweligwe ndu ẹhu l'adụa mma mehu

29Jisọsu shi l'ẹka ono tụgbua ọdo je etsoru agụga agụga eze-ẹnyimu Gálili ogologo. O shiwaro ẹka ono je enyihu eli ugvu, je anọdu. 30Ọ nọdu l'ẹka ono, igweligwe madzụ wụru byakfutashia ya; edutakaaru iya ndu ngvụru mẹe ndu ẹhu l'edzua oke mẹe ndu l'atsọ ìshì mẹe ndu l'ete ekfu okfu mẹwaro igweligwe ndu ọdo iwhe l'emekaa. Whẹ bya achịru whẹ wụshi iya l'iwhu. O mee whẹ, whẹ mehukota. 31O noo ya, iwhe ono dụkota igweligwe ndu ono biribiri gẹ whẹ whụru lẹ ndu l'ete eshia ekfu okfu kfulahaaru okfu; ndu ẹhu l'edzua oke, ẹhu dzua whẹ oke, ndu ngvụru jelahaa ije, ndu l'ete eshia awhụ ụzo bya awhụlahaa ụzo. Whẹ jalahaa Chileke ndu Ízurẹlu ajaja.

Jisọsu l'anụ ụnu madzụ iri nri

(Mak. 8:1-10)

32Jisọsu bya ekua ndu l'etso ụzo iya sụ whẹ: “Imiko igweligwe ndu-a dụakwa mu, unu awhụa lẹ mu lẹ whẹ nọwaru ujiku ẹto ntaa l'ẹka-a, tọ hẹ l'ọ dụkwadu nri whẹ gude, whẹ l'e-ri. Mu ta adụkwanu ike asụ whẹ tẹ whẹ swịru ẹgu lashia. Lẹ mu -kfua ya nno bẹ ọdamba l'a-tụkwa whẹ l'ụzo mẹ whẹ ladẹ.”

33Ndu l'etso ụzo iya sụ: “?Ọo awee bẹ anyi l'a-whụkwanu buredi l'e-dzukota igbudu iwhe-e, dọru l'echi-ẹgu l'ẹka-a.”

34Jisọsu sụ whẹ: “?Ọo ishi buredi ole bẹ unu gude?”

Whẹ sụ iya: “Ọo ẹsaa, ọwaa ụnwu-ẹma olemole, lị iya nụ” 35Ọo ya bụ, ọ sụ tẹ igweligwe ndu ono nọdukota anọdu l'alị l'ẹka ono. 36Ọ bya achịta ishi buredi ẹsaa ono mẹe ẹma ono bya ekelegee Chileke ekele, o kelegelewho Chileke ono; ọ nyawashịa ya nụ ndu l'etso ụzo iya, ndu l'etso ụzo iya bya ekeeru iya igweligwe ọha ono, kedzukotaru whẹ iya. 37Gẹ whẹ ha ritagee rijishia ẹwho. Whẹ bya atụtukoo ibiribe iya ọwhu whẹ riwhodoru. O ji nkata-ivu ẹsaa. 38Ndu riru nri ono l'unwoke dụ ụnu ugbo iri, t'a gụfukwaro ụnwanyi mẹe ụnwegirima.

39Ọ sụ ndu ono tẹ whẹ lashiwaro, yẹbedua bahụ l'ụgbo tụgbua jeshia alị Magadanu.

Currently Selected:

Mátiyu 15: Ezaa

Highlight

Copy

Compare