Ozhi ndu ishi-ozhi 22

1“Unubẹ ụnwunna mu mẹe nna mu whẹ! Unu ngabẹ nchị tẹ mu gọo ẹgo ishi mu l'iwhu unu.” 2Whẹ nụa l'ookfu okfu Arámayiku, tọ dụheduwaro onye mebaaru pyịmu. Pọlu wata ooye ọnu sụ:

3“Mu bụ onye Ju, a nwụru lẹ Tásọsu Silísiya. Ẹka, a nọdu hee mu hefuta bụ lẹ Jerúsalẹmu l'ẹka-a. Onye zhiru mu ẹkwo bụ Gamáliyelu. O zhikota mu iwu ndụ-ichee anyi whẹ, rwụa mu iya arwụ lẹ nchị. Ọo gẹ unubẹdua, tụkoru nọdu l'ẹka-a l'adzọshi nke Chileke ike-e bụ gẹ mbẹdua shi adzọshi iya. 4Ndu shi etso Ụzo nke Onye-Nwe-Ọha ono bẹ mu shi akpashịje ẹhu ike shinene, mbụ l'ọo egbugbushi bẹ mu shi anọje egbugbushi whẹ. Mu shi egudeje unwoke whẹ mẹe ụnwanyi whẹ, tụa whẹ mkpọro. 5Onye ishi ndu l'agbajẹ ẹja nụ Chileke mẹe ndu bụ ọgurenya unu bẹ l'a-gbakwaa ẹka-ebe l'iwhe-e mu l'ekfu bụa ọkpobe-okfu. Mu jeru je anata whẹ ẹkwo, e deru nụ unwune anyi ndu Ju, bụ lẹ Damásukọsu, mu jeshia ẹka ono tẹ mu je egudeshia ndu kwetaru nke Jisọsu tụa whẹ mkpọro kpụru bya Jerúsalẹmu t'a hụa whẹ ahụ.

Pọlu l'akọ gẹ ndzụ iya gude gbanwee

6“Ọo ya bụ, mu l'ejekwaro iwhe mu l'eje, mu rwudelewho Damásukọsu g'ẹnyanwu l'alwawaa l'ishi, iwhoro shilewho l'igwe bya enwua zaa, nwuwhe mu mgburumgburu.

7“Mu daa kpube iwhu l'alị. Mu nụa olu-okfu, sụru mu: ‘Sọlu! Sọlu! ?Ọo gụnu meru l'ịikpa mu ẹhu?’

8“Mu sụ iya: ‘?Ọo onye b'ị bụ, Onye-Nwe-Ọha?’

“Ọ sụ mu: ‘Ọo mu bụ Jisọsu, onye Názaretu, bụ onye ọbu, l'ịikpa ẹhu.’ 9Ndu mu lẹ whẹ lị whụa iwhoro ono, ọle whẹ ta anụhedu okfu ono, onye ono l'ekfu eyeru mu.

10“Mu jị sụ: ‘Onye-Nwe-Ọha ?ọo gụnu bẹ mu l'e-me?’ Ọ sụ mu tẹ mu gbalihu bahụ lẹ Damásukọsu. Lẹ mu -rwuwaro ẹka ono bẹ l'aa-kọru mu-a iwhe lile, ọ dụ Chileke nke tẹ mu meeru iya. 11Iwhoro ono mee mu, mu tsọlahaa ishi. Ndu mu lẹ whẹ lị gude mu ẹka, anyi bahụ Damásukọsu.

12“Anyi rwua ẹka ono, o nweru nwoke, ẹwha iya bụ Ananáyasu, bụ onye Chileke dụru lẹ nsọ. Nwoke ono l'emekotaje iwhe iwu sụru t'e mejee, ọ bụru onye ndu Ju lile, bukota l'ẹka ono l'eyeru ẹso. 13Ananáyasu ono byakfuta mu bya akfụkube mu sụ: ‘Sọlu nwune mu, watawarọ ọwhu ụzo ọdo!’ Nteke onowho, mu whụlahaa ụzo, mu whụa ya. 14Ọ sụ mu: ‘Lẹ Chileke ndụ-ichee anyi whẹ bẹ họtawaru gụbe Sọlu t'ị marụ iwhe dụ iya l'uche, t'ị whụa onye ono, bụ iya nwẹkiya bụ onye dụ chịriri ono, nụa iwhe l'ookfu l'onwiya. 15L'iwhe meru ọ dụ nno bụ lẹ gụbe Sọlu l'a-gbarụ iya ọdzori l'iwhu ndiwhe mgburumgburu, kfuaru madzụ lile iwhe ono, ị whụru ono mẹe iwhe ono, ị nụru lẹ nchị ghu. 16Sụa, ntaa ?ọo gụnu ọdo b'ị ngabẹbaaru? Gbashi t'e mee ghu baputizimu, safụ ghu iwhe-dụ-ẹji, i metagbaberu m'i kfuwaa l'ị natawaru Jisọsu, ọ bụwaru Onye-nwe-ghu-nụ.’

Pọlu l'akọ lẹge Chileke zhiru iya tẹ ya je ezhia ndu l'ẹte abụa ndu Ju ozhi-ọma

17“Ọo ya bụ, mu dawhushia azụ lẹ Jerúsalẹmu. Mu nọdu l'eze-ụlo Chileke l'ẹka mu l'ekfu anụ Chileke whụa awhụ, whụa Onye-Nwe-Ọha. 18Ọ sụ mu: ‘Mee ẹgwegwa lụfu lẹ Jerúsalẹmu, lẹ ndu ẹka-a ta angakwa nchị l'iwhe l'ii-kfu l'okfu ẹhu mụbe Jisọsu.’

19“Mu sụ: ‘Onye-Nwe-Ọha mẹ whẹ tụkokwaru-a makọtaru ree-ree-ree lẹge mu shi ejekotaje l'ụlo-ndzuko ndu Ju, je atụa ndu l'etso ụzo ghu mkpọro sụ t'e chia whẹ iwhe. 20Nteke e gburu onye nke ghu, bụ Sutívinu bẹ mu nọkwaa l'ẹka ono, mbụkwa mu zụkwaa mgbede l'egbugbu, e gburu iya dụ ree. Ọ bụru mbẹdua bẹ nọdu swiru uwe ndu jeru je atugbua ya l'ẹwhuru.’ 21Onye-Nwe-Ọha sụ mu: ‘Tụgburu jeshia, mu l'e-zhi ghu ẹka teru ẹnya t'i jekfu ndu l'ẹte abụa ndu Ju.’ ”

Pọlu yẹle onye ishi ndu ojọgu

22Ndu ono dalẹkwawho nwanjii ngabẹ nchị l'iwhe ono, Pọlu l'ekfu jeye o kfulewho nke ndu l'ẹte abụa ndu Ju ono, whẹ swolihu sụ: “Unu dufu iya l'ẹka-a, unu dufukwa iya who l'ẹka-a! Gbua ya! Gbua ya! Ọ tọ bụkwa ẹgube onye dụ nke ọnodu ndzụ!” 23Whẹ l'ata wọkowoko ekpushi uwe whẹ, ekpokaa ivovonyi agha l'imeli. Ọ bụkwanuru ẹhu l'eghu whẹ eghu. 24Eze onye ishi ndu ojọgu ndu Romu ono sụ tẹ ndu ojọgu kpụba Pọlu lẹ mbareke ndu ojọgu. Ọ sụ whẹ tẹ whẹ chia ya iwhe t'a maadarụ, ?l'oo-kfu iwhe bụ iya kpatarụ iwhe ndu Ju l'adaji ẹgube-ẹ?

25A bya ekegelewho Pọlu ẹgbu nke t'e chia ya iwhe, ọ sụ onye ishi ojọgu ndu Romu lanụ, kfụru l'ẹka ono: “Mu sụru agha ?l'eechije onye Romu iwhe l'ẹbe abụ l'eekperu onye ọbu ikpe t'a marụ iwhe ọbu, o meru?”

26Onye ishi ojọgu ono, l'achị ndu ojọgu ụkporo ise nụa ya, ọ bya ejekfu eze onye ishi ndu ojọgu whẹ je asụ iya: “?Ị marụ-a iwhe ị sụru t'e mee? Ị marụ-a lẹ nwoke-e bụ onye Romu?”

27Eze onye ishi ndu ojọgu ono bya ejekfu Pọlu je asụ iya: “?Ọo l'ezhi l'ị bụ onye Romu?” Pọlu sụ iya: “Ee!”

28Eze onye ishi ndu ojọgu ono sụ iya lẹ ya kfụkwaru oke okpoga, parụ ẹka tẹmenu ya bụru onye Romu.

Pọlu sụ iya: “Obenu lẹ mbẹdua b'a nwụru, mu bụru onye Romu.” 29Ndu ono, l'emewaa tẹ whẹ bya ajịa Pọlu ajị parụ iya haa. Eze onye ishi ndu ojọgu ono tsụde egvu g'ọ nụru lẹ Pọlu bụ onye Romu. Ọ bụru nwa Romu b'ọ tụru mkpọro.

Pọlu nọ l'iwhu ọgbo-ikpe ndu Ju

30O rwua echile iya, eze onye ishi ndu ojọgu ono sụ t'a tụfu Pọlu mkpọro. Ọ bya ezhia tẹ ndu l'agbajẹ ẹja nụ Chileke mẹe ndu ọgbo-ikpe dzukotagezhia. Whẹ dzulewho, o duta Pọlu bya eduru dobe whẹ l'iwhu. Iwhe l'ọocho-zhiawho bụ tẹ ya marụ iwhe ndu Ju gudeturu Pọlu.

Currently Selected:

Ozhi ndu ishi-ozhi 22: Ezaa

Highlight

Copy

Compare