Roma 7

Gwɔrɔ-há e ra weneng

1À begwa, ma sé ha na yin sede bemat de ba tɔk badu. Mwin, yin a tɔk, badu ba vɔk reto e ra mwat jeng de a rɔngɔl kwen zɔng. 2Sede ngan: Redu weneng re rɔgɔs hwâ weneng na rwas mɛ mwa jeng de rwas o a sé kwen. Ko ka sede rwas o a ku, hwā mo a ga tɛ́ ɛ washak yi e redu mo. 3Yaga ano, ka sede a wuna hɛ na mwat hwak e jeng de rwas mɛ a rɔngɔl kwen, ko bê ye, a sé ra nejwang. Ko ka sede rwas mɛ a ga ku, hwā mo a ga tɛ́ ɛ washak yi e redu weneng o. Ka sede a ra weneng na mwat hwak e bamâ pyɛ́ yane, ko a sé ra nejwang wɛt.

4Ano arɔng, à begwa hom, e rà rehâ Badu à — yin a ga kushu. Yin a wuna hin na rebêk Kristi, na yin a bin tɛ́ in vining na yɛ de ba sene hɛ yi e reku. Yi ano, wot e tɔk ra tomong rat de be tɛ̀ be nɔ̂ng Dagwi nerey. 5Jeng de wot á sè sangal e ji negwɔn mot ne bemasi, ko Badu mo ba sene cwey pyɛ̂ banɛn de ya sé ra fwom e babek mot. Yi ano, pyɛ de wot a ra ya rɔda kyè na wot vɔk e reku. 6Ko a remo, ba ga vibis hot yi e Badu mo. E rà rehâ pyɛ́ de yá kana rɔgɔs hot a raane — wot a ga ku. Yaga ano, wot e ra a Dagwi fwom e gwong pwas de Gabik mɛ he dura a wot. Ko wot e to ra gwɛ e gwong roso wɛt gwomo de gwo raa badu de bà kana jɛk vɛ zɔng.

Badu be tɛ̀ bemat be ra banɛn

7Wot ê ye ala arɛt? Badu ba sé banɛn arɛt? Kée wey! Ko á sè e Badu de bá tɛ̀ na me tɔk pyɛ de be tâng yɛ, à banɛn. A sé mwin, ma yâng tɔk rehâ marâ yis wɛt, ka sede Badu ba yâng ye wɛt wɔgɔ, “Hwo mara yis wɛt.” 8Ko banɛn ba sɛ̀ gwong yi na redu mo, na re tɛ̀ yey hom ye sila na cwey marâ yis detidetu. Ka badu ba sɛ́ wɛt, ka banɛn ba yâng sé sede pyɛ de ya vɔk reto wɛt. 9Raane jeng de ma tɔk badu wɛt, ma sè kwen. Ko jeng de ma ba tɔk redu, banɛn bá vey sene na neken e ji hom, 10ko á sè sede ma pere ku. Ko ma di, redu remo de ba tɛ̀ na re vey na neken ra vey na reku. 11Ko banɛn ba sɛ̀ gwong yi na redu mo, ba kwɛlɛng me. Banɛn o ba to mɔrɔ me yi na redu mo. 12Ano kwong, Badu mo ba sé jɛrɛ, ko redu ra sé jɛrɛ, ra to sé cik, ko ra sé rat arɔng.

13Ko sɛ̌, e pyɛ de ya sé ryat de ya vey a me na reku arɛt? Tyɔng tyɔng wɛt! Hâ mwin a het ngan: Banɛn ba ra fwom na pyɛ de ya sé ryat, ko ba vey a me na reku. Hemo ha té, yaga na be bin dura tô vɛ wɛshɛrɛk, ba sé pyɛ vyes. Ano kwong, redu ra tɛ̀ be di, banɛn ba sé pyɛ vyes vit a yere mo.

Badu baba de be ra yol e ji bemat

14Wot a tɔk, Badu mo ba sé yi na Dagwi, ko me ma sé mwasi zɔng. Ma tɛ́ me sam banɛn. 15Ma tɔk pyɛ de ma sé ra wɛt. Yaga pyɛ de ma sé simo me ra, e yɛ de me ra wɛt. Ko pyɛ de me kyɛ́ me yɛ ding-ding, e yɛ de me ra. 16Ka sede me ra pyɛ de me simo me ra wɛt, ko me ye, “Ey, Badu mo ba sé barat.” 17Ko e ji hâ mwin, a to sé e me pyɛ hom de me ra pyɛ mo wɛt, ko a sé e banɛn de ba sé sangal e ji yey hom. 18Ma tɔk, vit a pyɛ cak ryat de ya sé sangal e ji hom wɔgɔ, e ji me de ma sé mwasi zɔng. Yaga ma vɔk cwey râ pyɛ de ya sé ryat, ko me kyɛm me ra yɛ wɛt. 19Pyɛ de me ra, e yɛ à pyɛ ryat wɛt de me simo na me ra. Ko neves de me simo me ra wɛt, e nɛ de me sǎ e de ra mo. 20Ka me ra pyɛ de me simo me ra wɛt, hemo he dura, a to sé e me pyɛ hom de me ra yɛ wɛt, ko a sé e banɛn de ba sé sangal e ji yey hom de be ra yɛ.

21Yaga ano, ma di pyɛ de ye té e ji hom a yemo ngan: Jeng de me simo na me ra pyɛ ryat, pyɛ vyes ye tik me wɛt. 22E ji yey hom e hwomo, ma vɔk yey pyɛng yaga badu de ba vey yi na Dagwi. 23Ko ma di badu baduk bahak de be ra fwom e rebek hom. Ba sé badu de be ra yol tanga badu de báre hom he simo. Be tɛ̀ me sè mwât ngyang wo badu banɛn de be ra fwom e rebek hom. 24Ányé yee! Ma ga tɛ́ me pyɛ nemwishish tyɔng wɛt! E wà de a rɔda sey ɛ̀ me yi e rebek remo de re kyè na me vɔk e reku arɛt? 25Ey yàa! Ma feng a Dagwi de a ra ano yi na Yɛsu Kristi, Darwey mot!

Ano kwong, me pyɛ hom, ma sé sam de e raa badu Dagwi e báre hom, ko ma sé sam de e raa badu banɛn e negwɔn hom ne bemasi.

Currently Selected:

Roma 7: bomBI

Highlight

Copy