Roma 3

1Ma ye ngan, e gwɛ̌ gwong kwong de BeYuda ba dal mɛ̀ bwang bemat arɛt? Wɔ́ e cwɛl ha vɔk sɛlɛ arɛt? 2Ey, ha vɔk gbɔng sɛlɛ e kagwɛ gwong! E mɛsɛng o, Dagwi à kana tik reha mɛ e vɔ mɛn. 3Ko mwin, behak e ji mɛn ba tik nà gyeng reha mo na yey mɛn mwa. Ko ala arɛt? Hemo he tɔk tɛ̀ Dagwi a tik nà ra pyɛ de á kana ha arɛt? 4Tyɔng tyɔng wɛt! Dagwi e dopse ha tsak há zɔng, mwa ano de kawɛ mwat e ha bɔs. Sede remo de bà jɛk e Bwok-basa Dagwi wɔgɔ,

“Kayɛ jeng de hwó hanat,

ba rɔda di wɛshɛrɛk, neha mō na sé cik.

Ko kayɛ jeng de ba rɔda tɛ̀ sekun mō,

hwà rɔda dopse di wɛng e ra yɛn.”

5Ko ka sede pyɛ́ de wot e ra, yēmo de ya sé cik wɛt ye tɛ̀ be gwɛ̌ di wɛshɛrɛk wɔgɔ, pyɛ́ de Dagwi e ra ya sé cik, ko wot ê ye ala arɛt? Wot ê ye, jeng de Dagwi a tɛ̀ shom mɛ ye hwo e ra wot, a ra pyɛ de ya sé cik wɛt arɛt? Ma sé ha e ngamo e gwông hâ mwasi zɔng. 6Ko me toyo na há wɔgɔ, tyɔng tyɔng wɛt! Ka Dagwi a yâng gas badu e tē wɛt, ka a yâng ra a jey shɔt e rɛ̌ arɛt?

7Gyeng rɔ̌ mwat hwak a rɔda ra cuna sede ngan: Ma sé ha bɔs, ko hâ bɔs hom hê tɛ̀ bemat be gwɛ̌ di gbɔng nerât Dagwi, yaga yɛn a di kyɛrɛng, e ha tsak o. Ka sede ano, yaga sɛ́ kwong de be rɔɔ gangas me na shɔt wɔgɔ, ma sé mwât banɛn arɛt? 8Yaga ano, bemat behak be ye, “Tik na wot a ra neves, yaga na nerat ne vey yi e nɛ.” Há ma hane de behak ba ye, wot e ha hɛ, ko yɛn a ha há mo, yaga na be lashe baza mot. Ko shɔt de Dagwi a rɔda gang ɛn na yɛ ya rɔda jam a yɛn.

Vit a mwat de a sé cik e bayîs Dagwi

9Wot a rɔda yɛnɛ há hemo e rɛ̌ arɛt? Wot BeYuda wot a dal bemât yére dyuk arɛt? Wey, ko tyɔng wɛt! Wot a ga kana dura wɔgɔ, BeYuda mwa hɛn na bemât yére dyuk ba sé e nɛ̂n retô banɛn. 10Sede remo de bà jɛk e Bwok-basa Dagwi wɔgɔ,

“Vit a mwat ko gwining de a sé cik e bayîs Dagwi,

11vit a mwat de a tɔk pyɛ cak ryat,

vit a mwat de e jāma na a sè na Dagwi.

12Mwa hɛn ba ga doyo yi e gwông Dagwi,

ko mwa hɛn ba ga tɛ́ ɛn yapyi.

Vit a mwat ko gwining de e ra pyɛ́ ryat.

13Bahwɔ́k mɛn ba sé sede besak de ba sé pyot,

ko be kwɛlsɛng bemat na balem mɛn.

Neha de ne nunus yi e nenu mɛn na sé sede nedɔ̂m bègàbak.

14Nenu mɛn na sila na sedusa tanga neha de na sé kpashak.

15Bol mɛn be kyè dey-dey vɔk e de lushâ nemî bemat.

16E kagwɛ gwong de yɛn e kwey ɛ̀, yɛn e wey na pyɛ́,

ko be to vey na gawey.

17Yɛn a tɔk gwong de gwo vey na sangâl netyang na bemat wɛt.

18Yɛn a vɔk bengyip Dagwi e begwong mɛn wɛt.”

19Ko di, wot a tɔk, kayɛ pyɛ de bà jɛk e Badu Dagwi ya sé yaga vemo de ba ga sey Badu mo, na be gyeng vɛ. Yaga ano, vit a mwat de ê tɔk tó cuna, ko Dagwi a rɔda ba ra a bemât mwa e jey shɔt. 20Yaga vit a mwat de a sé cik e bayîs Dagwi yi na gyeng Badu. Ko pyɛ de Badu mo be ra ya sé ngan: Be tɛ̀ bemat be tɔk, ba ga ra banɛn.

Mwat e sè cik e bayîs Dagwi yi na sêy tsak o

21Ko a remo, Dagwi a ga dura a wot gwong de mwat a tɔk sè cik e bayis mɛ. Gwong o gwo raa Badu mo wɛt, mwa ano de Badu Mose tanga bezarap Dagwi bà kana nɔng nuha e ra gwɛ. 22Gwong a gwomo ngan: Dagwi e tɛ̀sɛ bemat be sè cik e bayis mɛ yi na sêy tsak o na Yɛsu Kristi. E ragas ano yaga mwa vemo de ba sey tsak o na Kristi. E ragas ano arɔng sana dura kasâ bemat behak, 23yaga bemât mwa ba ga ra banɛn, ko yɛn a radɛ hɛn nà wul gbɔng nerey de Dagwi e nɔngɔs. 24Ko Dagwi a ga dura a yɛn nerat mɛ e nɔrɔ; yi ano, a ga tɛ̀ ɛn cik e bayis mɛ. A ga ra ano yi na Kristi Yɛsu de a vibis hɛn. 25Dagwi a nára Kristi mo sede nɔrɔ̂ yas de be yɛt, yaga na a tɛ́ ɛ gwong de gwo tɛ̀ be tɔk hàla a bemat banɛn. A tɛ́ ɛ gwong o yi e shushû nemi mɛ e jeng reku; ko be hàla a bemat banɛn, ka sede yɛn a sey tsak o na yɛ. Dagwi a ra ano, na a dura a bemat, yɛ e gas badu e tē. Yaga raane, à kana niri, ko à hàla nà tabak hɛn yaga banɛn de yɛn à kana ra gyam. 26Ko e jeng yemo, a ga yong gwông halsa a bemat banɛn, yaga na a dura a bemat mɛ̀, e gas badu e tē. Yi ano, Dagwi e to dura, yɛ pyɛ mɛ a sé cik, ko e tɛ̀sɛ mwa bemat de ba sey tsak o na Yɛsu cik e bayis mɛ.

27Yaga ano, pyɛ cak ya sé de wot e tɔk dak kaa e ra yɛ arɛt? Vit a pyɛ cak! Yaga sɛ́ arɛt? A sé yaga wot e gyenges Badu arɛt? Wey! A sé yaga wot a sey tsak o na Yɛsu Kristi. 28Yaga wot e di, mwat e sè cik e bayîs Dagwi yi na sêy tsak o zɔng, ko a sé yi na gyeng Badu wɛt. 29Dagwi a sé Dagwi wo BeYuda zɔng arɛt? Ko a sé Dagwi wo bemât yére dyuk arɔng wɛt arɛt? Ey, a sé wo yére dyuk arɔng, 30sede remo de a sé gwining zɔng. E yɛ de a rɔda tɛ̀ vemo de ba ga yosom hɛn be sè cik e bayis mɛ yi na sêy tsak o mɛn. Ko a rɔda ra a vemo de ba ga yosom hɛn wɛt tyɛng ano yi na sêy tsak o yerê hane mo. 31Hemo he dura, wot a sé gang Badu e bama yi na sêy tsak o hemo mo arɛt? Kée wey! Wot a sé kaba Badu mo gak e negya.

Currently Selected:

Roma 3: bomBI

Highlight

Copy