Roma 10
10
1À begwa, ma tɛ̀ e yey hom, ko me ra won na Dagwi na be sey nekên BeIsrayɛl. 2Yaga me tɔk nɔng nuha e ra yɛn wɔgɔ, yey mɛn ye hwɔshɔ na be ra a Dagwi fwom. Ko gwong de yɛn e jāma be ra ano gwa sé e ra tɔ́k de ha sé mwin wɛt. 3Yɛn a dun gwong de Dagwi e tɛ̀sɛ bemat be sè cik e bayis mɛ, ko yɛn a jāma na be tɛ̀ gwong o mwɛn detu. Yi ano, yɛn a kyɛ́ ɛn nà raa gwong de Dagwi e tɛ̀sɛ bemat be sè cik e bayis mɛ. 4A sé e Kristi de a tɛ̀ Badu be to vɔk reto wɛt, yaga na Dagwi a tɛ̀ kawɛ mwat de a sey tsak o a sè cik e bayis mɛ.
Dagwi ê sey bemât yére dyuk arɔng
5Mose à jɛk e ra gwong de be tɛ̀sɛ bemat be sè cik e bayîs Dagwi yi na gyêng Badu. À ye ngan: “Mwat de e gyeng Badu a rɔda sɛ̀ neken yi na vɛ.” 6Ko e ra gwong de be tɛ̀ bemat be sè cik e bayîs Dagwi, gwomo de gwa sé yi na sêy tsak o, à ye, “Hwo kwon yâng tó mo wɛt wɔgɔ, ‘E wà de a rɔda tut e lagwi arɛt?’ ” wɔgɔ, na a wɔ̀ vey na Kristi e ngamo e vwel. 7“Kɛ hwo to ye wɛt wɔgɔ, ‘E wà de a rɔda gyirik vɔk e hwomo e nɛ̂n vwel arɛt?’ ” wɔgɔ, na a wɔ̀ vey na Kristi e rak o yi e ji vemo de ba ga kushu. 8Ko bà jɛk sɛ́ e Bwok-basa Dagwi arɛt? Bà jɛk wɔgɔ, “Hâ Dagwi ha sé bagat na hwo; ha sé e nu mō tanga e yey mō.” E hɛ à há de ha ye, be sey tsak o na Dagwi, ko e hɛ de wot e shara a het ngan: 9Ka sede hwà hanat wɛshɛrɛk na nu mō wɔgɔ, “Yɛsu a sé Darwey”, na hwo sey tsak o e yey mō wɔgɔ, Dagwi a sene hɛ yi e reku, ko ba rɔda sey neken mō. 10Yaga a sé na yey de mwat e sey tsak o, ko Dagwi e tɛ̀ ɛ na a sè cik e bayis mɛ. A to sé yi na nu mɛ de mwat o e hanat wɛshɛrɛk wɔgɔ, Yɛsu a sé Darwey, ko Dagwi e sey neken mɛ. 11Sede remo de bà jɛk e Bwok-basa Dagwi wɔgɔ, “Kawɛ mwat de a sey tsak o na yɛ a rɔda vo rekyen wɛt.” 12Vit a pyɛ de ya gas BeYuda na bemât yére dyuk. A sé e Darwey gwining de a sé Darwey mɛn mwa, ko e tɛ̀sɛ nerat mɛ shɛrɛk e ra mwa vemo de be yishi hɛ na a sɛlɛ hɛn. 13Sede remo de bà jɛk wɔgɔ, “Kawɛ mwat de e yishi Dagwi na a sɛlɛ hɛ, ko Dagwi a rɔda sey ɛ.”
14Ko yi e rɛ̌ de yɛn a rɔda yishi mwat de yɛn a ga sey tsak o na yɛ wɛt na a sɛlɛ hɛn arɛt? Ko yi e rɛ̌ de yɛn a rɔda sey tsak o na womo de yɛn a ga wok há hak e ra yɛ wɛt arɛt? Yi e rɛ̌ de yɛn a rɔda wok, ka sede mwat hwak a shara a yɛn há mo wɛt arɛt? 15Ko yi e rɛ̌ de yɛn a rɔda wɔ̀ shara há mo, ka sede ba tomo hɛn wɛt arɛt? Sede remo de bà jɛk e Bwok-basa Dagwi wɔgɔ, “A sé gbɔng pyɛ yey pyɛng na be di vêy bemat de ba pom na yɛgɛt yat!”
16Ko a sé e mwa bemat de ba sey Yɛgɛt Yat wɛt. Yɛshaya à kana ye gyam, “À Darwey, e wà de a ga sey tsak o na há de ba tomo hot mɛ̀ arɛt?” 17Ano kwong, bemat be sey tsak o, yaga yɛn a wok há mo, ko be wok há mo, yaga ba shara a yɛn há e ra Kristi.
18Ko me rangal ngan: Yɛn a ga wok há mo wɛt arɛt? Ey mwin, yɛn a ga wok; sede remo de bà jɛk wɔgɔ,
“Ba wok tɔ̀ betom mɛn e jêy mwa,
ko ba wok neha mɛn vɔk e neyɛnɛ̂ jêy mwa.”
19Ko me to rangal, me ye ngan: BeIsrayɛl ba tɔk pyɛ yemo mo wɛt arɛt? Mose a sé wo susu mo de à toyo na há, à ye,
“Mê tɛ̀ in na yin a bɛrɛng vemo de ba sé yére bemat jey wɛt ves;
mê tɛ̀ in na yin a vɔk shôm yére bemat jey de ba vɔk tɔ̂k pyɛ́ wɛt.”
20Ko Yɛshaya à ha na yey ting de ya dal ano há de Dagwi a ye,
“Bemat de ba jāma me wɛt ba sɛ̀ me.
Ma dura tó hom wɛshɛrɛk na vemo de ba rangal kwɔn de ma sé ɛ̀ wɛt.”
21Ko e rà rehâ BeIsrayɛl à ye há de Dagwi à ha wɔgɔ,
“Yimo nagasi vɔk e nahywegelek, ma ga nára vɔ hom,
yaga na me bin sey mɛ̀ bemat de be gyeng há hom wɛt, ko ba to sé gbàrak arɔng.”
Currently Selected:
Roma 10: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
