Yona 2
2
Won Yona he feng a Dagwi
1Ano kwong, Yona a ra a Dagwi Darwey, Dagwi mɛ won yi e ji jîm gwotɔk o, 2a ye,
“Ma sé yila Dagwi Darwey yi e reyɔm hom,
yaga na a toyo a me mɛ.
Ma sé mok yi e kwɔ̂n bevuvwel,
ko wok fwɔ hom.
3Hwà bomo me e kwɔ̂n ciwil,
e hwomo e tê gworep,
e kwɔn de tɛmɛ-nshi na gwɔrɔ me,
ko fulu na bagun nshi ba kweres e ra me.
4A remo ma tɔk di, ‘Ba ga ro me yikyik yi e nuyel mō.
Mê tɔk to ba di Gbɔng Duk Re Fongol mo wo jɛrɛ a?’
5Nshi mo na vêy vey vo me e fwɔ,
gworep o gwa gwɔrɔ me,
ko serê gworep sa hanas hɛ e rato.
6Ma ye pyɔp vɔk e hwomo e nɛ̂n berakû ji nshi,
vwel o ha bang me na ri hɛ gbak-gbak,
ko hwo, à Dagwi Darwey, Dagwi hom,
hwô tɔk pat me kwen yi e revɔng o.
7Me wok neken hom, ne kyè wɔ̀ tala hɛn,
ano ma sé doyo vey na hwo, à Dagwi Darwey,
yaga na won hom he wul vey na hwo
e Gbɔng Duk Re Fongol mo wo jɛrɛ.
8Yɛn vemo de be sap ci
de ya vɔk nerat nehak wɛt,
pyɛ́ de yɛn e tɛ̀ gap mɛn o e ra yɛ,
yê hala hɛn.
9Ko me, mê somo hwo na râ lɛlɛ̂ feng,
mê nára a hwo nɔrɔ̂ pyɛ̂ rangas,
mê sila a hwo pyɛ̂ mwa de ma sira a hwo.
Sêy neken ha yi na Dagwi Darwey.
10Ko Dagwi Darwey a nɔ̂ng gwotɔk o nu, ko gwa hwɔs Yona e rekwogom.”
Currently Selected:
Yona 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
