Yɛzɛkyɛl 48
48
Gas a yére Israyɛl vwel o
1Bazâ yére Israyɛl ma vemo. Bak vwel o wo Dan wa sé yi e yɛnɛ̂ rwa bato wo Gworep Tē. Wa kwey e Hɛtlɔn vɔk e rwi Hamat, pere vɔk e Hazar-ɛnɔn de wa sé e yɛnɛ̂ vwêl Damaskus yi e rwa bato e hagât Hamat, ko wa peres yi e rwa rak vɔk e rwa ta. 2Bak o wo Ashɛr wa sé e hagât bak o wo Dan yi e rwa rak vɔk e rwa ta. 3Bak o wo Naftali wa sé e hagât wo Ashɛr yi e rwa rak vɔk e rwa ta. 4Bak o wo Manase wa sé e hagât wo Naftali yi e rwa rak vɔk e rwa ta. 5Bak o wo Ɛfrayim wa sé e hagât wo Manase yi e rwa rak vɔk e rwa ta. 6Bak o wo Rubɛn wa sé e hagât wo Ɛfrayim yi e rwa rak vɔk e rwa ta. 7Bak o wo Yuda wa sé e hagât wo Rubɛn yi e rwa rak vɔk rwa ta.
8Bak o wo hagât Yuda yi e rwa rak vɔk e rwa ta wô sè womo de hwô tik wɛ jaram. Netês wɛ yi e rwa bato vɔk e rwa batin nê sè lyōsho kuru ko nelis o yi e rwa rak vɔk e rwa ta nê sè tyɛng sede bebak o de ba ga nɔ̂ng yerê Israyɛl. Bê tɛ̀ Gbɔng Duk Re Fongol e tê wɛ.
9E tê bak womo mo, bê jut bak o de nelis o na sé lyōsho kuru, ko netes o lyōsho rwit be nára a Dagwi Darwey wɛ. 10Bepiris bê vɔk bak kwɔn de ba tik jɛrɛ yaga Dagwi. Yi e rwa rak vɔk e rwa ta nelis wɛ nê sè lyōsho kuru ko yi e rwa bato vɔk e rwa batin netes o nê sè lyōsho nyaas. Bê lɔk Gbɔng Duk Re Fongol Dagwi Darwey e tê kwɔn o. 11Kwɔn de ba tik jɛrɛ hê sè yaga bepiris de ba sé yi e yerê Zadɔk. Yɛn á ra a Dagwi fwom na tsak o, ko yɛn á raa bwang BeIsrayɛl e de ragas neves sede remo de bwang yerê Levi ya ra wɛt. 12Kwɔn o hê sè mɛn yi e bak de ba tik jɛrɛ, hê dal mwa na nejɛrɛ, ko hê se e hagât hê BeLevi. 13E hagât kwɔ̂n bepiris, bê nɔ̂ng BeLevi bak o hwak e rwa batin. Nelîs kwɔn o nê sè lyōsho kuru yi e rwa rak vɔk e rwa ta, ko netes o lyōsho nyaas yi e rwa rak vɔk e rwa ta. 14Bak vwel de ba nára a Dagwi Darwey wɛ mo, wa dal bwang o mwa na nerat, ko bê tɔk row wɛ, kɛ be sege wɛ, kɛ be nɔ̂ng mwat hwak wɛ ko tyɔng wɛt. Wa sé jɛrɛ ko wa sé wo Dagwi Darwey.
15Bak de wa pɔl, wo kwɔn de ba tik jaram de nelis o na sé lyōsho kuru ko netes o lyōsho bya wa sé jɛrɛ wɛt, ko bemat bê tɔk ra fwom na wɛ. Yɛn ê tɔk sangal e ji wɛ na be ra fwom na vwel o. Gbɔng repomo mo rê sè e tê wɛ, 16ko nelis na netês rɛ bê sè tyɛng wɔgɔ, yât gu baba naga betungun na kuru baba (2,520) e kawɛ bak. 17Bê vɔk tyɛl de ya gwɔrɔ gbɔng repomo mo, yê sè yât naga na kuru banaas e kawɛ bak. 18Bama de ba ga lɔk gbɔng repomo mo, bwang vwel de ha pɔl e rwa batîn kwɔ̂n jɛrɛ mo, nelis o na sé lyōsho nyaas, ko netes o lyōsho bya e rwa rak, ko na to sé tyɛng ano e rwa ta, ba vɛ cāp na wɛ yaga pyɛ̂ re. 19Bemât fwôm gbɔng repomo mo yi e kayɛ yerê Israyɛl ba how cāp o.
20Yi ano, mwa nepyak kwɔn de ba tik jɛrɛ e tē, nelis o na netes o na sé tyɛng, nà sé lyōsho kuru e kawɛ bak, nà wuna mwa na bak de ba lɔk ɛ gbɔng repomo mo.
21Bwang pyɛ de ya pɔl e bahagât kwɔn de ba tik jɛrɛ, na kwɔn gbɔng repomo, yê sè ye gbɔng gwɔ̀m. Yê yi e lyōsho kuru yê kwɔn de ba tik jɛrɛ, vɔk e yɛnɛ vwel o e rwa rak, yi e lyōsho kuru mo arɔng vɔk e yɛnɛ vwel o e rwa ta, ye bɛrɛng bak o wo yére Israyɛl, yê se ye gbɔng gwɔ̀m. Bak de ba tik jɛrɛ mo tanga kwɔ̂n jɛrɛ hê Gbɔng Duk Re Fongol bê sè e tê hɛ. 22Bak o wo BeLevi na wo gbɔng repomo, wô sè e tê wo gbɔng gwɔ̀m. Bak o wo gbɔng gwɔ̀m wô sè e tê bak o wo Yuda e rwa bato na bak o wo Bɛnyamin e rwa batin.
Vwêl bwang yére
23“Bwang yére yê sɛ̀ bebak o bemɛn arɔng. Bak vwel o wo Bɛnyamin wa sé yi e rwa rak vɔk e rwa ta. 24Bak o wo Simɛyɔn wa sé e hagât wo Bɛnyamin yi e rwa rak vɔk e rwa ta. 25Bak o wo Isakar wa sé e hagât wo Simɛyɔn yi e rwa rak vɔk e rwa ta. 26Bak o wo Zɛbulun wa sé e hagât wo Simɛyɔn yi e rwa rak vɔk e rwa ta. 27Bak o wo Gat wa sé e hagât wo Zɛbulun yi e rwa rak vɔk e rwa ta.
28“Bagat na bak o wo Gat vɔk e rwa batin, yɛnɛ mo ha raa yi e Tamar vɔk e nshî Meribat-Kadesh, yi e hwomo nà raa nɛk Misra vɔk e Gworep Tē. 29Vwel á hemo de hwô gas a yére Israyɛl na he sè benap mɛn, bebak o bemɛn à vemo. Me Darwey Dagwi Darwey ma ha ano.”
Rùhup Yɛrusalɛm
30“Rùhup núnus yi e gbɔng repomo ma vemo: E hagât rwa bato de nelis o na sé yât gu baba naga betungun na kuru baba (2,520), 31ha vɔk rùhup tat — vɛ à Ruhup Rubɛn, na Ruhup Yuda tanga Ruhup Levi, ba vos a rùhup o bazâ yére Israyɛl. 32E hagât rwa rak de nelis o na sé yât gu baba naga betungun na kuru baba (2,520) ha vɔk rùhup tat — vɛ à Ruhup Yɔsɛf, na Ruhup Bɛnyamin tanga Ruhup Dan. 33E hagât rwa batin de nelis o na sé yât gu baba naga betungun na kuru baba (2,520), ha vɔk ruhup tat — vɛ à Ruhup Simɛyɔn, na Ruhup Isakar tanga Ruhup Zɛbulun. 34E hagât rwa ta de nelis o na sé yât gu baba naga betungun na kuru baba (2,520) na vɔk rùhup tat — vɛ à Ruhup Gat, na Ruhup Ashɛr tanga Ruhup Naftali.
35“Nelîs jwâ gbɔng repomo mo e rǎ gùl naas o na sé mwa yât gu kuru, na kuru rwit (10,080). Yi e ngamo nuyel bê yila gbɔng repomo mo à, ‘Dagwi Darwey a sé e Ngamo!’ ”
Currently Selected:
Yɛzɛkyɛl 48: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
