Yɛzɛkyɛl 43

Dagwi Darwey a toyo e Gbɔng Duk Re Fongol

1E bama mo, mwat o a vey na me e ruhup de gwo bɛrɛng rwa rak. 2E hwomo, ma di gbɔng nedyɛt Dagwî Israyɛl ne kyè vey yi e rwa rak. Fwɔ̂ Dagwi o gwa wus sede nshi de ne tele na yol, ko jey o ya nɛp na gbɔng nedyɛt mɛ. 3Negwi-ywey de ma di mo na sé sede nemo de mà kana di jeng de Dagwi à vey wey na gbɔng repomô Yɛrusalɛm, na nemo de mà kana di e hagat Rɔt Kebar arɔng. Ko ma gaba gup e vwel.

4Sede gbɔng nedyɛt Dagwi Darwey o na yel e Gbɔng Duk Re Fongol e ruhûp rwa rak, 5ko Gabik Dagwi o ha yang me cik, ha kyè na me vɔk e lalâ ji mo, ko gbɔng nedyɛt Dagwi Darwey na sila Gbɔng Duk Re Fongol. 6Mwat o a sé tumal e hagat hom, ko ma wok Dagwi Darwey a sé ha na me yi e Gbɔng Duk o. 7A ye, “À mwasi, kwɔn gwofwa negwɔm hom, na kwɔn tas bol hom à hemo. Mê sangal e ngamo e tê BeIsrayɛl nesheneshey. BeIsrayɛl bê sang to tɛ̀ reza hom rê jɛrɛ ligis wɛt — kɛ yɛn, kɛ begwɔ̀m mɛn, kɛ yi na nedeneves ne sâp cī, kɛ yi na yông cī yê bavin begwɔ̀m mɛn de ba ga kushu. 8Begwɔ̀m mɛn o bá lɔk batis na ri rùhup nelɔ mɛn bagat na vɛ̀ Gbɔng Duk Re Fongol hom, ko yɛn á tik kekwɔn lɔk jwa-duk zɔng e tē mot na yɛn, yi ano, yɛn á tɛ̀ reza hom ligis na tom mɛn de ba sé byɛm-byɛm, yaga ano, ma wey na yɛn e ji shom hom. 9A remo, tik na yɛn a wey na nedeneves ne sâp cī, tanga sâp bavin begwɔ̀m mɛn, be wey na yɛ yikyik yi na me, ko mê sangal e tē mɛn nesheneshey.”

Badu Gbɔng Duk Re Fongol

10Dagwi Darwey a re nuyel a ye, “À mwasi, misang a BeIsrayɛl rehâ Gbɔng Duk Re Fongol, na yɛn a bɛrɛng begwong lɔk wɛ yɛɛlɛl. Tɛ̀ yɛn a vo rekyên tom banɛn de yɛn a ga ragas. 11Ka sede yɛn a vo rekyên pyɛ́ de yɛn a ga kana ragas, ko hwo misang a yɛn begwong lɔk Gbɔng Duk o, begwong de ba wɔrɔ wɛ, na nekwɔn yeles tanga ne nunus e ji wɛ, na begwong de ba kyɔrɔk wɛ, na begwong de ba ngyɛrɛ kayɛ pyɛ e ji wɛ. Hwo to ha a yɛn mwa nu tanga badu de ba nɔng e ra wɛ. Jɛk vɛ e bayis mɛn yaga na yɛn a gyeng vɛ, na yɛn a raa kayɛ pyɛ de ba yong, mwa na nu de ba nɔng e ra yɛ̄. 12Badu Gbɔng Duk Re Fongol á vemo: Mwa yɛnɛ kwɔn de ha gwɔrɔ wɛ e ra raku mo, mwa kwɔn o hê sè kwɔ̂n jɛrɛ sizɔng. Di, badu Gbɔng Duk Re Fongol à vemo.

Gàgbang nára nɔrɔ yas vɔk na Dagwi

13“Mára bebak detidetu vê gagbang nɔrɔ̂ yas à hemo, ba ra fwom na bol masâ Gbɔng Duk Re Fongol. Ba kás kekǎng be rɔnɔ mɛ tîn gàgbang o, netes kɛ na sé bwol gwining na rebit o, ko neciwil o na sé tyɛng ano arɔng. Ba rɔnɔ hagât jey hê vɔng o na lɔk de ha vey bagat bwol gwining vɔk e rak o. 14Bak vwêl gàgbang nɔrɔ mo yi e retis o vɔk e rak o wa sé bol naas. Bak o wo neba ba gwɛ̌ netes wɛ e kawɛ bak na bwol gwining na rebit o, ko wà sé bol taama vɔk e rak o. Bak o wo netat ba gwɛ̌ netes wɛ e kawɛ bak na bwol gwining na rebit o. 15Bak wo netat wɛ à wo rak o de be nása ɛ nɔrɔ̂ yas, nelis wɛ na sé bol taama arɔng. Ba tɛ̀ badúk e bato-kwɔng o banaas. 16Rà rak gàgbang nɔrɔ yas o wà sé bol kuru baba e kawɛ bak. 17Kahɛ hagât bak wo tē ha sé bol kuru baba na vɛ naas. Ba rɔnɔ hagât jey o na lɔk de ha vey bagat bwol gwining vɔk e rak o. Netês kekǎng o na sé bwol gwining na rebit o. Nekwɔn bɔrɔs vɔk e ra rak kwɔn rangas yas o ne bɛrɛng rwa rak.”

Ba nára a Dagwi gàgbang nɔrɔ yas

18Mwat o a to yang me, “À mwasi, Darwey Dagwi Darwey a ye, ‘Vemo vɛ à badu gàgbang nɔrɔ yas o: Jeng de ba yong hɛ, be nása nenɔrɔ̂ yas de be rangas, na be waram nemi e ra hɛ, 19ko hwo nɔ̂ng bepiris ve yerê Zadɔk, vemo de be ra a me fwom, bwôt mus yaga nɔrɔ̂ banɛn. Me Darwey Dagwi Darwey ma ha ano. 20Hwô vɛ nemi, na hwo tɛ̀ e ra badúk banaas vê gàgbang nɔrɔ mo, na e bato-kwɔng banaas vê kwɔn o hê tē tanga e ra bahagat o mwa. Yi ano, hwô fung kwɔn o, na hwo ra mɛ talâ-nɛn yaga yɛ̄. 21Hwô jut mus wo nɔrɔ̂ banɛn, ko bê rangas wɛ e kwɔn de ba ga yong ɛ gyam, e bamâ yɛnɛ̂ kwɔ̂n Gbɔng Duk Re Fongol. 22E tuk hê neba, hwô nára nɔrɔ̂ gam de wa vɔk ram wɛt, yaga nɔrɔ̂ banɛn, ko bê fung kwɔn nára nɔrɔ mo tyɛng sede ba ra na bwôt mus. 23Sede hwà ga yɛnɛ fûng kwɔn o, ko hwo nára nɔrɔ̂ mus tanga hê turuk de ba vɔk ram wɛt yi e kwara arɔng. 24Hwô nára yɛ e nuyêl Dagwi Darwey, ko bepiris bê zagat nevwashe e ra yɛ, na be nára yɛ sede nɔrɔ̂ yas de be rangas burang yaga Dagwi Darwey. 25E ji nepɔlɔ netaama, kahɛ tuk, hwô nɔng vyel shi yaga nɔrɔ̂ hála banɛn, na mus tanga turuk de vit a yɛ̄ na ram, yi e kwara mo. 26Pɔlɔ taama yɛn ê ra talâ-nɛn yaga gàgbang nɔrɔ mo, na be kus hɛ haalal, yi ano, bê nára a Dagwi hɛ. 27Sede nepɔlɔ mo na ga kwey, ko yi e tuk he rwit vɔk e nuyel, bepiris bê nása nenɔrɔ̂ yas min de be rangas, na nè wuna nesa min arɔng e ra kwɔn nára nɔrɔ mo. Yi ano, mê vɔk yey pyɛng na yin. Me Darwey Dagwi Darwey ma ha ano.’ ”

Currently Selected:

Yɛzɛkyɛl 43: bomBI

Highlight

Copy

Compare