Yɛzɛkyɛl 42
42
Beduk de ba sé bagat na Gbɔng Duk Re Fongol
1E bama mo, mwat o a kyè na me vɔk e lala majey, a wɔ́ na me e beduk de ba sé bagat na lalâ Gbɔng Duk Re Fongol hê rwa bato, e hagat duk de wa sé e rwa ta. 2Nelis duk o na sé bol naga na kuru batyiimin na vɛ rwit ko netes o na sé bol kuru rwit na vɛ naas. 3Hagat hining wɛ he bɛrɛng tîs beta de ha nusu e jey bol kuru batat na vɛ naas, hemo de ha sé e hagat Gbɔng Duk o, ko hagat o he neba he bɛrɛng gwong lala majey. Ba lɔk duk o turus tat, turus hê neba ba pɛrɛ hɛ e ji mo tyɔng yi e hê vwel o, ko hê netat ha gwɛ̌ sé e ji mo tyɔng yi e hê neba mo arɔng. 4E nuyel beduk o, gwong gwa sé de netes o na sé bol kuru na vɛ tyiimin, ko nelis o na sé bol naga na kuru batyiimin na vɛ rwit. Ri duk o be bɛrɛng rwa bato. 5Neduk nelɔ rak o na sé nesɛl e ra nè tē na ne vwel, a remo de ba pɛrɛ lɔk nɛ e ji mo na bwang o. 6Beduk mwa zang tat e ra bemɛn ba vɔk bevaranda tyɔng e nuyel o, ko ba vɔk sesêk gyep vɛ sede bwang beduk lala vwel o wɛt. Yi ano, neduk de na sé e tut hê netat na wul nè tut hê tē na hê vwel na nerey wɛt. 7Nelis vwara duk majey de gwa sé e hagat beduk lala majey na sé bol kuru rwit na vɛ naas. 8Nelis beduk de be bɛrɛng lala majey na sé bol kuru rwit na vɛ naas. Vemo de be bɛrɛng Gbɔng Duk o nelis o na sé bol naga na kuru batyiimin na vɛ rwit. 9E nɛ̂n beduk o, rwi ruhup gwa sé e rwa rak, sede bê yel e beduk o yi e lala majey.
10Beduk behak ba sé e netês vwara duk lala hê rwa batin e nuyêl lala hak tanga e nuyêl Gbɔng Duk o. 11Gwong gwa sé e nuyel beduk o, gwa sé sede vèmo de ba sé e rwa bato. Nelis beduk o na netes o, na begwong de ba yong vɛ, na ri vɛ mwa ba sé yere jining na ve rwa bato. 12Sede ri beduk de ba sé e rwa batin, ano arɔng beduk vemo ba vɔk rwi hwak de gwo bɛrɛng jwa-pomo wo rwa rak.
13Mwat o a yang me, “Beduk de ba sé e rwa batin na vê rwa bato e nuyel lala mo ba tik vɛ jaram. A sé e ji vɛ de bepiris de be ra fwom e nuyel mɛ, be reres ɛ pyɛ̂ nɔrɔ de ba ga kana tik jaram yaga Dagwi. A sé e ji vɛ arɔng de be tikis ɛ pyɛ̂ nɔrɔ de ya dal mwa, yemo de be nása a Dagwi, yɛ a, pyɛ̂ nɔrɔ yê yéneng, na yê banɛn, tanga yê burû gawey. Kwɔn o ha sé jaram yaga Dagwi. 14Jeng de bepiris be nusu yi e Duk Jɛrɛ vɔk e lala majey, a sé gbing-gbing na yɛn a paa berugu de yɛn e tɛ̀sɛ na be ra a Dagwi mɛ̀ fwom, be tik vɛ e beduk o gyam na yɛn a de nusu, yaga bà sé jɛrɛ. A sé gbing-gbing na yɛn a tɛ̀ berugu behak detu gyam na yɛn a de wɔ́ e majey e dem de bemat ba sé ɛ.”
Marâ yɛnɛ kwɔn Gbɔng Duk Re Fongol
15Bama de mwat o a ga yɛnɛ marâ yɛnɛ ji Gbɔng Duk Re Fongol, ko a kwey na me e ruhup rwa rak, ko a hwo mara yɛnɛ̂ kwɔn de ha rɔnɔ Gbɔng Duk o. 16A mara hagat rwa rak na cwang mása mo, ko nelis o na sé bol naga rwit na kuru banaas. 17Ano, a mara hagât rwa bato na cwang masa mo, ko nelis o na sé bol naga rwit na kuru banaas. 18A mara hagat rwa batin na cwang masa mo, ko nelis o na sé bol naga rwit na kuru banaas. 19Ano kwong a mara hagat rwa tā na cwang masa mo, ko nelis o na sé bol naga rwit na kuru banaas. 20Yi ano, a masa mwa bahagat o banaas. Ba gwɔrɔ cwɛl o mwa na jwa-pomo de nelis o na sé bol naga rwit na kuru banaas, ko netes o na sé bol naga rwit na kuru banaas, na be gas kwɔn jɛrɛ yi e nekwɔn zɔng-reng.
Currently Selected:
Yɛzɛkyɛl 42: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
