Danyɛl 1
1
1E shey hê netat de Yɛhɔyakim á sè gbɔng gwɔ̀m Yuda, Da Vwel Nɛbukadnɛzar wo Babilɔn a hwo e ra Yɛrusalɛm, a gwɔrɔ mwa gbɔng repomo mo na como. 2Darwey a nɔng ɛ wɛng e ra Gbɔng Gwɔ̀m Yɛhɔyakim, a to nɔng ɛ gwong, na a sey ɛ pyɛ́ cak de ba ra mɛ fwom e ji Gbɔng Duk Re a Dagwi Fongol. Jeng de Nɛbukadnɛzar a toyo e Babilɔn, a tik pyɛ́ mo e gban duk de ba re a ci mɛ fongol.
3Tuhak, Da Vwel Nɛbukadnɛzar a nɔ̂ng Ashpenas, gbɔng o wo bemât fwom mɛ nu, na a kasa yi e ji BeYuda bewen vê lɔ gwɔ̀m tanga vê nelɔ bemât nuyel de ba hashe vɔk e sesam. 4A yang ɛ, “Jut bewen de ba sé bekasang o, de ba ga sɛ̀ basa yɔkyɔk, de ba vɔk tɔk yerê kahɛ mo de ba jam yaga fwôm lɔ hom. Basa a yɛn basa na jɛ̂k e lem mot. 5Nɔng ɛn pyɛ́ na nshî anap nining na nenang. Myák ɛn neshey netat, E bama mo, bê yel e fwôm lɔ hom.”
6E ji vemo de ba kasa mo ba sè Danyɛl, na Hananiya, na Mishayɛl tanga Azarya. Mwa hɛn benaas ba sé yi e ji yerê Yuda. 7Ko gbɔng o Ashpenas a vos a yɛn bazâ Babilɔn. Danyɛl a yila hɛ à Bɛltɛshazar, Hananiya à Shadrak, Mishayɛl à Meshak, ko Azarya à Abɛt-Nego.
8Danyɛl a tɛ̀ e yey mɛ, a rɔda tɛ̀ to mɛ ligis na rê pyɛ́ na sɔ̂ nshî anap ne lɔ gwɔ̀m wɛt. Yaga ano, a wɔ̀ ra won na gbɔng o, Ashpenas, na a simo a yɛ, a re pyɛ́ mo wɛt. 9Ko Dagwi a tɛ̀ Ashpenas a wok nemwishish Danyɛl. 10Mwa ano, a yang ɛ, “A sé e Da Vwel de a ga nɔng nû pyɛ́ de yin ê re na sɔ. Me tele me, ka yin a de nusu sede bwang bewen o wɛt, yin a gyɔt, ko bê mɔrɔ me.”
11Ano kwong, Danyɛl a wɔ na mwat de Ashpenas a tɛ̀ ɛ a bɛrɛng hɛ tanga besa mɛ betat o. 12A yang ɛ, “Ka hwà simo, tɛ̀ be nɔngɔs hot hwonong na nshi nsit zɔng nepɔlɔ kuru. 13E bama mo, hwo tyɛngrɛ hot na bwang bewen de be re pyɛ̂ lɔ Da Vwel, ko hwo de yɛrɛ tyɛng pyɛ de bayis mō ba dura a hwo.”
14Mwât bɛrɛng mɛn o a simo, ko ba mara bewen o pɔlɔ kuru mo. 15Sede jeng o ya sila, ba di bayis mɛn vwɛs-vwɛs, ba mɔsɔ naka, ba dal vemo de ba re pyɛ́ na sɔ nshî anap yi e lɔ Da Vwel. 16Yi e jeng o vɔk e nuyel, mwât bɛrɛng o a tik ɛn, be re hwonong zɔng e tô pyɛ̂ re de Da Vwel a nɔngɔs.
17Dagwi a nɔ̂ng bewen benaas vemo mo tɔk tanga sekwɛl. Ba basa bebok-basa pyak, ko ba sɛ̀ kawɛ bak tɔk e ji vɛ. A to nɔ̂ng Danyɛl negwi-ywey na tɔ̂k misang negwi arɔng.
18E yɛnɛ̂ shey tat de Da Vwel Nɛbukadnɛzar a yɛrɛ, Ashpenas a wɔ́ na mwa bewen o na yɛ. 19Da Vwel o a ra berem na mwa hɛn e ra pyɛ́ de ba basa a yɛn, ko a di, vit a hwak de a wul Danyɛl, na Hananiya, na Mishayɛl tanga Azarya e ji mɛn. Ano kwong, ba tɛ̀ ɛn e fwôm lɔ Da Vwel. 20Yi e jeng o, kayɛ jeng de Da Vwel a jama vô redu, a sɛ̀ yɛn benaas vemo ba dal na tɔ̂k vô redu zang kuru e ra bemât badu tanga bemât tô bes de ba sé e yɛnɛ̂ mwa bavwel segwɔm mɛ.
21Danyɛl a nàra e fwôm lɔ Da Vwel e shey hê mɛsɛng o hê Kɔrɛsh.
Currently Selected:
Danyɛl 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
