Amɔs 6
6
Yin sangal bɛs wɛt
1Gawey e ra yin, yin de yin a sé sangal bɛs e Siyɔn.
Na yin de yin a sé sangal tyang e Raku Samariya.
Yin de yin a sé begbɔng o vê yére bemât jey, de ya dal na nerey.
Yin de BeIsrayɛl be vɛ̀sɛ jama sɛlɛ na yin!
2Ci wɔ̀ di in repomô Kalne.
E bama mo yin kwey vɔk e gbɔng repomô Hamat.
Pere hin vɔk e repomô Gat wo BeFilisti.
Yɛn a dal bapomô segwɔm Yuda na Israyɛl arɛt?
Yɛnɛ̂ vwel mɛn ha dal min na nerey a?
3Yin e tusa jeng de gbɔng rezot rê vey.
Ko mwa pyɛ́ de yin e ra yê gwɛ̌ tɛ̀ jeng o ye vey bagat.
4Gawey e ra yin, yin de yin e dyɛngɛs e ra gat de ba tɔrɔ na yìn gbin de ba tsep.
Yin e wok netâ dyɛngɛs yɛndɛng e ra nekwɔn sangal nerat.
Yin e reres banamâ tyīmit ryat o
na vê berɔndɔng bebot o.
5Yin e simo yong lɛlɛ
sede Davit á kana ragas,
na yin a ragas vɛ na yōm.
6Yin e sɔrɔs nshî anap na bèkɛt,
na yin a mɔmsɔl babek min na něy nerat sizɔng.
Ko yin e lashe yey yaga barîn lɔ Yɔsɛf wɛt.
7Yaga ano, yin ê sè vê mɛsɛng
de bê tanga hashe vɔk e de sesam.
Nzem min tanga netâ dyɛngɛs yɛndɛng min nê yɛnɛ hɛn.
8Darwey Dagwi Darwey a sira na reza mɛ —
me Dagwi Darwey, Dagwi Dâ Jey Mwa
“Ma kyé mɛ dâk kaà Yakɔp.
Ma byɛs nekwɔn dal mɛ,
mê nɔng gbɔng repomo mɛ
na kayɛ pyɛ de ya sé e ji hɛ.”
Dagwi Darwey, Dagwi Dâ Jey Mwa a ye ano.
9-10Ka bemat kuru ba tɛt ɛ e lɔ hak, yɛn ê kushu mwa. Jeng de cang mwat de a ku mó ê yel e lɔ mo na a wɔ̀ pat revîn mwat o na a wɔ̀ lɛrɛ rɛ, ko a rɔda yila mwat de a sé e lɛrɛ e ji lɔ mo, a ye, “Mwat hwak a to sé e lɔ mo bɛ?” Ko mwat o a rɔda toyo a yɛ, a ye, “Wey!” Ano, cang o a rɔda ye, “Tsút! Wot tɛ̀ rezâ Dagwi Darwey wɛt.”
11Yaga Dagwi Darwey a ga nɔng nu,
bê gangas nelɔ nerey o cɛk o cɛk o,
ko nesɛl o bê gangas nɛ arɔng.
12Bedwa be ra sesuga e ra beraku a?
Bemat be how gworep na berɔndɔ̂ng cap a?
Mwa ano, yin a tɛ̀ hâ gâs badu e tē he sè sede nedɔm,
ko yin a tɛ̀ pyɔlɔ̂ necik ye tɛ́ ɛ neves.
13Yin e dak kaà rê repomô Lodebar na como.
Yin e tē, “Gâp como mot ha vey na wot a re Karnayim!”
14Dagwi Darwey, Dagwi Dâ Jey Mwa pyɛ mɛ a ye,
“À BeIsrayɛl, ma sé kyè wɔ̀ tomo na bemât yerê vwel hak
na be tak a yin,
yi e pyôl yél e Hamat e bato
vɔk e Nɛk Araba e batin.”
Currently Selected:
Amɔs 6: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
