Amɔs 5
5
Lwɛlɛ̂ sin e ra Israyɛl
1Wet in betong à yin BeIsrayɛl
na lwɛlɛ̂ sin de mê ra e ra yin,
2“Zîng hwông Israyɛl a ga gaba,
ê sang to sogo wɛt!
Ba ga kyini hɛ e dyɛngɛ e vwel,
ko vit à mwat de ê sɛlɛ na a sogo hɛ cik.”
3Darwey Dagwi Darwey a ye,
“Gbɔng repomô Israyɛl de bemât como gu rining ba nusu,
ko bemat naga zɔng de ba toyo.
Gbɔng repomo mo rehak de bemât como naga ba nusu,
ko kuru zɔng de ba toyo.”
4Dagwi Darwey a yâng BeIsrayɛl,
“Vey in na me, na yin a vɔk neken.
5Yin kwon jama Bet-Ɛl, kɛ yin wɔ yel e Gilgal,
kɛ yin ye dɔ vɔk e Bɛɛr-Sheba wɛt.
Yaga mwin, bê hashe bemât Gilgal vɔk e de sesam,
ko Bet-Ɛl arɔng wô tɛ́ ɛ yapyi.”
6Vey in na Dagwi Darwey, na yin a vɔk neken.
Ka ano wɛt, yɛ̀ ê takla sede kya e lɔ̂ Yɔsɛf,
ko hê re lɔ̂ Bet-Ɛl, vit a mwât rimî hɛ.
7Gawey e ra yin,
yin de yin e tsip shɔt sana gas badu e tē,
yin e mɔt bemat sana ra necik.
8A sé e Dagwi de a yong netangacɛ̂n lɔ-gyɛng,
nɛ̀ a gwocongot na nèy o tanga mwât jàma na vu mɛ.
E sege jêy lwil mwangalang vɔk e yê negbey,
ano arɔng e sege nagwi vɔk e naturuk.
E yɛ de e yila nshî gworep,
ko e to shushu nɛ e ra jey.
Reza mɛ à rēmo ngan: Dagwi Darwey!
9E tɛ̀ vemo de ba vɔk gap be wey,
ko e wey na nekwɔn dal.
10Yin e kyɛ́ in mwakuk de e gyong in e ruhûp repomo,
ko yin e bɛɛ wo hâ tsak o sede pyɛ byɛm-byɛm.
11Yin e tak a bepɛng,
ko yin e sey ɛ pyɛ̂ yeneng mɛn na gap,
yaga ano, yin ê tik nà sangal e beduk beta berat de yin a lɔk,
yin ê tik nà sɔ nshî anap nerat yi e bě rat de yin a tus.
12Ma tɔk yerê nevês banɛn min,
tanga ne pyɛ́ vyes de yin a ga ragas.
Yin e tak a vê cik, yin e seres dyâm bâng nu,
na yin a dulus bepɛng e beduk shɔt.
13Yaga ano, bare hin, a dal naka yin a bang nenu min yuu,
yaga jeng o ya sé vyes!
14Jama hin nerat, ko neves wɛt,
na yin a vɔk neken.
Yi ano, Dagwi Darwey, Dagwi Dâ Jey Mwa, ê sè na yin mwin,
sede remo de yin e tē a sé na yin.
15Kyɛ́ in neves, tɛ̀ in yey na nerat,
dopse gas in badu e tē e beduk shɔt.
Gyeng Dagwi Darwey, Dagwi Dâ Jey Mwa,
ê wok nemwishish bwang yerê Yɔsɛf.
16Yaga ano, Darwey Dagwi Darwey, Dagwi Dâ Jey Mwa a ye,
“Bê dak sekun e nehyok bapomo mwa.
Bê tē: Yaa kukuuk!
Bê rini bemât cap na be wɔ̂ sesîn
mwa na yɛn vemo de ba tɔk râ lwɛlɛ̂ sesin yɔkyɔk.
17Bê dak sekun e bě anap mwa,
yaga ma sé kyè wɔ kwey e tē min.”
Dagwi Darwey a ha ano.
Tuk Dagwi Darwey
18Gawey e ra yin, yin de yin á kana tɛ̀ yey
e ra tuk de Dagwi Darwey ê ba vey!
Yaga sɛ de yin e simo yin di tuk Dagwi ɛ?
Hê sè a yin mwangalang — hê sè gbey wɛt.
19Sede jeng de mwat a sè tele yi na gukum,
ko a de wɔ̀ man gbǎm na beyar!
Sede mwat de a vɛ hɛ e lɔ, a ye yìk à vwarâ duk,
ko gwɔ̄m wo vɔk wo rot ɛ!
20Jeng Dagwi Darwey yê sè mwangalang ko gbey wɛt,
yê vɔk lwil ko negbey wɛt.
21“Me kyɛ́ me nzem de yin e ragas a me,
na sé pyɛ byɛm-byɛm na me!
Ko me vɔk yey pyɛng na netula min wɛt.
22Mwa ano de yin e vɛ̀sɛ a me na nɔrɔ̂ yas de be rangas na hê pyɛ̂ yeneng,
ko me sey yɛ wɛt.
Mwa ano de yin e bang yas naka na ye mɔsɔ,
na yin a vey nɔng me nɔrɔ̂ yɛ yaga sangâl netyang,
ko me sey yɛ wɛt.
23Kyè in e jey na râ lɛlɛ de yin e dɛrɛ a me betong na vɛ.
Me simo me wok râ yōm min wɛt.
24Tik na yin a sǎ e de gâs badu e tē,
sede nshi de ne tele e rɔt,
Ragas hin necik,
sede rɔt de he sang hworok wɛt.”
25“À yin BeIsrayɛl! Yin á nɔng me nɔrɔ̂ yas kɛ hê bwang pyɛ́ detidetu e neshey kuru banaas de ma kyè na yin e hey a? 26Yin ê jut Sakut, gwɔ̀m min, na Kaiwan, dagwî netangacɛn, pyɛ sekwit de yin a yong a bato min, yin a re reyɔ̂m kyé na yɛ. 27Yaga ano, mê kyè na yin vɔk e de sesam e vwel de ha sé e nuyêl Damaskus.” Dagwi Darwey, de reza mɛ à Dagwi Dâ Jey Mwa a ye ano.
Currently Selected:
Amɔs 5: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
