1 Bitrus 1
1
1Bwok-rwang gwomo yi e vwɔ hom Bitrus, tom Yɛsu Kristi.
Vɔk na yin de Dagwi a ga kasa hin na yin a sè bemɛ. Yin de bá shara hin vɔk e bavwêl Pɔntus, na Galatya, na Kapadokya, na Asiya, tanga Bitinya, ko yin a sé sangal e hwomo sede bekɛnɛt. 2Dagwi Da à kana kasa hin na yin a sè bemɛ, sede remo de à kana yong ɛ̀ yimo gyam. Ko Gabik mɛ há tɛ̀ in jaram, na yin a sè vê Dagwi, yaga na yin a gyeng hâ Yɛsu Kristi, na yin a bin sè jɛrɛ yi na nemi mɛ: Tik na Dagwi a dura a yin nerat mɛ shɛrɛk, na a gwɛ̌ tɛ̀ yey min ye dyɛng.
Neken nepas yi na Yɛsu Kristi
3Tik na wot a feng a Dagwi, yɛ de a sé Dâ Darwey mot Yɛsu Kristi! A tosho reyɔm mot ding-ding; yaga ano, a nɔng ot neken nepas, ko a ra ano yi na séne Yɛsu Kristi yi e reku. A sé yaga pyɛ yane de wot a sɛt yey mot, wot a rɔda vɔk neken tanga yɛ, 4ko wot a rɔda sɛ̀ pyɛ̂ nedanelɔ ryat de Dagwi a tik a bemɛ. A tik yɛ̄ e lagwi, e kwɔn de ye tɔk wey kɛ ye lashe hɛ wɛt, ko ye to tɔk tɛt ɛ arɔng wɛt. 5Yaga yin a tɛ̀ gap min e ra Kristi, Dagwi a sé gyep in na reto mɛ, sɛ̌ a ba sey neken min. A yong ɛ, na a ba dura wɛshɛrɛk e jeng ye yɛnɛ mo gwong de a rɔda ba sey in.
6Yaga ano, yin a vɔk yey pyɛng ding-ding, mwa ano de neyey min ne lashe hɛn a remo, yaga ba sé masa hin e begwong detidetu. Ko yin a tɔk mása hane mo ha rɔda ros wɛt. 7Ba sé masa hin ano, na be bin di, tɛ̂ gap min e ra Kristi mo ha sé hê mwin. Di, dyam shinang ya sé pyɛ de be tɔk lashe yɛ̄, ko mwa ano, be mara nerât yɛ̄ na kya. Ano arɔng ba rɔda masa tɛ̂ gap min e ra Kristi de ha dal dyam shinang na nerey ding-ding, yaga na be di nerât hɛ kɛ na sé mwin arɛt? Hemo ha rɔda tɛ̀, be somo hin, na be nɔng in gbɔng nerat na nerey jeng de Yɛsu Kristi a rɔda ba dura tó mɛ wɛshɛrɛk. 8Yin a tɛ̀ yey min na yɛ, mwa ano de yin a ga di ɛ wɛt, ko yin a tɛ̀ gap min e ra yɛ, mwa ano de a remo yin e tɔk di ɛ wɛt. Yin a ga sila hin na gbɔng yey pyɛng, de ya dal gâp há. 9Yin a vɔk yey pyɛng ano, yaga Dagwi a rɔda sey neken min. Pyɛ ma yemo de ya tɛ̀, yin a tɛ̀ gap min e ra Kristi.
10À sè e ra rehâ sêy neken o de bezarap Dagwi bà jāma yɛɛlɛl na be to ngyɛgɛt, ko bà ha e ra nɔrɔ rat de Dagwi à ye, a rɔda nɔng in. 11Gabik Kristi de hà sè e neyey mɛn hà kana ha a yɛn wɔgɔ, Kristi a rɔda di reyɔm gyam na a de sɛ̀ gbɔng nerey. Ano kwong, yɛn à simo na be tɔk jeng de pyɛ́ yemo ya rɔda ba té tanga begwong de ya rɔda ba té ɛ̀ arɔng. 12Dagwi à ga dura a yɛn, a sé yaga bato mɛn de yɛn a zarap yi na yɛ wɛt, ko a sé yaga yin. Ko a remo, bemât sharâ Yɛgɛt Yat ba ga ha a yin pyɛ́ mo mwa yi na retô Gabik Jɛrɛ de Dagwi a tomo yi e lagwi. Ko a sé e pyɛ́ ma yemo de betom-lagwi pyɛ vɛ ba wok cwey tɔ̂k yɛ̄ arɔng.
Negwɔn de na jam na bemat Dagwi
13Yaga ano, yóng in neyey min yaga fwom de yin a rɔda ra, ko yɛklɛ hin arɔng. Sɛt in yey min mwa e ra nɔrɔ rat de yin a rɔda ba sɛ̀ jeng de Yɛsu Kristi a rɔda ba dura tó mɛ wɛshɛrɛk. 14Gyeng in hâ Dagwi, ko yin kwon raa cwey pyɛ́ de yin á ra raane e jeng de yin á rɔngɔl e ji dunûs Yɛgɛt Yat. 15Ko sè in jɛrɛ e ji kayɛ pyɛ de yin e ra, tyɛng sede remo de Dagwi a sé jɛrɛ, yɛ de a yila hin na yin a sè bemɛ. 16Yaga bà jɛk e Bwok-basa Dagwi wɔgɔ, “Sè in jɛrɛ, yaga me ma sé jɛrɛ.”
17Jeng de yin e ra won na Dagwi, yin e yila hɛ, à Da. Ko bàre hin, jeng de e ra a bemat shɔt, e dura kasa mwat hwak wɛt, ko e rá shɔt o tyɛng na pyɛ́ de kawɛ mwat a ra. Yaga ano, bwang jeng de yin a rɔngɔl sede bekɛnɛt e ngamo e jey, tik na negwɔn min ne dura, yin e wok bengyip Dagwi. 18Yin a tɔk pyɛ de ba vibis hin mɛ̀ yi e negwɔn de na sé yapyi nemo de yin a masa yi na bedabeda min. A sé e pyɛ de ye tɔk lashe hɛ sede dyam pyɛng kɛ dyam shinang wɛt, 19ko a sé e nemi Kristi de na vɔk nerey. Yɛ a sé sede ketyimit de ba yɛrɛ vɔk na Dagwi, vit a kɛ na ram kɛ pyɛ cak vyes. 20Yimo raane, gyam na be yong jey, Dagwi à kana kasa Kristi mo yaga fwom gwane mo. Ko a sé a remo, e jeng ye yɛnɛ mo de á de dura tó mɛ wɛshɛrɛk, yaga na a sɛlɛ hin. 21E yɛ de a tɛ̀, yin a sey tsak o na Dagwi, de a sene hɛ yi e reku, ko a to nɔng ɛ gbɔng nerat. Yaga ano, yin e tɛ̀sɛ gap min mwa e ra Dagwi, ko yin e sɛt yey min mwa e ra yɛ arɔng.
22Yin a ga tɛ̀ bato min jɛrɛ yi na raà pyɛ́ de ya sé tsak o, ko yi ano, yin a tɛ̀ yey min na begwa min vê raa e gwong de gwa sé mwin. Yaga ano, tɛ̀ in yey na bemin na gap min tanga yey min mwa. 23Yaga ba ga to tɔs in bepas yi na da mwasi wɛt womo de e ku, ko yi na da de e tɔk ku wɛt. Ba to tɔs in bepas yi na hâ Dagwi de ha sé ken, de ha rɔda nàra gbak-gbak arɔng. 24Sede remo de bà jɛk e Bwok-basa Dagwi wɔgɔ,
“Mwa bemasi ba sé sede sɔng,
ko nerât vɛ na sé sede nerât jamuk sɔng.
Sɔng o gwo hworok, ko jamuk o wo gaba,
25ko rehâ Dagwi re nàra gbak-gbak.”
Ko reha mo, rɛ̀ à Yɛgɛt Yat de bá kana shara a yin yɛ̄.
Currently Selected:
1 Bitrus 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
