PA’PUDIAN 95
95
Sipatu takasiri’ tu Puang Matua sia tapengkaolai
95:1-11
1Maikomi tara’ban-ra’ban umpenanian PUANG,
anta unnarrak umpudi buntu batu oto’na kasalamaranta.
2Maikomi anta ma’kurre sumanga’ umpennoloi oloNa,
sia mela’tek umpakendekanni pa’pudian.
3Belanna iatu PUANG iamo Kapenomban mala’bi’,
sia iamo Datu kapua, tu untongloi mintu’ deata!
4Iatu mintu’ liku mandalan lan nasang lisu pala’Na,
sia Ia ampunna mintu’ bottona buntu.
5Ia puangna tasik, belanna Ia ungkombongi,
Ia duka tu kapadanganna, panggaraga limanNa.
6Maikomi anta tukku menomba,
anta malinguntu’ dio oloNa PUANG, Totumampata.
7Belanna iamo Kapenombanta.
Sia kita tu bangsa nakambi’, sia domba Napelisu pala’.
Melo kemiperangii tu gamaranNa te allo totemo!
8Da mipamakarra’i tu penaammi, susi tonna dio Meriba,
sia susi tonna allo Masah dio padang pangallaran.
9Tonna sandakNa’ to dolomi.
Sia nasudiNa’, moi anna ta’paimi matanna tu mintu’ penggaurangKu.
10Patangpulo taunna nanii umpa’di’i penaangKu tu to tama bilangan iato.
Kukuami: Tau iato mai misa’ bangsa pusa tu penaanna,
tu tang untandai lalanKu.
11Iamoto angKu palenduranni kada kumua:
Inang tae’ nala tama kapelayoangKu tu tau iato.
Currently Selected:
PA’PUDIAN 95: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
