PA’PUDIAN 92
92
Pa’pudi-pudian lako Puang Matua, belanna lalan kaparentan malambu’Na
92:1-16
1Pa’pudian. Nanian allo katorroan.
2Iamote tu maelona, kumua melo ke umpudii PUANG tu tau,
sia umpakendekan pa’pudian sangamMi, o Patodoranna.
3Melo ke napa’peissananni ke melambi’ tu kamasokanamMi,
sia napa’peissanan ke bongi tu kamarurusamMi.
4Dipasiala paningoan sangpulo ritinna sia dandi,
sisola oni-onian naturu’ katapi.
5Belanna Mipasendemo’ penggauramMi, o PUANG,
sia mela’tekna’ diona mintu’ lalan limamMi.
6Tangpada kapuanna tu penggauramMi, o PUANG;
sia mintu’ tangnga’Mi tang dilambi’ diukkunni.
7Iatu to baga pu’pu’ tang natamai tu iannato,
sia iatu to tang paissan tang naka’da’ tu susinnato.
8Iake lobo’i tu to tang mekaaluk susi riu,
sia memba’ka’ tu mintu’ to umpogau’ kakadakean
iatu iannato, kumua anna sabu’ nasang tu tau iato mai sae lakona.
9Apa Kamu, o PUANG, unnisung dao masuanggana tontong sae lakona.
10Belanna manassa mintu’ ualimMi, o PUANG,
manassa mintu’ ualimMi la sanggang.
Sia mintu’ tu to umpogau’ kakadakean la dipasisarak-sarak.
11Apa Mipataranggana’ susi tedong lampung,
sia Mitokkomo’ minna’ ba’ru’;
12parannuna’ untiroi tu kasangganganna to undakaranna’ kakadakean
sia parannuna’ urrangi kasangganganna to umbalina’.
13Iatu to malambu’ la lobo’ ten to koroma,
sia la longke butung kayu arasi’ dio Libanon:
14Belanna ditanan lan banuanNa PUANG,
anna lobo’ lan tarampakNa Kapenombanta:
15La membua nasangpa kematuami,
sia lobo’ sia maluna;
16Anna pa’peissananni kumua iatu PUANG manappa’,
Iamo buntu batungku, sia tae’ narandan lenNi kakelokan.
Currently Selected:
PA’PUDIAN 92: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
