PA’PUDIAN 9
9
Puang Matua urrinding pala’ to umpengkaolai
9:1-21
1Lu lakona pangala sengo. Unturu’ baenan sengo: Mate ussonda anakna. Pa’pudianna Daud.
2La ponno penaangku umpudiKomi, o PUANG,
sia la kuulelean tu mintu’ penggauran kalle-kalleamMi.
3La parannu paimanna’ sia lo’dok to kaiyangan dio Kalemi,
la kupenanian pa’pudian tu sangamMi, o Puang Patodoranna!
4Belanna sumoro’mo tu mintu’ ualingku,
tisumbangmo anna mangsan dio oloMi.
5Belanna Miposara’mo tu kara-karaku sia panuntunku,
unnisungmoKomi dao isungan butung to ma’paolai salu tang pakayun bimbang.
6Migarra’mo tu mintu’ bangsa,
sia Mirabunnimo mintu’ to tang mekaaluk,
Mibutaimo tu sanganna tontong sae lakona.
7Iatu uali tappumo narua kasanggangan – tondok daun lauan sae lakona –,
sia mintu’ tondok mangka Misaeran, pa’de dukamo tu tanda pengkilalanna.
8Apa iatu PUANG unnisungi isunganNa tontong sae lakona,
sia napatorro melomo tu isunganNa la Nanii ma’paolai salu.
9Puang la umpaolai malambu’i salunna te lino,
sia umpaolai pangra’ta’ malolo tu mintu’ to sangpetayanan.
10 PUANGmo tu napobenteng malangka’ mintu’ to dipakario-rio,
Iamo tambakuku lan attu kamandasan.
11La narannuangKomi tu mintu’ to untandai sangamMi,
belanna tae’ bangpa Mitampe lenni tu to undaka’Komi, o PUANG.
12Pakendekki tu pa’pudian langngan PUANG tu unnisung dao Sion,
pa’peissananni tu mintu’ penggauranNa dio lu mintu’ bangsa,
13belanna Ia tu To umpembaliangan to’doan rara,
Nakilalai tu tau iato mai,
tae’ anNa tananni boko’ tu pengkamoyana to dipandasa!
14Kamaseina’, o PUANG,
tiroi tu kanapandasangku to ungkabiri’na’,
o Puang, tu unnendekanna’ lan mai baba liang,
15Kumua angku uleleanni tu mintu’ penggauran mala’bi’Mi,
angku lo’dok to kaiyangan lan babanganna anak dara Sion belanna kasalamaran lu dio mai Kalemi.
16Mintu’ bangsa mellambunmo rokko patuang lambe’ pambo’bokna,
sia iatu lentekna nala’ka’i poya natanan buni.
17Umpasombomo Kalena tu PUANG, sia umpabantang katonganan,
iatu to tang mekaaluk naala poya panggaraganna kalena. Higgayon. Sela
18Ondongpi iatu to tang mekaaluk tipero’ rokko lino to mate,
iamotu mintu’ bangsa untananni boko’ Puang Matua.
19Belanna iatu to kalala’ tae’ nala tontong bang dikalupai,
iatu kapa’rannuananna to dipandasa tae’ nala torro sala bang tontong sae lakona.
20Ke’de’Komi, o PUANG, da napasau’ tu tolino,
melo ke dipakannai ukungan tu mintu’ bangsa dio oloMi.
21Parampoi kamatakuran tu tau iato mai,
naissanni mintu’ bangsa kumua iatu tau iato mai a’gan tolino bangri. Sela
Currently Selected:
PA’PUDIAN 9: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
