PA’PUDIAN 88
88
Passambayangna to naala saki tang dampi-dampian
88:1-19
1Misa’ nanian pa’pudianna bati’na Korah. Lu lakona pangala sengo.
Unturu’ baenan sengo: Mahalat Leanot, Misa’ gelong bangunan ada’na Heman, to Ezrahi.
2O PUANG, Puang Matua oto’na kasalamarangku,
meongli’na’ mati’ oloMi allo bongi.
3Sangapaoi anna lattu’ mati’ oloMi tu passambayangku,
tananni talinga tu pengkamoyaku:
4Belanna namossongmo parri’ tu penaangku,
sia merreke’mo lako lino to mate tu sunga’ku.
5Iatu aku te naalana’ bilanganna to la tama tang merambu,
sia susimo’ to tang panggega’.
6Sumpandanmo’ sola to mate,
butung to mate dipongko tungngara lan tang merambu,
tu tae’mo Mikilalai lenni,
sia iatu tisabak ka’tu lan mai lisu pala’Mi.
7Mipalendu’ rokkonamo’ pa’tambunan,
diong malillinna sia mandalanna.
8Tarru’ nao’tonna’ kasengkeamMi,
sia Mipasamboina’ bombangMi. Sela
9Mipatoyangmo dio mai kaleku tu mai sitandangku,
sia Mipatulangdanmo’ napomagalli tau iato mai;
tikurungmo’ sia tae’mo kubelai lelo.
10Iatu matangku maku’dung napobua’ kamandasan,
o PUANG, kiallo-kiallo meongli’na’ Mati’,
sia umpatadona’ pala’ku mati’ Kalemi.
11Ma’dinroKomika umpogau’ kalle-kallean lako to mate;
sia ma’dinraka tu bombo to mate malimbangun la umpudiKomi?
12Ma’dinraka tu kamasokanamMi napa’peissanan tau diong pa’tambunan,
ba’tu iatu kamarurusamMi diong inan dinii ponnong?
13Ma’dinraka tu mintu’ penggauran kalle-kalleanMi naissan tau lan lu kamalillinan?
Sia iatu kamaloloamMi dio tana dinii tang mangingaran?
14Apa iatu aku te meongli’na’ Mati’, o PUANG,
sia iake melambi’ la kendek tu passambayangku mati’ oloMi.
15O PUANG, apara bannangna amMi tibera’,
sia Mibunianna’ lindoMi?
16Iate aku te mandasana’ tempon dio mai mangurangku, takua to la matemo’,
kuperasai tu penggauran masangMi sia ka’tu rannuna’.
17Iatu kare’dekanna ara’Mi ussamboina’,
sia mintu’ penggauran masangMi ussolangina’;
18kiallo-kiallo iatu mintu’nato napatama limbuna’ ten to uai,
pada nasiputu’i tamana’.
19Mintu’ sangmuaneku sia to kusibaan
Mipatoyangmo dio mai kaleku;
iatu sitandangku poton tama kamalillinan.
Currently Selected:
PA’PUDIAN 88: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
