PA’PUDIAN 85
85
Passambayangna to Israel umpalakui anna dipasule tama dandanna
85:1-14
1Lu lakona pangala sengo. Pa’pudianna bati’na Korah.
2O Puang, naalamo penaamMi tu padangMi.
Mipopembalimo tu torro ke’de’na bati’na Yakub:
3Mipagarri’mo tu kapatengkanna taumMi,
sia Mipai’pinnimo batu mapipang tu kasalanna. Sela
4Mirampanammo tu mintu’ kare’dekan ara’Mi,
sia Mitoyangan tu Kalemi dio mai kasengkean ma’lulu-lulumMi.
5Pasulekan tama dandanki, o Puang Matua, oto’na kasalamarangki,
sia pa’deimi tu kasengkeamMi lako kaleki.
6La tontong bangroKomika sae lakona ussengkeikanni?
Sia tontongraka la Mipaparan bati’ki tu kasengkeamMi?
7Tae’raka amMi la umpapayakan sule
anna poparannuKomi taumMi?
8Pakitammokan kamasokanamMi, o PUANG,
sia benkanni tu kasalamaran lu dio mai Kalemi.
9La kuperangii tu apa Napokada Puang Matua, PUANG.
Belanna la umpokada kamarampasan lako taunNa sia lako mintu’ to sallo’Na;
podo da natibalik tu tau iato mai sule lako kabaganna.
10Manassa iatu kamakarimmanan lu dio mai Kalena marengke’ lako mintu’ to ungkataku’I.
Naurunganni tonang tu kamala’biran lan tondokta.
11Iatu kamasokanan sia kamarurusan sitammu sikurre sumanga’,
sia kamaloloan anna kamarampasan sipa’dikkanan.
12Iatu kamarurusan la bu’tu diong mai atena padang.
Na iatu kamaloloan la mentiro lumbang dao mai ba’tangna langi’.
13Sia la umbengan duka kameloan tu PUANG,
anna kendek burana tu padangta.
14Iatu kamaloloan la undoloanNi,
sia la umpapatui bate lalanNa.
Currently Selected:
PA’PUDIAN 85: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
