PA’PUDIAN 76
76
Puang Matua ungkarimmanni to mandasa sia ma’paolai salu
76:1-13
1Lu lakona pangala sengo. Dipasiala oni katapi. Misa’ sengo pa’pudianna Asaf.
2Iatu Puang Matua kalelean lan tana Yehuda,
sia iatu sanganNa mala’bi’ lan tana Israel.
3Dio Salem den tu tendaNa,
na dao Sion nanii banuanNa.
4Indemoto tu Nanii urrebong-rebong mintu’ tinaran pandillak,
sola balulang sia la’bo’ sia mintu’ parea rari. Sela
5Pandillak-dillak tonganKomi sia mala’bi’,
dao mai buntu nanii pangrampan.
6Mintu’ to lalong dirampamo,
sia tarru’ leppeng,
sia mintu’ to barani tang pa’belamo.
7O Kapenombanna Yakub, belanna peada’Mi,
anna mintu’ kareta sola darang leppengmo.
8Kamumo, sia inang Kamumo tu metakuran;
sia mindara la tumanan dio oloMi,
ke re’dekki tu ara’Mi?
9Dao mai langi’ Minii umperangii pa’paolaimMi salu,
mataku’mi sia bitukmi tu lino.
10Tonna ke’de’ tu Puang Matua la ma’paolai salu,
la ungkarimmanni mintu’ to madiongan penaanna lan te lino. Sela
11Manassa napudiKomi tu to masarrang,
sia to masarrang tinampepa Mitaro’to’.
12Mangallonankomi sia palesso’i tu pangallonammi lako PUANG, Kapenombammi;
mintu’ tu to tiku lao ungguririkki Puang, pennoloanni tu pamengan lako Puang metakuran.
13Tu untepok kamatampoanna tu mintu’ arung,
sia umparampoi metakuranna tu mintu’ datu lan lino.
Currently Selected:
PA’PUDIAN 76: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
