PA’PUDIAN 65
65
Nanian untimang kurre sumanga’ kamasokananNa Puang Matua
65:1-14
1Lu lakona pangala sengo. Pa’pudianna Daud. Misa’ nanian.
2Lan Sion sipato’ nanii kendek pudi-pudian mati’
Kalemi, situang penaa rapa’, o Puang Matua;
sia mati’ Kalemi la kinii umpalesso’ pangallonangki.
3O Puang, tu umperangii passambayangna tau,
mati’ Kalemi nanii mengkara’pa mintu’na kepenaanna.
4Ma’rupa-rupa kakadakean untaloina’,
apa mintu’ salaki la Miseroi.
5Maupa’ tu to Mipilei langsa’ sia to Mipopengkareke’,
kumua anna torro lan tarampakMi.
La dia’ tu penaangki diona kameloanna banuamMi.
Iamotu kamaindanan lan banua kabusungamMi.
6Tete dio penggauran kalle-kallean la Minii umpebaliikan tu diona kamaloloan,
o Puang Matua, oto’na kasalamarangki,
sissareanna mintu’ randan langi’
sia mintu’ lelean uran.
7Tu diona kamatotoramMi amMi pabantang buntu,
belanna umpotambeke’Komi kakuasan.
8Tu umparadan tasik marussa’,
iamotu russa’ bombangna
sia kamarukkanna tu mai to sangpetayanan.
9Naurunganni mintu’ to dio lelean uran ungkabangnga’
tanda kalle-kalleamMi,
sia Kamu umpopela’tekki tu matallo matampu’.
10Kamumo sae umpetayanni te lino sia umpasebo uainna,
sia Mipamalompo masapi.
Iatu pangkalo’ Puang Matua saba’,
Miben tallu bulinna tu tolino. Ondongpi Mipatepu tu mintu’na.
11Kamu umpamarumpe mintu’ pa’kadaang tengko sia umpalollo’ pa’buakan tengko
sia Mipemalosse’i uran dilangi’,
amMi pamasakkei tu mai tananan.
12Kamu ummakotai kameloamMi te taun iate,
sia sitana’takan tu malunakna dio mai lalan lentekMi,
13Unta’pai riu dio kapadanganna,
na mintu’ tanete umpobelo kaparannuan.
14Mintu’ kapadanganna napemarua’i domba sia bembe’ ma’baanan
sia mintu’ malompona umpobelo gandung;
nasila’tekan sola nasangi sia menani.
Currently Selected:
PA’PUDIAN 65: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
