PA’PUDIAN 63
63
Kamamaliran lako Puang Matua
63:1-12
1Pa’pudianna Daud tonna dio padang aak, lili’na Yehuda.
2O Puang Matua, Kamumo Kapenombangku, Kamumo tu kupeangla’,
napoma’rangKomi deatangku,
sia nakamali’Komi kaleku,
dio padang rangke sia ba’ta’, sia tang nailli’ uai.
3Susimoto la kunii umpenunuKomi lan inan kabusungan, la untiro kuasamMi sia kamala’biramMi.
4Belanna iatu kamasokanamMi mandu maelo ia anna katuoan;
la napudiKomi tongka’ dililaku.
5Susimoto angku la umpudiKomi angge tuoku,
sia diona sangamMi angku la umpopempala’ limangku.
6Iatu deatangku butung la dipedia’i sanda mammi’na sia malompona.
Sia iatu randan dipudukku la mela’tek umpudiKomi.
7Tongku kilalaiKomi diong dali’ patindoangku,
sia maroyana’ untangnga’-tangnga’Komi.
8Belanna Kamumo mangka untunduina’,
sia diong to’ ongan pani’Mi kunii sende paiman.
9Tontong tu penaangku la’ka’ lako Kalemi,
sia lima kananMi ussande’na’.
10Apa iatu to undaka’ sunga’ku la naka’tu,
la ditombon lao rokko mangapi’na tana.
11Tau iato mai la disorong lako bassi mataran,
sia la napotaa sindallung.
12Apa iatu datu la parannu paiman tete dio Puang Matua;
mintu’na tu to undudung sumpa ussa’bu’ sanganNa, la ma’sattuan,
belanna iatu sadangna mintu’ to umpokada mo’rang la dikamummu’.
Currently Selected:
PA’PUDIAN 63: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
