PA’PUDIAN 58
58
Umparampo gau’na to mangra’ta’ pakayun bimbang
58:1-12
1Lu lakona pangala sengo. (Unturu’ baenan sengo:) Dandi’ bala’-bala’i. Pa’pudianna Daud; misa’ ianan ballo.
2Tonganraka unnolakomi salunna, e deata?
Tang pakayun bimbangrokomika umpaolai salunna mintu’ ma’rupa tau?
3Inang tae’, sangadinna umpana’ta’komi kakadakean lan penaammi,
sia mipamagasa dio kamasa’garan limammi tu timbangammi lan te lino.
4Mintu’ to tang mekaaluk sepangmo tempon dikianakanna,
sia pusamo randuk ditibussananna tu to mo’rang.
5Tau iato mai keipo susi ipo ula’,
sia susi ula’ rame taru ussissing talinganna.
6Tu noka umperangii gamaranna to ma’balik mata,
iamotu to manarang umbasa-basa sengona.
7O Puang Matua, nisak-nisakki tu mintu’ isinna lan sadangna tau iato mai,
rebong-rebongi tu mintu’ torana anak singa, o PUANG;
8Melo ke be’ko’i tu tau iato mai susi uai mere,
iake umpessumpiranni tinaranna, melo ke bussui.
9Melo ke lollo’i susi suso marassan menono’,
susi anak dadi sala tang untiropa allo.
10Tonna tae’pa naruai api ranga’-ranga’ keduri tu kurinmi,
iatu mamatannapa sia nakandenamo api la Napabaai angin Puang.
11La parannu paiman tu to malambu’ ke natiroi tu pepakkan iato,
sia la nabasean lentekna tu rarana to tang mekaaluk.
12Naurunganni ma’kada tu tau nakua:
Manassa tongan den poleanna tu to malambu’,
ondongpi den tu Kapenomban ma’paolai maloloi salu lan lino.
Currently Selected:
PA’PUDIAN 58: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
