PA’PUDIAN 56
56
Umposande’ Puang Matua lan kamaparrisan
56:1-14
1Lu lakona pangala sengo. Unturu’ baenan sengo: Bu’ku’ dao kayu tarpin mambela. Pa’pudianna Daud, misa’ ianan ballo, tonna tingkanni to Filistin tu Daud dio tondok Gat.
2Katuru-turuina’, o Puang Matua, belanna la nalullu’na’ tolino,
napasumpuna’ tu mai uali kiallo-kiallo.
3Mintu’ ualingku ullullu’na’ kiallo-kiallo,
belanna buda tu tau urrariina’ situang kamatampoanna.
4Iake narampoina’ kamatakuran,
Kamu kuposande’.
5Lako Puang Matua – la kupudi tu kadanNa –,
inang lako Puang Matua tu kunii sande’, natae’ kumataku’;
apara tu ma’din nagauranna’ batang kalena tau?
6Tontong keallo tu tau iato mai umbulang leko’ kadangku
sia mintu’ tangnga’na la ussanggangina’.
7Sipakulu-kulu tu tau iato mai sia membuni, sia umpenunu tengkaku,
anna tumaya la unnala sunga’ku.
8Ma’apai nala ma’din tilendok tu tau iato mai nabudamo kakadakeanna?
Pessambakanni tu tau iato mai diona kasengkeamMi, o Puang Matua!
9Misimporrosammo tu salamba salaoku,
sia patamai buli-bulimMi tu uai matangku;
Tang tisura’ nasangmoraka to lan sura’Mi?
10Ia angku meongli’, maneri mallai sule tu mintu’ ualingku,
kutandai tu iannate kumua:
narondongna’ Puang Matua.
11Lako Puang Matua – la kupudi tu kadanNa –,
lako Puang – la kupudi tu kadanNa –
12Inang lako Puang Matua tu kunii sande’, natae’ kumataku’;
apara tu ma’din nagauranna’ tolino?
13Mati’ Kalemi, o Puang Matua, pato’ kunii umpalesso’ mintu’ pangallonangku
mati’ Kalemi la kunii umpennoloan pemala’ pangallonan.
14Belanna Mirampanammo tu deatangku dio mai kamatean,
sia Mikampaina’ natae’ natilende’ tu lentekku,
kumua angku lolang dio oloNa Puang Matua
lan arrangna to tuo.
Currently Selected:
PA’PUDIAN 56: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
