PA’PUDIAN 49
49
To sugi’ baga
49:1-21
1Lu lakona pangala sengo. Pa’pudianna to Korah.
2Perangii te iannate, e mintu’ bangsa,
patananni tu talingammi, e mintu’ banne lino,
3La to bitti’ la to la’bi’
la to sugi’ la to kalala’,
mintu’ massola nasang.
4Kakinaan manna sun dio randan pudukku,
sia kapaissanan manna natangnga’ ba’tengku.
5Umpatananna’ talingangku lako kada peada’ to kinaa,
sia la kupasombo dio oni katapi tu umpussakkinna penaangku.
6Apara bannangna angku mataku’ra, ke allo kamaparrisan,
ke napatama limbuna’ kakelokanna mintu’ to untananni sura kambutu’ku.
7Iamotu to urrannuan iananna
sia ussattuan kasugiran lallangna?
8Moi misa’ tau tae’ nabelai ulla’bak siulu’na,
ba’tu umpenombanni lako Puang Matua tu pesulang batang kalena,
9– Belanna lendu’ masuli’na tu pela’bak deatanna,
tae’ nabelai sae lakona. –
10Kumua anna marendeng tuo,
sia da nasitiro tang merambu.
11Belanna natiro tu to kinaa mate,
sia iatu to baga sia to tang paissan pada sanggang duka,
anna tampeanni to senga’ tu barang apanna.
12Nasanga penaanna kumua iatu banuanna la tontong marendeng sae lakona,
sia iatu pa’tondokanna la nasiosso’i;
iamoto anna pasikonai kalena tu mai padangna.
13Apa iatu tolino sola kamala’biranna tae’ anna marendeng;
sia iatu a’ganna sangtinti patuoan la ditunu.
14Iamoto tu dalle’na to umposande’ bang kalena,
iamo katampakanna to tu to umporai misa kadanna. Sela
15Tau iato mai susi domba tileak tama lino to mate,
na iatu to mangkambi’na iamotu kamatean;
na to ma’bulo lollong la umparentai, ke melambi’;
sia iatu a’gan merrupanna la naputtai lino kamatean,
naurunganni tae’mo inanna.
16Apa Puang Matua tu la ullendokan deatangku
dio mai kuasanna lino to mate,
belanna Ia unnangka’na’ langngan. Sela
17Da ammu magiang, ke denni misa’ tau mellolo rangka’,
sia samala’bi’-la’bi’na tu banuanna.
18Belanna iake nalambi’mi kanna bunu’na moi misa’ apa tae’ anna baa lenni,
sia tae’ anna la undi urrundu’i kamala’biranna.
19Belanna moi anna sangai tu kalena kumua maupa’ tonna tuonapa,
sia napudiko tau diona kamauparammu.
20Tae’ nasalai tang la umpengkara’paiko to dolomu,
tu tae’mo nala sitiro len kamasiangan.
21Iatu to unnappa’ kamala’biran, apa tae’ nakinaa,
iamo sangtinti patuoan la ditunu.
Currently Selected:
PA’PUDIAN 49: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
