PA’PUDIAN 36
36
Katangmekaalukanna to kasalan na kamasokananNa Puang Matua
36:1-13
1Lu lakona pangala sengo. Pa’pudianna Daud, taunNa PUANG.
2Iatu kasalan ma’kada lan ba’tengna to tang mekaaluk;
– tae’ bang kamatakuran lako Puang Matua dio lindona –
3Belanna naa’panmo ia kasalan tu penaanna,
diona kaungkanassan, kumua sipatu la dikabiri’ tu kakadakeanna.
4Mintu’ tu kada sun dio pudukna kakadakean manna sia kalando-pa’duan manna,
tae’mo anna lolang kinaa sia tae’mo anna pogau’ kameloan.
5Untangnga’ bang kabulitukan diong dali’ patindoanna,
anna ola lalan kadake,
sia tae’ narampananni tu kakadakean.
6O PUANG iatu kamasokanamMi sumpu langngan langi’,
sia iatu kamarurusamMi tu’tun dao massaliu’na.
7Ia duka tu kamaloloamMi susitu mai buntu sumpu malangka’,
sia pa’paolaimMi salu ten to tasik mandalan liu.
O PUANG, Kamumo tu ullendokanni tu tolino sia olo’-olo’.
8Tumba melona tu kamasokanamMi, o Puang Matua,
mintu’ ma’rupa tau umpentionganni ongan pani’Mi.
9Tau iato mai la dipedia’i sanda mammi’na lan banuamMi,
sia la Mipairu’ dio mai to’ salu marasamMi.
10Belanna dio Kalemi den tu kalimbuang katuoan,
sia lan arrangMi kinii untiro kamasiangan.
11Patontongi tu kamasokanamMi lako to untandaiKomi
sia kamaloloamMi lako to bulo lollong penaanna.
12Da Mipopa’elo’nai tu to matampo ullesena’,
sia da Mipopa’elo’nai tu to tang mekaaluk ullolaina’.
13Indemoto nanii tibambang tu mintu’ to umpogau’ kakadakean,
dibambangammo rokko tu tau iato mai sia tang nakullemo bangun sule.
Currently Selected:
PA’PUDIAN 36: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
