PA’PUDIAN 34
34
PUANG urrinding pala’ mintu’ taunNa
34:1-23
1Pa’pudianna Daud tonna unna’ga to bomboan kalena dio olona Abimelekh, tu unnula’i anna mallai.
2La tontongna’ umpudi PUANG,
sia iatu kapa’pudi-pudian lako tang tore sun dio pudukku.
3Iatu deatangku massattuan dio PUANG,
sangapaoi anna rangii to umpamadiongan penaanna anna parannu-rannu!
4La mituru’na’ umpakapua PUANG,
melo ke pada-padaki’ umpakala’bi’ sanganNa.
5Undaka’mo’ PUANG, anNa baliimo’,
sia Narampanammo’ dio mai mintu’ kukataku’na.
6Iatu tau iato mai mentingara langngan Puang, anna mabaliga’ tu lindona belanna parannu,
sia iatu lindona tae’ natodingi siri’.
7Iate to mandasa iate meongli’mo, anNa tananni talinga PUANG,
sia Nalendokan, dio mai mintu’ kamaparrisanna.
8Iatu Malaeka’Na PUANG lumiling,
ungkampai mintu’ to ungkataku’
Puang sia urrinding pala’ tau iato mai.
9Perasaimi sia tiromi, kumua iatu PUANG masokan;
maupa’ tu to umpentirerungI.
10Kasiri’I, tu PUANG, e mintu’ to masallo’Na,
belanna tae’ misa’ kapu’duranna tu to ungkasiri’I.
11Iatu anak singa kapu’duran sia ussa’ding tangdia’,
apa iatu to undaka’ PUANG tae’ nala kapu’duran len apa maelo.
12Maikomi, e kamu anakku umperangiina’,
kuada’ikomi ungkasiri’ PUANG.
13Mindara morai tuo,
sia ungkaduangi kamalamberan sunga’ anna tiroi tu maelona?
14Pakari’pii tu lilamu umpokada kadakena,
sia iatu pudukmu da narandanni kalando-pa’duan;
15Lempanganni tu kakadakean sia pogau’i tu kameloan,
daka’i tu kamarampasan sia ula’i.
16Iatu matanNa PUANG umpemantang to malambu’,
sia natananni talinga tu peongli’na.
17Apa Natiro sengke tu to umpogau’ kakadakean,
la umpa’dei lan mai lino tu kadilamban-bayo-bayoanna tau iato mai.
18Iake meongli’i tu to malambu’,
Natananni talinga PUANG,
sia Narampanan dio mai mintu’ kamaparrisanna.
19Iatu PUANG tang untoyangan to rantang buana
sia ullendokanni tu to rosso penaanna.
20Iatu to malambu’ buda kamandasanna,
apa Narampanan PUANG dio mai mintu’nato.
21Ia ungkaritutui mintu’ bukunna,
moi misa’ tae’na la dile’to.
22Iatu to tang mekaaluk la mate narua kasanggangan,
sia iatu to ungkabiri’ to malambu’ la dipakannai salu.
23 PUANG ullendokanni tu deatanna taunNa,
sia tae’ misa’ tu to umpentionganNi la dipakannai salu.
Currently Selected:
PA’PUDIAN 34: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
