PA’PUDIAN 28
28
Puang Matua balulang toto’na to ma’patongan
28:1-9
1Pa’pudianna Daud.
Mati’ Kalemi, o PUANG, kunii meongli’,
o buntu batungku, da Mima’pakappa untiro-tirona’,
kumua iake tae’i Midampangna’,
da angku butung to tama lo’ko’.
2Perangii tu pengkamoyaku,
ke meongli’na’ mati’ Kalemi,
sia ke umpatadona’ pala’ku
lako inan mandu maindan lan kabusungamMi.
3Da Mipasiurakkina’ to tang mekaaluk,
sia sola to umpogau’ kakadakean,
tu umpokada mammi’ sola-solana,
apa lan penaanna den tangnga’ kelok.
4Papakkanni tu tau iato mai sitinaya gau’na,
sia sitinaya kakadakeanna penggauranna;
papakkanni sitinaya lalan limanna,
pabala’i tau iato mai sitinayanna tu napogau’na.
5Belanna tae’ nadampangi tau iato mai tu mintu’ penggauranNa PUANG,
ba’tu panggaraga limanNa,
Iamoto la Napempa’nakan tu tau iato mai
sia tae’mo anNa la umbangunanni sule.
6Mintu’na kadipudian lu lako PUANG, belanna Natanannimo talinga tu pengkamoyaku.
7 PUANGmo kamatotorangku sia balulangku;
Iamo nakatappa’i penaangku,
angku appa’mo pa’tunduan.
Iamoto anna sende paiman tu penaangku
sia la kupakendekan pa’pudi-pudiangku.
8 PUANGmo kamatotoranna taunNa,
sia Iamo tambakuku nanii kamakarimmananna taunNa tu mangka Natokko.
9Lendokanni tu taumMi
sia pamasakkei tu mana’Mi,
kambi’i sia kaduttu’i sae lakona.
Currently Selected:
PA’PUDIAN 28: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
