PA’PUDIAN 108
108
Pa’kurre sumanga’ sia passambayang umpalaku kasalamaran
108:1-14
1Misa’ nanian. Pa’pudianna Daud.
2Rapa’mo tu penaangku, o Puang Matua,
la menanina’ sia umpakendek pa’pudian situang penaa kalebungku.
3Millikkomi, e dandi sia katapi,
la untundanna’ dannari lambe’.
4O PUANG, la kupudiKomi lan lu mintu’ bangsa,
sia la umpakendekna’ pa’pudian mati’ lan lu mintu’ to sangpetayanan.
5Belanna iatu kamasokanamMi untongloi langi’,
sia iatu kamarurusamMi tu’tun dao massaliu’na!
6Pamatandei tu Kalemi daona lu langi’, o Puang Matua,
sia sangapaoi anna ussamboi lino tu kamala’biramMi.
7Anna tilendok tu mintu’ to Mipakaboro’,
rinding pala’kan lima kananMi sia tanding talingakan.
8Mangkamo ma’kada tu Puang Matua lan inan maindanNa.
La mela’tekna’, sia la kutaa-taa tu Sikhem,
sia la kusuka’ tu rantena Sukot.
9Iatu Gilead taaku, sia iatu Manasye taaku duka,
na iatu Efraim iamo sarong batungku,
sia iatu Yehuda iamo tekken kapayungangku.
10Na iatu Moab pembasean lentekku;
anna iatu Edom la kunii umpellebaran sepatungku,
la unnarrakna’, belanna kutalo tu tondok Filistea.
11Mindara tu la umbaana’ tama tondok ditambakuku?
Mindara tu la ussolanna’ lako Edom?
12Tang Kamuraka, o Puang Matua, tu mangka ussualekan?
Tae’moraka Mila sun ussolan mintu’ to pararingki, o Puang Matua?
13Tunduikan unnea ualingki,
belanna tae’ gai’na tu pa’tunduan tolino.
14Tete dio pa’tunduanNa Puang Matua angki pogau’ ma’lalong-lalong,
belanna Ia la ullullu’ ualingki.
Currently Selected:
PA’PUDIAN 108: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
