MIKHA 5
5
Pa’nubua’ diona Mesias na kadatuanNa
5:1-14
1Na iatu iko, e Betlehem Efrata, moi ammu bitti’ dio lu mintu’ tongkonanna Yehuda, apa dio mai kalemu la nanii bu’tu lako Kaleku tu misa’ tau tu la dadi to ma’parentana to Israel, tu bu’tu tempon dio mai, dio mai allo tae’ tipamulanna.
2Iamoto la Nasa’biangan Puang tu tau iato mai sae lako attu, kumua iatu tau la kianak, kianakmo. Attu iato iatu to torropa tu siulu’na la sule sola to Israel.
3La tunannang ungkambi’ tau iato mai tete dio kamatotoranna PUANG sia kamala’biranNa sanganNa PUANG, Kapenombanna; sia la torro marampa’ tu tau iato mai, belanna la tarompo’ tu Mesias sae lako mintu’ randan langi’.
4Sia Ia la oto’na kasalamaran. Iake la tamai tondokta tu to Asyur sia iake la ullesei tongkonan layukta, manassa la tapabendanan pitu to mangkambi’ sia karua arung dio mai tolino la unneai,
5tu la umpakandei domba tu tondok Asyur sia tondokna Nimrod lan lu babanganna, anna purai pa’dang. Sia la mangrampanan dio mai Asyur, ke saei tu tau iato mai tama tondokta sia iake ullesei lili’ta.
6Sia iatu to torronapa Yakub la dio lu ba’tu pira-pira budanna bangsa sangtinti ambun dio mai PUANG, sangtinti uran kamban dao lu taruk maluna, tu tang untayan tolino ba’tu umpeagi rupa tau.
7Sia iatu to torronapa Yakub la dio lu mintu’ to sangpetayanan sia la lan lu ba’tu pira-pira budanna bangsa susi misa’ singa dio lu olo’-olo’ lan pangala’, sia sangtini misa’ singa mangura dio lu tuntunan domba. Iake tamai inde to dio nadammak sia nase’bu’-se’bu, na moi misa’ tau tae’ urrampananni.
8Iatu limammu la matande daona lu mintu’ to unneako, sia mintu’ ualimmu la dipisanni.
9La dadi allo iato, kadanNa PUANG, kumua la Kupisanni tu mintu’ darangmu dio mai kalemu sia la Kusanggangi tu mintu’ karetamu.
10La Kupisanni tu mai kota lan lu padangmu sia la Kuro’pokan tu mintu’ tambakukummu.
11La Kupisanni duka tu balik mata lan mai limammu sia la tae’mo to pakita-kita dio kalemu.
12La Kupisanni tu rapang-rapang dipodeata dipa’mu sia batu dipodeatammu lan mai tangngamu, sia tae’mo mula tukku menomba lako panggaraga limammu.
13La Kulampi’i duka tu lentong dipodeatammu lanmai tangngamu sia la Kusanggangi tu mintu’ kotamu.
14Sia la mapallaNa’ sia re’dek ara’Ku la umpabala’i tu bangsa manoka ma’perangi.
Currently Selected:
MIKHA 5: SDA
Highlight
Share
Compare
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
