MALEAKHI 2
2
Tampak ropu dipa’peissanan lako to minaa tang umpogau’ tongan pengkaranganna
2:1-9
1Totemo, e mintu’ to minaa, kamu napatu te apa dipa’peissanan iate:
2Iake tae’i miperangii sia tae’ mipalan penaai, ammi pangke’i tu sangangKu, kadanNa PUANGna mintu’ ma’dandan maritik, la Kuparampo tu tampak ropu lako kalemi, sia la Kupopembali tampak ropu tu pa’passakkemi; ondongpi mangkamo Kupopembali tampak ropu, belanna tae’ mipalan penaai.
3Tonganna, la Kupa’peissanan tu tampak ropu lako bati’mi, sia tai la Kutampolakanni tu lindomi, iamotu tai pa’gaurammi, ondongpi la nariu’ sembangkomi tau inde to lako.
4Attu iato la mitandai, kumua Kupa’peissanammo te kada iate lako kalemi, kumua anna manda’ tu basseKu sola Lewi, kadanNa PUANGna mintu’ ma’dandan maritik.
5Iatu basseKu tu Kutanan sola, iamotu katuoan sia kamarampasan; mangkamo Kukamaseanni tu iannato, kumua anna mengkaola, anna kataku’Na’ sia nakagiangi tu sangangKu.
6Iatu pangadaran manappa’ diona Sukaran aluk lan sadangna na iatu kakelokan tae’ diappa’ dio pudukna. Lolang tu tau iato mai ussikadamakanNa’ situang kamarampasan sia bulo lollong, sia buda tau napatibalik dio mai kakadakean.
7Belanna iatu pudukna to minaa unnanna kapaissanan sia lan mai sadangna nanii tau undaka’ pangadaran diona Sukaran aluk, belanna iamo misa’ pesuanNa PUANGna mintu’ ma’dandan maritik.
8Apa iatu kamu sepangmokomi dio mai lalan pa’pangada’mi diona Sukaran aluk napobannang buda tau titodo; mipakadake tu basse sola Lewi, kadanNa PUANGna mintu’ ma’dandan maritik.
9Iamoto Kupopendadikomi to dilo’bo sia dipopengkadiongan dio tingayona mintu’ to buda, belanna tae’ mituru’i tu mintu’ lalanKu sia mipelindo tu tau, ke mipa’pangadaranni tu Sukaran aluk.
Dipasala tu katangmarurusan lan tananan dapo’
2:10-16
10Tae’raka namisa’ri Ambe’ta sola nasang? Tae’raka namisa’ri tu Puang Matua umpadadiki’? Ma’apari tala sipogauranra tang maruru’ sia umpamatuna basse nene’ to dolota?
11Iatu Yehuda ma’gau’ tang maruru’mo sia iatu penggauran megiangan dipogau’mo lan Israel sia lan Yerusalem, belanna iatu Yehuda umpamatuna apa maseroNa PUANG, tu Nakamali’, sia umpobaine anakna deata to salian bangsa.
12Kenna pisanniori PUANG tu to ma’gau’ susito lan mai tendana Yakub, sae lako bati’na sia moi umpemalaran pemala’ lako PUANGna mintu’ ma’dandan maritik.
13Iatu ma’penduanna mipogau’, susite, iamotu mipasitutu’i uai matammi tu inan pemalaranNa PUANG, ke tumangi’komi sia sumarro, belanna tae’mo Nasailei tu pemala’ sia tae’mo Natarimai diong mai limammi butung to apa nakalo’ penaanNa.
14Sia ma’kadakomi mikua: Ma’apai to? Iamotu belanna PUANGmo tu sa’bi lan alla’mu anna bainemu, tommu mangurapa, tu munii tang maruru’mo totemo, moi na iamo dodo’mu sia baine tonganmu.
15Tae’ misa’ tau umpogau’i susito, tu batta’ penaanna, belanna apara nadaka’ tu tau iato misa’? Bati’na Puang Matua. Katangkinni tu penaammi, da mituru’ kamoraiammi sia da mima’gau’ tang maruru’ lako bainemi tommi mangurapa.
16Belanna Kukabiri’ tu kasitantangan, kadanNa PUANG, Kapenombanna Israel sia iatu kedona to umpasitutu’i kamasa’garan tu bayu lamba’na, kadanNa PUANGna mintu’ ma’dandan maritik. Iamoto, katangkinni tu penaammi, da mituru’ kamoraiammi sia da mima’gau’ tang maruru’.
La sae tu PUANG mangukung
2:17–3:5
17Mipabo’yok tu PUANG napobua’ mintu’ kadammi. Ammi ma’kada kumua: Apara kipabo’yokanNi? Iamotu belanna mikua: Minda-minda tu umpogau’ kadake iamo melo dio pentiroNa PUANG, na iatu to susito nakalo’ penaanNa; umbara Nanii tu Puang Matua umpaden ukungan?
Currently Selected:
MALEAKHI 2: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009