BATING 2
2
Ma’penduanna bating: Yerusalem naluang kare’dekanna ara’Na Puang Matua
2:1-22
1Ma’patumbai tu Puang tu diona kare’dekan ara’Na
anNa pasamboi salebu’ tu anak dara Sion!
Iatu kamala’biranna Israel
Napempa’nakanmo dao mai langi’ rokko lino,
tae’mo Nakilalai tu pelleseanNa
tonna attu kare’dekanna ara’Na.
2Nasanggangi nasangmo Puang tu padangna Yakub,
moi misa’ tae’ Nakatirinnai.
Diona kare’dekanna ara’Na, Natuanni
tu tambakukunna anak dara Yehuda;
Natua’mo rokko padang, sia Napakasarembangan
tu kadatuan sola mintu’ arungna.
3Diona kadukkuanna kasengkeanNa Nata’takki
tu mintu’ tandukna Israel.
Naporonan sule tu lima kananNa,
tonna reke’i ualinna;
ondongpi ma’lu-lulu tu kasengkeanNa
lako Yakub ten to api ma’kande tiku lao.
4Nabinting tu panaNa butung to misa’ uali,
Naaakammi tu lima kananNa susito pabali-bali;
Napatei nasangmi
mintu’ to ballo ditiro;
lan tendana anak dara Sion
Nabarrakan tu kare’dekan ara’Na ten to api.
5Iatu Puang susimo misa’ uali.
Naampello’mo tu to Israel,
mintu’ tongkonan layukna Nasanggangmo,
mintu’ tambakukunna Natuanmo,
sia Napamakambanmo tu sarrona
sia dallo riona lako anak dara Yehuda.
6Narondonnimi tu tendaNa ten to rompo,
iatu inan kasitammuanNa Nasanggangmo.
Napamalingmo PUANG tu tau lan Sion.
Anna tang ungkilalai pa’gauran sia allo katorroan,
sia diona kama’lulu-luluanna kasengkeanNa
anNa sayui tu datu sia to minaa.
7Tang Naangga’mo Puang tu inan pemalaranNa,
sia Nakasirisan tu inan maindanNa,
Nasorongmo tama kuasanna uali
tu rinding tembo’ tongkonan layukNa.
Mamak bang tu tau iato mai lan banuanNa PUANG,
susi ke allo pa’maruasan.
8Nara’ta’mo PUANG la Nasanggang,
tu rinding tembo’na anak dara Sion.
Nae’te’mo tu ulang pesuka’
sia tang Napodoran tu limanNa la pasanggang.
Iatu baba tembo’ sia rinding tembo’ Napamadu’sen,
anna sangtibambangan.
9Iatu babanganna lamma’ nasang rokko padang,
iatu salli’na nasanggangmo sia Natesse-tesse;
iatu datunna sia iatu mai arungna mentialla’mo dio lu mintu’ bangsa,
iatu pangadaran diona sukaran aluk tae’mo;
sia iatu mai nabi tang unnappa’mo patiro mendeata dio mai PUANG.
10Mintu’ to matua-tuanna anak dara Sion
ma’pakappa unno’ko’ diong padang;
sia nabubu’i barra’-barra’ tu ulunna,
sia ma’pote dibolong.
Natukku rokko padang
tu mintu’ anak dara Yerusalem.
11Saunanmo tu matangku tumangi’,
iatu ba’tengku naponnoi kamagiangan,
rantang tonganmo tu buaku
napobua’ kasangganganna anak dara bangsaku,
belanna iatu mai pia’-pia’ sia iatu mai ma’susunnapa
tibambang ma’ipu dio lu tana lapang lan kota.
12Ma’kadami lako indo’na nakua:
Umbara nii tu gandung sia anggoro’?
Iatonna attu iato tibambangmi ma’ipu susito ditobok
dio lu tana lapang lan kota,
iatonna attu iato ka’tumi tu sunga’na
dio to’ susunna indo’na.
13Apara tu la kupokadangko, apara tu ma’din kupasangtintiangko,
e anak dara Yerusalem!
Apara kupasangtenderan a’gammu la umpakatanako,
o anak dara, iamotu baine anakna Sion?
Belanna malua’ tu bangkemu ten to tasik;
mindara ma’din undampiko?
14Iatu nabimmu untiroangko
patiro mendeata tu apa tae’ gai’na sia tae’ patunna,
tae’ natuarasangko tu kakadakeammu
la undampai tu dalle’mu,
untiroangko patiro mendeata,
tu tae’ gai’na sia ma’pakena bang.
15Mintu’ to lendu’ lalan
massala’pa-la’pa diona a’gammu.
Ma’telle-telle sia unniling-iling
diona a’ganna anak dara Yerusalem,
nakua: Iamoraka te tu kota tu disanga
sundun kamaballoanna,
tu napopaiman mintu’ issinna lino?
16Napengangaimoko sadangna
mintu’ ualimmu,
ma’telle-telle tu tau iato mai sia
singgarigi’-rigi’ isinna,
anna ma’kada nakua: tasanggangimi.
Ondong pissan iate allo iate iamo allo tapiang-piang,
talambi’mo sia tatiromo.
17Napogau’mo PUANG tu apa mangka Natangnga’,
Napalanda’mo tu apa mangka Napokada, tu apa mangka Napa’parentan tempon dio mai;
Mangrabunnimo, tang Nakatirinnai len.
Napasende tu ualimmu diona iko,
Napalayangmo tu tandukna mintu’ to umbali-baliko.
18Meongli’mi tu penaanna bangsa iato mai langngan Puang. –
E, rinding tembo’na anak dara Sion,
Da’ito anna silindangan tu uai matammu susi salu’-salu’
ke allo sia ke bongi,
da mumelayo len,
sia iatu mata taummu da natorei tumangi’.
19Millikko ammu sumarro ke bongi,
ke randukoi pa’kampan,
barrakanni tu penaammu
susito uai dio oloNa Puang,
popempala’i tu limammu langngan Puang
belanna sunga’na anakmu,
tu ma’ipu napobua’ katangdiaran
dio lu mintu’ kasepangan lalan.
20O PUANG, tiroi sia pemarangai!
Mindara tu Mipasusito?
Sipaturaka tu baine ungkande anakna,
iamotu pia naria?
Sipaturaka lan inan maindanNa Puang
dipatei tu to minaa sia nabi?
21Dio lu mintu’ batatta situlambenan
diong lu padang tu pia muane sia to matua;
mintu’ tu pia baine lolle’ku sia pia muane lolle’ku
tibambangmo nakande bassi mataran.
Iatonna allo kasengkeamMi Mipatei tu tau iato mai,
sia tang Mikatirinnaimo Mirere’.
22Susito la lao lako allo pa’maruasan
Mitambai nasang tu apa umpatirambanna’ tiku lao;
iatonna allo kasengkeanNa PUANG
tae’ bang misa’ tau lussu’, sia tae’ bang misa’ torro mana’pa.
Iatu mai pia’-pia’ kudaranai sia kupelobo’i,
nasabu’i nasangmo ualingku.
Currently Selected:
BATING 2: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009