AYUB 39
39
1Ma’dinrokoka unnularan kandena singa birang, sia umpabossa kamailuanna anak singa,
2ke tukkui lan lo’ko’na, ba’tu mangamu’i lan to’ pangala’-ala’?
3Mindara umpadenan kande kaduaya ke metambai tu anakna langngan Puang Matua, lu lako lu dio mai, tae’ nakande?
4Mutandairaka tu attu nanii kianak bembe’ lampung? Mupemarangaraka tu kakianakanna donga birang?
5Ma’dinraka muia’ tu bulan kakia’tanganna sia muissanraka tu attu nanii kianak?
6Malimungkumi anna dadianni tu anakna, natibussananni tu bua pa’tambukanna.
7Samatoto’-toto’na tu anakna, sia lobo’ dao kapadanganna, malemo ma’lingka anna tang sule lako indo’na.
8Mindara umpopa’elo’na keledai lampung samale-malena, ondongpi, mindara ungko’ka’i ulangna keledai lamba’,
9tu Kupamanassan padang rante la natorroi sia padang ma’sin la nanii ma’pasang?
10Napetaai tu kamaruasanna kota, sia tang naperangii tu pelallakna to unnula’i;
11undaka’-daka’ bang la nakandena dao lu buntu sia sumalong untiro apa maluna.
12Morai siaraka tunduk lako kalemu tu sapi lampung, morairaka ma’bongi dio to’ inan pa’pakandean sapimmu?
13Ma’dinraka muparuku unnulangi tu sapi lampung lan to’ pangkalo’ tengko? La ussalagaraka pa’lak diong lombok ammu rendenni?
14Murannuammoraka, belanna tarru’ mawatang? Ba’tu musoronganraka tu kamara’takammu?
15Musangaraka ma’din la unteke’ gandungmu lako pangrampa’ sia la messule-sule urrampunni dio to’ panglullurammu?
16Marua’ sikapa-kapan tu pani’ burung unta; mamaseraka tu buku pani’na sia bulunna,
17ke nalamba’i tu tallunna dio lu padang sia nasa’biangan nalassui bungin,
18anna kalupai kumua dilese manii sia ma’din nalullu’ olo’-olo’ kapadanganna?
19Makarra’ bang tu gau’na lako anakna, butung to tangia apanna; tang nadampang kumua tae’ gai’na tu kabo’yoranna.
20Belanna Puang Matua umpadapan kakinaan burung unta sia tae’ Napaketaai patiro penaa.
21Iake barani kumapa-mapa male, napetaai tu darang sia pakkanarang.
22Mubela siaraka umbengan kamawatangan lako darang sia umpakei tomba-tomba tu sokkongna?
23Mubela siaraka umpopekkondongi susito batik? Sumeke metakuran na mepatiramban.
24Parannu penaanna mekkae’-kae’ ullese lombok, sia situang kamawatanganna lu lako inan kasirarian;
25umpetaai kamatakuran sia tang magiang, sia tang sorong boko’ untiro pa’dang.
26Sigarentongan tu tambila dao boko’na, sia pandillak-dillak tu doke sia doke bandangan;
27tarru’ liu sia tang tipodo’ len unnampello’ padang sia tang diatta dipatanan, ke unnonimi tu tarompe’;
28ma’mehe’-mehe’, ke dipannonioi tu napiri tanduk sia mambelapa napebaumi tu inan kasirarian, sia iatu petambana pangulu sia pelallakna to sirari.
29Tete dioraka pa’inaammu, anna mettia’ tu langkan tasik anna balla’i tu pani’na ma’palusau’?
30Dionaraka parentamu anna mettia’ lu langngan tu tarru’ sia nagaragai tu serangna dao malangka’na,
31dao buntu batu nanii sia natorroi dao tu lolok batu sia potok buntu?
32Indeto dio mai nanii umpenunu kande, sia matanna ummanta-manta mambelai;
33iatu mai anakna ummimmi’ rara, sia umba tu nanii batang rabuk, inde dukato nanii.
Ayub umpamadiong kalena dio oloNa Puang Matua
39:34-38
34Ma’kadaomi tu PUANG lako Ayub, Nakua:
35Moraiparaka tu to pasayu la site’ge’ To umpoissan angge maritik? Iatu to umpasala Puang Matua la umpebalii tu iannato!
36Mebalimi tu Ayub lako PUANG, nakua:
37Manassa iate aku te tarru’ madiongna’, umba la kukua mebali lako Kalemi? Kutampun tu pudukku.
38Pissanmo’ ma’kada, apa tae’mo kula untolei; ondongpi penduan, apa tae’mo kula umpatarru’i.
Currently Selected:
AYUB 39: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
