HOSEA 14

1Iatu Samaria la umpassanni tu salana, belanna pabali-balimo lako Kapenombanna. La tibambang tu tau iato mai nakande pa’dang sia la dipessambakan tu mai anak bitti’na sia iatu mai baine ma’tambukna la ditesse tu pa’tambukanna.

Kamengkatobaran sia pangallonan

14:2-9

2Mengkatoba’ko, e Israel, lako PUANG, Kapenombammu, belanna tete dio kakadakeammu, ammu tisumbang.

3Saemokomi umparampoi tu pangakuan kasalan, sia mengkatoba’ lako PUANG, ammi ma’kada lako Kalena kumua: Pa’dei nasangi tu mintu’ kakadakeangki, ammi katuru-turuikan; kipennoloammo tu pangakuan dio randan pudukki butung to sapi laki dipangurrandean.

4Tae’mo anna Asyur tu la urrampanangkanni, tae’mo angki la ma’darang. Sia tae’mo angki la ma’kada lako panggaraga limangki kumua: O Kapenombangki! Belanna diori mai Kalemi nanii unnappa’ kamamasean tu pia biung.

5La Kuparapa’ tu kamembokoranna tau iato mai, la kalebu tallang tu penaangKu ungkamasei, belanna iatu kasengkeangKu toyangmo dio mai kalena.

6La butungNa’ to ambun lako to Israel, anna menta’bi susi bunga bakung, sia la merrorro tu aka’na susi Libanon.

7Marambak tu mintu’ tarukna; iatu kameloanna la susi kayu saitun sia iatu busarungngu’na susi busarungngu’na Libanon.

8Tau iato mai, tu torro umpentionganni, natananni pole’ gandung. Ondongpi la menta’bi susitu garonto’ anggoro’, nakalelean susito uai anggoro’ Libanon.

9E Efraim, la siapaRa’ tu mintu’ rapang-rapang dipodeata? – Kutanding talingamo sia Kupenunumo, – Akumo tu butung kayu sanoba’ tu tontong maluna, dio Kaleku tu nanii bu’tu buammu.

Ma’katampakanna pa’pakilala

14:10

10Minda-minda kinaa, la naparinaa te mintu’nate! Minda-minda tu matarru’ la nasanda tonganni. Belanna iatu lalanNa PUANG malolo; naolai mintu’ to malambu’, apa napotilende’ mintu’ to patodo tinting.

Currently Selected:

HOSEA 14: SDA

Highlight

Compare

Copy