YEHEZKIEL 35

PUANG umpapakkanni Edom

35:1-15

1Rampomi tu kadanNa PUANG lako kaleku Nakua:

2E ma’rupa tau, mentingo lakoko buntu Seir, ma’nubua’ko unneai,

3mukua: Inde sia tu kadanNa Puangta PUANG, Nakua: Manassa la Kulaoiko buntu Seir! La kue’te’ tu limangKu unneako la Kupopempadang aakko sia la Kupadadiko misa’ tondok sanggang.

4Iatu mai kotamu la Kupadaun-lauan, sia la mempandang lo’bangko, ammu tandai, kumua Akumo tu PUANG.

5Belanna mupatontong bang tu kasiualian sia musorong tu to Israel lako pa’dang ma’kande pu’pu’, tonna lambi’mi attu kasangganganna, tonna ma’katampakannamo diukung tu kakadakeanna,

6iamoto, la lelukraka tuoKu, kadanNa Puangta PUANG, la Kupadadio to’doan rara; sia la naula’ sumpuko rara, belanna tae’ mutipodo’ umpatibollo rara, iamoto naula’ sumpuko rara.

7La Kupopempadang aak tu buntu Seir sia la Kupadadiko misa’ tondok sanggang sia la Kumangsanni inde to dio minda-minda tu male tama sia sun lan mai.

8Iatu mai buntunna la Kupasitutu’i to dipatei. Dao lu mintu’ tanetemu sia diong lu lombokmu sia dio lu mintu’ randan salu’-salu’mu la nanii tibambang tu to nakande pa’dang.

9La Kupopempadang lo’bangko sae lakona; iatu mai kotamu tae’mo nala dipa’tondokki, ammu tandai kumua Akumo tu PUANG.

10Belanna ma’kadako mukua: Iatu bangsa da’dua sola tu tondok da’dua la kupoapa; la taala tapomana’i – moi anna tempon dio mai dio tu PUANG –

11iamoto, la lelukraka tuoKu, kadanNa Puangta PUANG, sitinaya tu kasengkeammu sia kapangimburuammu tu mupakitan tau iato mai napobua’ mabiri’mu, la Kupogau’ duka susito sia la Kupa’pekitanan tu Kaleku dio lu tau iato mai, ke la Kupaolaiko salu.

12Ammu issanni, kumua Akumo tu PUANG. Kurangimo tu mintu’ kada solang, tu mupokada unnea buntunna Israel, kumua: sanggangmo diben nasangmokan, la kunii undaka’ kande.

13Inang tang mulapinamMo’ puduk sia buda kada kapua mukuanNa’. Kurangi nasang sia tu iannato.

14Inde sia tu kadanNa Puangta PUANG, Nakua: La Kupopempadang lo’bangko, anna parannu tu mintu’ issinna lino.

15Susitu kasendeammu, belanna sanggangmo tu mana’ to Israel, la susi dukato Kupogau’ lako kalemu: la mempadang lo’bangko, e iko buntu Seir, ondongpi e iko mintu’ lili’na Edom. Anna tandai tau, kumua Akumo tu PUANG.

Currently Selected:

YEHEZKIEL 35: SDA

Highlight

Copy

Compare