PA’TOLE 34
34
Diona kamateanna Musa
34:1-12
1Attu iato kendekmi tu Musa diong mai padangna Moab langngan buntu Nebo, bottona Pisga, tu sitingoan Yerikho, anNa patiroanni PUANG tu mintu’ tondok iamotu dio mai Gilead sae lako Dan,
2sia mintu’ lili’na Naftali, tondokna Efraim sia Manasye, sia mintu’ tondokna Yehuda sae lako tasik dio lu rampe matampu’;
3sia tondok rampe Lo’na lu sia Padang, sia iatu lombok Yerikho, iamotu tondok nanii koroma sae lako Zoar.
4Sia ma’kada tu PUANG lako Nakua: Inde sia tu tondok, tu mangkaNa’ umpalao sumpa lako Abraham, Ishak na Yakub, Kukua: la Kukamasean bati’mu. Mangkamoko Kupatiroan dio pentiromu, apa tae’ mula lamban lako.
5Pakalan matemi tu Musa, taunNa PUANG, dio, lan tondok Moab, susitu kadanNa PUANG.
6Nalamunni Puang diong misa’ lombok lan tondok Moab, sitingoan Bet-Peor, sia moi misa’ tau tae’ untandai tu lamunanna sae lako allo iate.
7Iatu Musa saratu’ duangpulomo taunna, tonna mate. Iatu matanna tae’pa namaraun sia iatu kamatotoranna tae’pa namoro’.
8Iatu to Israel umbatingi Musa dio padang Moab tallungpulo allona, sae lako tappunna tu mintu’ allo passanda bolongan lako Musa.
9Iatu Yosua, anakna Nun, nakabu’mo penaa kakinaan, belanna mangkamo naremme’i Musa. Iamoto naperangii to Israel tu kadanna sia napogau’ susitu mangka Napepasanan PUANG lako Musa.
10Tae’mo nabi tunannang dio to Israel susi Musa, tu Natandai PUANG sia sitiro lindo –
11napobannang den tu mintu’ tanda kalle-kallean sia tanda mangnga, tu Nasua PUANG umpogau’i lan tondok Mesir lako Firaun sia lako mintu’ to mase’ponna sia lako mintu’ tondokna,
12sia napobannang umpa’petiroan mintu’ kuasa sia mintu’ penggauran mepatiramban tongan, tu mangka napogau’ Musa dio pentirona mintu’ to Israel.
Currently Selected:
PA’TOLE 34: SDA
Highlight
Copy
Compare
Share
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009
